Wanem Nao Truth Abaotem God?
Staka pipol bilivim God hem stap. Bat sapos iu askem olketa sapos olketa savve long God, ansa bilong olketa bae no semsem. Samfala tingse God hem olsem wanfala judge wea raf, wea laekem nomoa for panisim pipol for rong samting wea olketa duim. Olketa narawan tingse hem evritaem showimaot love and forgivim pipol nomata olketa duim nogud samting. Samfala narawan sei God no interest long pipol and hard tumas for eniwan savve long hem. From pipol garem difren tingting olsem, staka pipol sei hem hard for savve long God.
Waswe, hem important for savve long truth abaotem God? Yes hem important. Sapos iu savve long God, datwan bae mekem laef bilong iu garem mining. (Acts 17:26-28) Taem iu start for fren gud witim God, bae hem barava lovem and helpem iu. (James 4:8) Main samting nao, taem iu savve long truth abaotem God, datwan savve helpem iu for kasem laef olowe.—John 17:3.
Wanem nao iu savve duim for savve long God? Tingim samwan wea iu savve gud long hem, olsem wanfala gud fren bilong iu. Hao nao gogo iutufala kamap gud fren? Iu savve long nem bilong hem, wei bilong hem, wanem hem laekem, wanem hem no laekem, and tu, wanem hem duim, olketa plan bilong hem, and olketa nara samting abaotem hem. From iutufala start for savve gud long iutufala, gogo iutufala fren nao.
Semsem tu witim God. Sapos iu kasem ansa for olketa kwestin hia bae iu savve long God:
Disfala magasin bae storyim ansa from Bible for olketa kwestin hia. Olketa article insaed bae helpem iu for savve long truth abaotem God, and tu, gud samting wea bae iu kasem sapos iu fren witim hem.
Iu Laek Lukim Nara Samting?
WASTAOA
Waswe, Iumi Fit for Savve Long God?
Olketa samting abaotem God wea hem no isi for minim wea savve barava helpem iumi for savve gud long God.
