Thru aot lo history, pipol from olketa difren baekgraon ting lo Bible hem ples wea iumi savve kasem olketa tru information. Distaem, staka million pipol followim teaching wea stap insaed. Nomata olsem olketa narawan ting dat Bible hem no fitim distaem and no talem tru samting. Wat nao tingting blo iu? Hao, iu savve faendem tru information lo Bible?

Hao nao for iu luksavve if iu fit for trustim Bible? Tingim wanfala illustration: If wanfala fren hem evritaem talem tru samting for staka years finis, bae iu barava trustim hem. Bible hem olsem wanfala fren wea iu barava trustim wea evritaem talem tru samting. Lukim samfala example.

Olketa Bible Raeta Honest

Olketa Bible raeta barava honest, staka taem olketa storyim olketa mistek and wik point blo olketa. For example, profet Jonah raet abaotem wei wea hem no obey. (Jonah 1:1-3) Lo end blo Bible buk wea hem raetem, hem storyim hao God stretem hem, bat hem no storyim hao hem stretem tingting blo hem bikos hem no laek for pipol mekhae lo hem. (Jonah 4:1, 4, 10, 11) Wei wea evri Bible raeta honest showim olketa barava tinghae lo wei for talem tru samting.

Tru Information wea Savve Helpem Man

Hao, Bible evritaem givim olketa gud advaes wea savve helpem iumi lo laef? Yes. For example, tingim wat Bible talem abaotem wei for gohed stap gud witim olketa narawan: “So samting wea iufala laekem pipol for duim long iufala, sem samting nao iufala mas duim long olketa.” (Matthew 7:12) “Wanfala kaen ansa hem katem daon kros, Bat raf toktok mekem man kros go moa.” (Proverbs 15:1) Yes, from taem wea olketa start raetem Bible kam kasem distaem, olketa truth insaed hem still helpem iumi.

 Tru Information Abaotem History

Lo olketa years wea go pas, staka samting wea olketa archaeologist faendem abaotem pipol and ples wea Bible storyim hem really stap. And olketa samting wea happen wea Bible storyim hem barava stret. Olsem example, tingim pruv abaotem wanfala samting wea Bible storyim. Lo taem blo Nehemiah, pipol blo Tyre (olketa blo Phoenicia wea stap lo Tyre) wea stap lo Jerusalem “olketa tekem kam fish and enikaen samting for salem.”—Nehemiah 13:16.

Hao eni pruv stap wea sapotim wat disfala Bible verse storyim? Yes, olketa Archaeologist faendem olketa samting from Phoenicia lo Israel, wea pruvim tufala nation hia duim trade. And tu lo Jerusalem, olketa digdig and faendem samfala bon blo fish lo Mediterranean. Olketa Archaeologist sei pipol tekem kam olketa fish hia from farawe ples for salem lo there. Afta olketa faendem olketa pruv hia, wanfala scholar sei: “Datfala statement lo Neh[emiah] 13:16 wea sei pipol blo Tyre salem fish lo Jerusalem hem mek sense.”

Tru Information Abaotem Science

Bible hem wanfala buk blo religion and history. Bat taem hem storyim olketa samting abaotem science, hem barava stret. Lukim wanfala example.

Samting olsem 3,500 years ago, Bible sei God hangem earth lo “air nomoa.” (Job 26:7) Diswan hem barava difren from olketa kastom story wea sei earth hem float antap lo wata or stap antap lo wanfala giant tortoise. Samting olsem 1,100 years afta olketa raetem Bible buk Job, pipol still bilivim dat earth hem no hange lo air nomoa, hem mas stap antap lo eni samting. Thri handred years ago nomoa, lo 1687, Isaac Newton pablisim research blo hem abaotem gravity and sei earth hem hange lo air nomoa bikos lo gravity and centrifugal force. Diswan pruvim wat Bible talem winim 3,000 years ago hem tru!