For staka thousand years, no eniwan really savve lo ansa for datfala kwestin. Staka million pipol dae bikos lo olketa nogud sik wea savve spred kwiktaem. Gogo, olketa scientist just savve lo stret information. Olketa faendaot hao staka taem germ olsem bacteria or virus nao savve kosim sik. Datfala stret information helpem pipol for protectim olketa and treatim staka sik, wea datwan mekem staka billion pipol for laef longtaem and healthy.

Waswe lo olketa nara important kwestin? Hao nao wei for faendem tru information abaotem olketa kwestin hia savve helpem iu?

• Hu nao God?

• Hu nao Jesus Christ?

• Wat nao Kingdom blo God?

• Wat nao bae happen lo future?

Staka million pipol faendem ansa for olketa kwestin hia and datwan helpem laef blo olketa. Iu tu savve kasem gud samting if iu kasem ansa for olketa kwestin hia.

Maet iu ting, ‘Hao, iumi savve faendem tru information abaotem eni samting?’ For kasem tru information abaotem staka samting hem barava no isi. Why?

Staka pipol no trustim olketa gavman, bisnis, or media for talem tru information. Hem no isi for pipol savve if wat olketa narawan storyim hem tru or idea blo olketa nomoa, no talem full story or laea. From pipol no trustim narawan and staka information no tru, pipol disagree lo olketa tru information and hao datwan bae helpem olketa.

Nomata lo olketa challenge hia, iumi savve kasem tru ansa for olketa important kwestin lo laef. Hao? Taem iu applyim sem samting wea iu duim for faendem ansa for olketa kwestin wea no important tumas.

Evriday iumi lukaotem tru information. Tingim situation blo Jessica. Hem sei: “Gele blo mi hem barava allergic lo peanut, nomata lelebet amount nomoa lo peanut protein bae hem barava affectim hem. Jessica need for mek sure kaikai wea hem baem bae sef for gele blo hem. Hem sei, first samting mi duim hem for readim gud olketa label lo kaikai wea mi bae peim for savve olketa wat ingredients nao insaed, then mi duim research and even contactim olketa wea wakem datfala product for mek sure kaikai wea mi bae peim no garem eni peanut protein. And tu, mi duim samfala research moa lo olketa nara ples for mek sure mi fit for trustim hao datfala company preparem kaikai.”

Hao iu lukaotem tru information for olketa kwestin blo iu maet no olsem tumas Jessica, bat iu savve followim wat Jessica duim for faendem ansa for olketa kwestin wea iu garem:

• Faendaot lo tru information.

• Duim research.

• Mek sure olketa ples wea iu kasem information from, man fit for trustim.

For faendem ansa wea tru for olketa important kwestin lo laef, iu savve duim sem samting tu. Hao?

Taem Jessica lukaotem truth lo Bible, hem applyim sem samting wea hem duim taem hem research abaotem kaikai wea gele blo hem allergic lo hem. Hem sei, “For readim Bible and duim bigfala research helpem mi for faendem truth lo Bible.” Olsem Jessica, staka million pipol savve lo wat Bible talem abaotem olketa kwestin hia:

• Why nao iumi laef?

• Man wea dae hem hao?

• Why nao wei for safa gohed?

• Wat nao God bae duim for finisim evri wei for safa?

• Wat nao iumi savve duim for garem hapi famili?

Iu savve faendem olketa ansa wea tru for olketa kwestin hia and olketa nara kwestin, taem iu readim Bible and duim samfala research moa lo www.pr418.com.