God Lisin lo Olketa Prea blo Iumi Tu?
Enitaem iu tingim sapos God lisin lo iu taem iu prea? Sapos olsem, hem no iuseleva. Staka prea lo God abaotem problem blo olketa bat problem no finis. Hao datwan minim God no laek lisin lo olketa prea blo iumi? Nomoa! Bible sei taem iumi prea lo stretfala wei God lisin lo iumi. Bae iumi storyim wat Bible talem.
GOD LISIN LO PREA BLO IU.
“Oltaem, yu ansarem olketa prea blong mifala. Evriwan long evri ples bae i kam . . . long yu.”—Sams 65:2.
Samfala pipol sei olketa prea bikos prea mekem olketa feel gud, nomata olketa bilivim no eniwan lisin lo olketa. Bat prea no samting wea iumi duim for mekem iumi feel gud mekem iumi savve deal witim olketa problem blo iumi. Bible sei: “Jehovah * hem fren witim olketa wea prea long hem from heart bilong olketa. . . . Hem lisin lo olketa wea askem hem for help.”—Psalm 145:18, 19, NW.
So iumi sure Jehovah God lisin lo prea blo olketa wea worshipim hem. Hem sei: “Bae yufala kam long mi an prea long mi, an bae mi herem yufala.”—Jeremaea 29:12.
GOD LAEKEM IU FOR PREA LO HEM.
“Gohed for prea and no givap.”—Rome 12:12.
Bible encouragem iumi for “gohed . . . prea” and “gohed evritaem for . . . prea.” Diswan showimaot Jehovah God laekem iumi for prea lo hem.—Matthew 26:41; Ephesus 6:18.
Why nao God laekem iumi for prea lo hem? Tingim diswan: Wanfala dadi hapi taem pikinini askem hem for helpem hem. Hem tru, dadi maet savve finis wat pikinini laekem or needim. Bat taem hem herem pikinini ask for help, datwan showim pikinini trustim hem and fren gud witim hem. Iumi tu, taem iumi prea lo Jehovah God, datwan showim iumi trustim hem and laek for fren witim hem.—Provebs 15:8; James 4:8.
GOD LOVEM IU TUMAS.
“Putim evri wari bilong iufala long hand bilong hem bikos hem tingim iufala.”—1 Peter 5:7.
God laekem iumi for prea lo hem bikos hem lovem and tingim iumi. Hem savve lo olketa problem and wari blo iumi, and laek for helpem iumi.
Taem King David kasem hard taem, hem prea lo Jehovah God for helpem hem and talem Jehovah evri tingting and feeling blo hem. (Sams 23:1-6) Hao nao tingting blo God abaotem David? God lovem David and lisin lo staka prea blo hem. (Acts 13:22) God lisin tu lo olketa prea blo iumi bikos hem lovem iumi.
‘MI LOVEM JEHOVAH, BIKOS HEM LISIN LO PREA BLO MI’
Man wea raetem wanfala psalm lo Bible nao talem datfala toktok. Hem savve God lisin lo olketa prea blo hem, and datwan helpem hem tumas. Hem savve God redi for helpem hem and datwan strongim hem for deal witim olketa hard taem wea hem kasem.—Sams 116:1-9.
Taem iumi sure God herem olketa prea blo iumi, bae iumi no givap for prea. Tingim wat kasem Pedro wea stap lo north saed lo Spain. Son blo hem wea 19 years old dae lo accident. Pedro sorre tumas and storyim evri feeling blo hem lo God, and prea evritaem for God sapotim and comfortim hem. Wat nao Pedro kasem? Hem sei: “Jehovah ansarem olketa prea blo mi taem hem iusim olketa brata and sista for comfortim and sapotim mi and waef blo mi.”
God savve iusim olketa fren for comfortim and sapotim iumi for ansarem prea blo iumi
Nomata son blo Pedro no laef bak, prea barava helpem Pedro and famili blo hem. Waef blo hem María Carmen sei: “Prea helpem mi for deal witim sorre feeling wea mi garem. Mi savve Jehovah God minim samting wea kasem mi, bikos taem mi prea mi garem peace.”
From wat Bible talem and experience blo olketa narawan showim God lisin lo olketa prea. Bat hem showim tu God no ansarem evri prea. Why nao olsem?
^ par. 5 Jehovah hem nem blo God.—Psalm 83:18, NW.
Iu Laek Lukim Nara Samting?
ESSENTIAL BIBLE TEACHINGS
Waswe, God Herem Evri Prea?
Hao sapos man prea for samting wea hem no stret? Hao sapos wanfala hasband treatim nogud waef blo hem, and then hem ask for blessing blo God?
WANEM BIBLE TEACHIM
Traem Bible Course blo Mifala
Duim free Bible study course witim instructor wea bae helpem iu.
