Mental Health Problem Affectim Staka Pipol
“Evritaem mi savve wari, nomata no eniting happen.”
“Taem mi hapi tumas, mi wari nao. Mi experiencem dat taem mi hapi tumas no longtaem bae mi feel sorre.”
“Mi trae for tingim nomoa wat hem happen each day. Bat samfala taem mi kwiktaem for warim staka nara samting.”
Olketa koment hia hem from pipol wea deal witim sik lo mind. Hao, iu or samwan lo famili deal witim sem samting?
Tingim, ino iuseleva nao kasem datwan. Hem affectim tu staka pipol distaem, maet olketa seleva nao kasem or samwan wea olketa lovem.
Iumi sure iumi stap lo taem wea “barava difren and bae evri samting hem hard tumas” wea kosim staka difren wei for wari. (2 Timothy 3:1) Wanfala research showim dat evriwea lo world, samting olsem wanfala lo evri eitfala pipol deal witim mental health disorder. Bikos lo COVID-19 pandemic, lo 2020 samting olsem 26 percent lo pipol moa safa from stress winim 2019 and samting olsem 28 percent lo pipol moa safa from serious depression winim 2019.
Hem important for savve hao many pipol nao safa from stress and depression, bat samting wea moa important hem for savve hao iu and olketa wea iu lovem savve deal witim diswan.
Wat nao mental health?
Gud mental health hem taem iu feel gud and duim olketa normal samting. Iu savve deal witim olketa samting wea iu warim evriday, strong for waka, and hapi lo laef.
Mental disorder . . .
-
HEM NO bikos man hem wik or from hem duim eni rong samting.
-
HEM wanfala sik wea mekem man stress tumas and affectim tingting, feeling, and wei blo hem.
-
Savve mekem man no laek fren witim olketa narawan and no laek duim eni samting.
-
Hem savve affectim pipol nomata wanem age, culture, race, tribe, religion, education baekgraon, or hem rich or poor.
Kasem help for olketa mental health problem
If iu or eniwan lo famili start for duim samting wea no luk stret, garem problem for sleep or kaikai, feeling for sorre wea gohed for longtaem, or stress, iu need for lukim doctor for savve wat nao kosim datwan and hao for treatim. Bat wea nao iu savve kasem help?
Datfala wise man wea winim eni nara man, Jesus Christ sei: “Pipol wea sik nao need for go lukim doctor, no olketa wea strong.” (Matthew 9:12) Olketa wea deal witim kaen sik olsem and kasem medical treatment, sik blo olketa kat daon lelebet and olketa hapi. Hem gud for olketa hia no delay for tekem treatment if olketa symptom hia hem serious or gohed for longtaem. a
Nomata Bible hem no wanfala medical buk, hem garem olketa advaes wea savve helpem iumi deal witim olketa mental health problem. Mifala invaetem iu for readim olketa article hia wea storyim hao Bible savve helpem iumi deal witim datwan
a Disfala Wastaoa no talem wat kaen treatment nao man bae tekem. Each wan shud tingting gud bifor hem mekem disison abaotem which treatment for tekem.
Iu Laek Lukim Nara Samting?
ESSENTIAL BIBLE TEACHINGS
Why Nao God Letem Wei for Safa Gohed?
Bible storyim ansa wea mek sense and wea savve comfortim iumi.
GOHED FOR LUKAOT!
Olketa Teenager wea Garem Mentol Health Problem Increase—Wat Nao Bible Talem Abaotem Datwan?
Bible givim practical help for olketa teenager wea garem mentol issue.
ABAOTEM MIFALA
Askem Samwan for Visit
Discussim wanfala Bible kwestin, or lanem moa samting abaotem Olketa Jehovah’s Witness.
