Stret or Rong: Disison Iu Mas Mekem
Eni disison wea iumi mekem bae barava affectim laef blo iumi lo gud or nogud wei. Jehovah God savve lo datwan. Dastawe hem laekem iumi for followim olketa standard blo hem.
Jehovah laekem iumi for garem peace and hapi.
“Mi, Jehovah, mi God blo iufala, Man wea teachim iufala for iufala nao kasem gud samting, Man wea leadim iufala lo road wea iufala shud wakabaot followim. Sapos iufala obeyim olketa komandment blo mi! Then iufala bae garem peace wea hem ran olsem river And raeteous fasin blo iufala olsem olketa wave lo sea.”—Isaiah 48:17, 18.
From God nao Creator, hem savve lo best samting for iumi. Hem laekem iumi for followim olketa advaes blo hem bikos datwan hem for gud blo iumi. Taem iumi followim olketa komand blo God, iumi bae no tu ting moa if disison blo iumi bae gud or nomoa. Bae iumi evritaem mekem raet disison wea bae mekem iumi for garem peace and hapi.
Jehovah no askem iumi for duim wat iumi no fit for duim.
“Disfala komandment wea mi komandim lo iu tuday hem no hard tumas for iu and hem no farawe from iu.”—Deuteronomy 30:11.
Jehovah promis for helpem olketa wea chus for followim standard blo hem.
“Mi, Jehovah, God blo iu, mi hol strong lo raet hand blo iu, Mi nao Man wea sei lo iu, ‘Iu no fraet. Bae mi helpem iu’”—Isaiah 41:13.
Iumi savve followim olketa standard blo God bikos hem bae helpem iumi for duim datwan. Hem savve helpem iumi thru lo toktok blo hem Bible, wea encouragem and givim iumi hope.
Staka million pipol evriwea lo world luksavve dat taem olketa followim olketa standard lo Bible datwan impruvim laef blo olketa. Hem gud for studyim olketa gud advaes wea stap lo Bible. Iu savve start for duim datwan lo disfala brochure Enjoyim Laef for Olowe! wea available lo jw.org and hem free nomoa. Hem garem olketa leson hia:
-
Hao Nao Bible Savve Helpem Iu for Enjoyim Laef?
-
Bible Mekem Iumi Garem Hope
-
Hao, Iu Savve Trustim Wanem Bible Talem?
Taem iu studyim Bible, bae iu luksavve dat hem no aot-of-date, “man savve depend lo [hem], distaem and for olowe.” (Psalm 111:8) For followim olketa advaes lo Bible hem best wei for mekem iumi hapi. Nomata olsem, God no forcem iumi for duim datwan. (Deuteronomy 30:19, 20; Joshua 24:15) Hem disison wea each wan lo iumi nao mas mekem.