KAVA SUBJECT | WHY NAO JESUS SAFA AND DAE?
Waswe, Datwan Hem Tru Story?
Long 33 C.E., olketa wea les long Jesus sei hem againstim King bilong Rome and hem shud dae. So olketa whipim hem nogud, and nilam hem long wanfala post. Jesus hem barava safa gogo hem dae. Bat God mekem hem for laef bak, and bihaen 40-fala day hem go ap long heven.
Iu savve read abaotem diswan insaed Bible long Matthew, Mark, Luke and John. Bat waswe, hem wanfala tru story? Diswan hem wanfala important kwestin bikos sapos hem no tru, hem iusles nomoa for olketa Christian garem faith long Jesus. And tu, laef olowe long Paradaes wea olketa Christian luk forward long hem bae no savve happen. (1 Corinth 15:14) Bat sapos datfala story hem tru, then iumi evriwan savve kasem olketa nambawan blessing long future. So waswe, samting wea olketa Gospel storyim hem tru or nomoa?
TINGIM SAMFALA PRUV
Olketa nara samting wea olketa raet abaotem long olketa Gospel hem tru. Olsem example, olketa storyim olketa taon and kantri wea nomata distaem pipol savve go long hem. And tu, olketa Gospel storyim pipol wea olketa man for raet abaotem history sei olketa stap bifor.—Luke 3:1, 2, 23.
Samfala nara samting pruvim olketa wea raetem olketa Gospel talem olketa tru samting. Olsem example, olketa man for raet long first and mek-tu century olketa raet abaotem Jesus tu. * Nara samting, olketa samting wea olketa Gospel talem abaotem wei wea olketa nilam Jesus long post gogo hem dae, hem followim nao hao olketa long Rome savve killim man long datfala taem. And tu, olketa wea raetem olketa Gospel barava honest taem olketa storyim samting wea happen, olsem taem olketa disaepol bilong Jesus duim olketa samting wea no stret.—Matthew 26:56; Luke 22:24-26; John 18:10, 11.
WASWE, HEM TRU JESUS HEM LAEF BAK?
Staka pipol bilivim Jesus hem laef bifor, bat samfala no bilivim hem laef bak bihaen hem dae. Firstaem wea olketa disaepol bilong Jesus herem olketa sei hem laef bak olketa tu no bilivim datwan. (Luke 24:11) Bat taem olketa seleva lukim Jesus, olketa barava bilivim hem laef bak. Wanfala taem wea olketa lukim hem, winim 500 pipol tu lukim hem.—1 Corinth 15:6.
Nomata olketa disaepol savve olketa wea no laek herem Jesus hem laef bak savve arrestim and killim olketa dae, olketa no fraet for talemaot hem laef bak. (Acts 4:1-3, 10, 19, 20; 5:27-32) Sapos olketa disaepol no barava sure Jesus hem laef bak, bae hem hard for olketa talemaot datwan long pipol. And tu, sapos Jesus hem no laef bak, bae no eni Christian stap long world long datfala taem or long distaem, bikos datwan nao wanfala main biliv bilong olketa Christian.
Olketa samting hia pruvim wanem olketa wea raetem olketa Gospel talem abaotem dae bilong Jesus and wei wea hem laef bak, hem tru. Taem iumi studyim gud olketa Gospel, datwan bae helpem iumi for bilivim olketa samting hia hem happen. Taem iumi minim why olketa samting hia hem happen, datwan tu savve helpem iumi for no daotem datfala story abaotem Jesus. Bae iumi storyim datwan long nextfala article.
^ par. 7 Tacitus, wea born long samting olsem 55 C.E. sei “Christ (wea datfala word Christian hem kam from) hem dae taem Tiberius rulim Rome. Pontius Pilate, wanfala bigman bilong iumi, letem olketa killim dae Jesus.” Olketa narawan wea raet abaotem Jesus hem Suetonius, (long first century), Josephus (long first century), and Pliny the Younger, governor bilong Bithynia (long mek-tu century).
