Pipol bilong God gohed for talemaot gud nius abaotem Kingdom bilong God long evri kantri long earth, olsem Jesus hem profesi abaotem. (Matthew 24:14) Bible buk Daniel sei datfala Kingdom hem gavman bilong God. Long Daniel chapter 2 hem storyim wanfala profesi abaotem samfala world paoa wea rul, start witim Babylon bifor kam kasem distaem. Long verse 44, hem storyim wanem bae happen long future. Hem sei:

“Disfala God long heven bae hemi mekem wanfala kingdom fo kamap wea no eniwan save spoelem enitaem. An bae no eni narafala king moa save winim hem. Disfala kingdom ya bae hemi pisisim finis olketa narafala kingdom, an rul blong hem bae hemi stap evritaem olowe.”

Disfala profesi and olketa narawan sei Kingdom bilong God bae finisim evri gavman bilong man and hem nao bae mekem pipol long earth for stap long peace and garem gudfala living. Taem datfala Kingdom rul, laef bae hao? Distaem bae iumi storyim samfala nambawan promis wea klosap nao bae kamap tru.

• WAR BAE NOMOA NAO

  Sams 46:9 sei: “[God] hemi finisim olketa faet long evriples long wol. Hemi gohed fo brekem olketa bou, an . . . spoelem olketa spia, an . . . bonem olketa samting ya long faea.”

  Tingim. Laef long world bae hem gud tumas sapos pipol iusim evri selen and savve wea olketa garem for helpem narawan, and no for wakem olketa samting for faet! Datfala promis bae kamap tru taem Kingdom bilong God hem rul.

• NO ENIWAN BAE SIK

  Aesaea 33:24 sei: “Long taem ya, no eniwan . . . bae hemi talem dat hemi sik.”

  Tingim taem wea no eniwan long world bae garem heart problem, cancer, malaria, and olketa nara sik. Bae iumi no needim hospital and medicine tu. Evriwan long earth bae garem perfect health.

• NO ENIWAN BAE SHORT LONG KAIKAI

  Sams 72:16 sei: “Letem lan blong mifala hemi garem plande kaikai long hem, an bae olketa hil i fulap fogud long kaikai.”

  Earth bae garem staka kaikai wea fitim evriwan and evriwan bae garem kaikai wea olketa needim. No eniwan bae hangre enitaem.

• NO ENIWAN BAE FEELIM PAIN, SORRE, AND DAE

  Revelation 21:4 sei: “[God] bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.”

   Diswan kamap bikos evriwan perfect and stap insaed paradaes long earth! Diswan nao samting wea Creator bilong iumi, Jehovah God, hem promisim.

Waswe, evri promis hia bae hem kamap tru tu? Nomata staka pipol laekem tumas evri promis hia wea Bible story abaotem, staka faendem hard for minim hao nao bae pipol laef olowe. Iumi no sapraes bikos no eni man laef olowe mekem hem savve storyim datwan long iumi.

From olketa man slave long sin and dae, olketa kasem pain, safa, and hard taem for long taem tumas, gogo pipol ting evri samting hia hem normal samting nomoa long laef. Bat datwan hem barava difren from plan bilong Jehovah for iumi olketa man.

God talem toktok wea mekem iumi trustim olketa promis bilong hem. Hem sei: “Bae evrisamting wea mi talem mas hapen nao olsem wea mi bin planem. An wanem mi talem, hemi no save mis. Ya, bae evrisamting wea mi talem mas hapen nao olsem wea mi laekem.”—Aesaea 55:11.

Bible storyim Jehovah hem God wea “no savve laea.” (Titus 1:2) From God hem promisim olketa nambawan samting hia wea bae kamap long future, hem gud for iumi ting raonem olketa kwestin hia: Waswe, olketa man savve laef olowe long paradaes long earth? Wanem nao iumi savve duim mekem iumi kasem gud samting from olketa promis bilong God? Olketa nara article insaed magasin hia bae ansarem olketa kwestin hia.