WASWE, enitaem iu feel nogud and laek dae nao? Sapos olsem, maet iu bae minim feeling bilong Adriana. Hem safa from hem wari tumas, sorre, and no garem hope. Adriana garem sik, depression.

Tingim wanfala man long Japan, wea nem bilong hem Kaoru. Hem lukaftarem olo dadi and mami wea sik. Hem sei: “Long taem hia, mi kasem hard taem tu long waka ples. Gogo, mi no interest for kaikai, and mi no savve sleep gud tu. Mi start for tingim, sapos mi dae nomoa, olketa problem bilong mi bae finis nao.”

Ojebode, from Nigeria hem sei, “Evritaem mi sorre and krae, so mi lukaotem eni wei for dae nomoa.” Iumi hapi Ojebode, Kaoru, and Adriana no suisaed. Bat, evri year staka thousand pipol nao suisaed.

Staka wea suisaed, hem olketa man, and staka long olketa hia hol bak for askem help. Jesus sei pipol wea sik nao need for lukim doctor. (Luke 5:31) So sapos iu garem feeling olsem olketa wea iumi storyim finis, plis no hol bak for askem help. Staka pipol wea safa from depression luksavve medical treatment savve helpem olketa for deal witim datwan. Ojebode, Kaoru, and Adriana kasem medical treatment and datwan helpem olketa.

Maet olketa doctor givim iu medicine or story witim iu for helpem iu for deal witim datfala sik. Olketa wea kasem depression needim tu help from famili and fren for minim, kaen, lukaftarem, and sapotim olketa. Jehovah God nao hem best fren wea savve givim iumi nambawan help long Bible.

Olketa wea kasem depression maet need for tekem treatment for longtaem and lane for getius long samfala change long laef bilong olketa. Sapos iu kasem depression, iu savve luk forward long wanfala hapi future olsem Ojebode, wea sei, “Mi luk forward for taem wea Aesaea 33:24 bae kamap tru wea storyim taem wea no eniwan long earth bae sei ‘hemi sik.’” Olsem Ojebode, iu savve kasem comfort long promis bilong God for wanfala “niu earth,” wea “pain” bae nomoa nao. (Revelation 21:1, 4) Datfala promis hem for finisim tu evri sik saed long feeling and tingting, and pain wea iu kasem bae finis for olowe. Pain wea iu kasem bae iu “no tingim moa.”—Isaiah 65:17, NW.