Lo sem wei tu, klosap nao iumi evriwan bae feisim wanfala big storm, wea Jesus kolem lo “bigfala trabol.” (Matthew 24:21) Iumi bae no misstim datfala bigfala trabol. Bat iumi savve duim samting for protectim iumiseleva taem bigfala trabol hem kam. Wanem nao iumi savve duim?

Lo Sermon lo Maunten, Jesus Christ givim disfala direction: “Evritaem Kingdom and olketa samting wea God sei hem stret mas first samting long laef bilong iufala.” (Matthew 6:33) Hao nao iumi savve duim datwan?

Evritaem Kingdom blo God mas first. Datwan hem minim, iumi shud tingim Kingdom blo God hem important lo iumi winim eni nara samting. (Matthew 6:25, 32, 33) Why nao iumi shud tingim Kingdom nao hem important? Bikos olketa man no fit for stretem olketa problem blo iumi. Kingdom blo God nomoa savve duim datwan.

Evritaem duim wanem God sei hem stret. Iumi shud traem best blo iumi for followim olketa law and olketa principle blo God. Why nao olsem? Bikos sapos iumiseleva disaedem wanem nao hem stret and no stret, iumi bae kasem nogud samting. (Provebs 16:25) Bat sapos iumi followim olketa standard blo God, iumi bae mekem hem hapi, and iumi tu bae kasem gud samting.—Aesaea 48:17, 18.

Evritaem Kingdom and olketa samting wea God sei hem stret mas first. Jesus talem disfala warning hao samfala maet letem tingting blo olketa for go difren, and tingse olketa savve stap sef sapos olketa garem staka selen. Olketa narawan spendem staka taem and strong blo olketa for stretem  problem wea olketa kasem evriday, gogo olketa no garem taem nao for lukaotem Kingdom blo God firstaem.—Matthew 6:19-21, 25-32.

Jesus promisim hao olketa wea sapotim Kingdom blo God bae kasem samting wea olketa needim distaem, and enjoyim staka blessing wea no savve finis lo future.—Matthew 6:33.

Nomata olketa disaepol blo Jesus lo first century wea Kingdom and olketa samting wea God sei hem stret hem first samting lo laef blo olketa, olketa tu no lukim pain and wei for safa hem finis lo taem blo olketa. Bat olketa kasem gud samting. Why nao iumi sei olsem?

Olketa followim raeteous standard blo God, and datwan protectim olketa from olketa nogud samting wea kasem pipol wea no obeyim God. Strongfala faith wea olketa garem lo Kingdom, hem helpem olketa for deal witim olketa big problem wea olketa kasem. And God givim “strong wea winim strong bilong man” mekem olketa deal witim olketa problem hia.—2 Corinth 4:7-9.

Olketa Christian lo first century obeyim komand blo Jesus for evritaem Kingdom hem first samting lo laef blo olketa. Olketa preachim gud nius abaotem Kingdom lo smol part lo world nomoa lo datfala taem. (Colossae 1:23) Waswe, eniwan duim datfala waka distaem?

Ia! Olketa Jehovah’s Witness luksavve lelebet taem nomoa hem stap bifor Kingdom blo God finisim disfala nogud world blo Satan. So olketa traem best blo olketa for followim wanem Jesus talem: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.”—Matthew 24:14.

Wanem nao bae iu duim taem iu herem disfala gud nius? Mifala encouragem iu for followim example blo olketa lo Beroea, datfala taon lo Macedonia. Taem olketa herem gud nius abaotem Kingdom from aposol Paul, “olketa willing for herem message bilong God.” Then “olketa lukluk gud long olketa Holy Raeting” for savve sapos samting wea olketa herem hem tru, and olketa duim samting followim wanem olketa lanem.—Acts 17:11, 12.

Iu tu savve duim sem samting. Taem Kingdom and olketa samting wea God sei hem stret hem first samting lo laef blo iu, iu bae kasem protection distaem, and iu bae enjoyim trufala peace and iu bae stap sef lo future.