Lo article bifor, iumi storyim saen wea Jesus talem. Datfala saen helpem iumi for lukim hao Kingdom blo God hem start for rul finis lo heven, and Jesus Christ nao hem King.

Bible sei taem Jesus hem kasem paoa, hem bae aotem Satan and olketa demon blo hem from heven. Waka blo olketa hem lo earth nomoa, and hem nao reason why olketa samting nogud tumas start kam lo 1914.—Revelation 12:7, 9.

Nomata world barava nogud tumas, Jesus, wea hem King lo Kingdom blo God, hem duim finis staka samting for helpem pipol evriwea lo earth. Iumi hapi for garem waka for teachim Bible evriwea lo world wea Jesus talem, and staka nao olketa gohed for lanem and followim olketa Bible principle lo laef blo olketa. (Aesaea 2:2-4) Staka million pipol lane for garem balance tingting saed lo waka, mekem famili laef blo olketa kamap gud, and olketa garem olketa material samting, bat olketa no letem olketa samting hia for kamap main samting lo laef blo olketa. Olketa hia kasem gud samting distaem from wanem olketa lanem, and olketa kamap kaen pipol wea God laekem for stap anda lo Kingdom blo hem.

Nomata olketa gavman blo man still rul lo earth distaem, bat Jesus hem rul finis lo heven. Nomata olsem, God talem lo Jesus: “Iu go rul midolwan long olketa enemy bilong iu.” (Psalm 110:2, NW) Klosap nao Jesus bae finisim olketa enemy, and finisim tu olketa problem blo olketa wea willing for obeyim God.

Lo datfala taem, Kingdom blo God bae duim samting for

• Finisim false religion. Olketa religion wea teachim olketa laea samting abaotem God, and mekem laef blo pipol hard tumas bae finis for olowe. Bible comparem false religion olsem wanfala jury woman. Staka bae seke fogud taem false religion hem finis.—Revelation 17:15, 16.

• Finisim rul blo olketa man. Kingdom blo God bae finisim evri gavman blo man.—Revelation 19:15, 17, 18.

• Finisim wicked pipol. Waswe lo olketa wea laekem for duim nogud samting and wea les for obeyim God? Bible sei: “Olketa wicked pipol bae no stap long earth; and nogud pipol bae finis.”—Proverbs 2:22, NW.

• Finisim Satan and olketa demon blo hem. Satan and olketa demon blo hem bae “no laea moa long olketa pipol long evri kantri long world.”—Revelation 20:3, 10.

Waswe lo olketa wea acceptim Kingdom blo God?

From Jesus rul kam from heven, hem bae duim staka samting winim eni man wea rul lo world enitaem. Olketa blo 144,000, wea God chusim from disfala earth bae rul witim Jesus. (Revelation 5:9, 10; 14:1, 3) Jesus bae mek sure wanem God laekem bae kamap lo earth. Wanem nao Kingdom blo God bae duim for olketa wea bae stap lo earth?

• Finisim sik and dae. “No eniwan long kantri ya bae hemi talem dat hemi sik.” And “no eniwan bae dae.”—Aesaea 33:24; Revelation 21:4.

• Trufala peace and wei for stap sef bae kamap. “Bae mi givim gudfala laef an piis long yufala,” and “bae olketa save stap gudfala long olketa plantesin blong olketa long grep, an olketa save sidaon andanit long olketa fig tri blong olketa. An bae no eniwan save mekem olketa fo fraet moa.”—Aesaea 54:13; Maeka 4:4.

• Provaedem waka wea mekem man satisfae. “Olketa bae barava kasem gud samting from wanem olketa hard waka long hem. Olketa bae no hard waka nating.”—Isaiah 65:22, 23, NW.

• Olketa problem saed lo environment bae finis. “Olketa drae eria bae i hapi tumas, an plande flaoa bae hemi grou long ples wea no eniwan hemi stap long hem.”—Aesaea 35:1.

• Teachim pipol wanem olketa need for duim for olketa kasem laef olowe. “For olketa kasem laef olowe, olketa mas lane abaotem iu, wea iu nomoa trufala God, and lane abaotem Jesus Christ, wea iu sendem kam.”—John 17:3.

God laekem iu for enjoyim olketa blessing hia. (Aesaea 48:18) Nextfala article bae explainim wanem iu savve duim distaem for enjoyim olketa blessing wea bae kamap lo future.