Jesus sei: “Bae pipol long wanfala ples faetem pipol long nara ples and pipol long wanfala kantri faetem pipol long nara kantri. Olketa bigfala earthquake bae sekem staka ples, and olketa barava nogud sik and olketa taem bilong bigfala hangre bae kasem plande pipol.” (Luke 21:10, 11) Evri samting hia wea happen hem showimaot klia wanfala saen nomoa, olsem olketa laen lo finger hem mekem ap wanfala finger print. And lo sem wei wea finger print blo wanfala man, mekem iumi for luksavve lo hem, olketa samting hia wea happen semtaem, mekem iumi for luksavve “Kingdom bilong God hem klosap kam nao.”  Waswe, olketa samting hia happen semtaem evriwea lo world? Lukim olketa pruv abaotem diswan.

1. OLKETA WAR

Lo 1914, olketa man lukim wanfala war wea start wea affectim staka pipol and affectim staka ples! Olketa man for raetem history sei datfala year 1914 hem important year lo history bikos hem year wea first world war hem start. Lo datfala war, olketa start for iusim war tank, olketa bigfala bomb, olketa machine gun, poison gas, and olketa nara samting wea savve killim man dae. Bihaen datwan, world war II hem kamap and olketa start for iusim atomic bomb. Start kam lo 1914, olketa war kamap lo staka ples, and olketa war hia killim dae staka million pipol.

2. OLKETA EARTHQUAKE

Evri year, datfala Britannica Academic sei, samting olsem 100-fala earthquake wea big tumas “spoelem staka samting.” And United States Geological Survey sei, followim record wea olketa keepim start kam lo 1900, hem sei: “iumi expectim samting olsem 16-fala big earthquake savve happen enitaem.” Nomata samfala maet tingse from olketa garem gud machine, datwan nao mekem olketa for lukim staka earthquake hia, bat olketa big earthquake wea happen raonem world mekem staka pipol for safa and dae winim enitaem bifor.

 3. BIGFALA HANGRE

Bigfala hangre hem happen evriwea lo world bikos lo war, corruption, problem saed lo selen, kaikai no grow gud, or no plan gud for taem blo nogud weather. Datfala World Food Programme blo “2018 Year in Review” sei: “Raonem full world, 821 million pipol olketa hangre, and 124 million lo olketa hia, barava hangre fogud.” Samting olsem 3.1 million pikinini dae evri year bikos olketa no kaikai gud. Lo 2011, klosap haf lo olketa pikinini wea dae lo full world, hem olketa wea no kaikai gud.

4. OLKETA SIK AND OLKETA SIK WEA SAVVE SPRED

Wanfala pablikeson blo World Health Organization sei: “Olketa sik wea savve spred lo staka pipol hem happen finis lo disfala 21st century. Olketa old sik olsem cholera, plague and yellow fever, olketa kam bak moa. And olketa niu sik olsem SARS, pandemic influenza, MERS, Ebola, and Zika tu kamap distaem.” Datfala COVID-19 pandemic wea just happen. Nomata olketa scientist and olketa doctor lanem staka samting abaotem olketa sik, olketa no savve finisim evri sik.

5. PREACHING WAKA EVRIWEA LO WORLD

Jesus storyim nara part blo datfala saen taem hem sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.” (Matthew 24:14) Nomata disfala world kasem staka nogud problem, winim eit million pipol from evri difren kantri gohed talemaot disfala gud nius abaotem Kingdom blo God lo 240 kantri, and olketa iusim winim 1,000 languis. Diswan hem no enitaem happen lo history blo olketa man.

Olketa samting wea gohed happen distaem, olketa part lo datfala saen wea Jesus storyim. Why nao iumi interest lo datwan? Bikos Jesus sei: “Taem iufala lukim olketa samting hia hem happen, iufala bae savve Kingdom bilong God hem klosap kam nao.”—Luke 21:31.

Datfala saen wea Jesus talem, witim olketa date wea Bible storyim, helpem iumi for minim hao God hem startim finis Kingdom blo hem lo heven lo year 1914. a Lo datfala taem, hem appointim Son blo hem Jesus Christ, for hem King. (Sams 2:2, 4, 6-9) Klosap nao Kingdom blo God bae rul ovarem earth, and hem bae aotem evri gavman blo man and mekem earth kamap paradaes for olketa man stap olowe lo hem.

Klosap nao, olketa toktok lo datfala lord’s prea wea Jesus teachim bae kamap tru: “Mifala laekem Kingdom bilong iu for kam. Duim samting wea iu laek for duim long earth, olsem iu duim long heven.” (Matthew 6:10) Wanem nao datfala Kingdom duim finis taem hem start rul lo 1914? And wanem nao iumi luk forward lo hem taem Kingdom bae rul ovarem evriwan lo earth?