Wanem Iu Savve Duim for Stap lo Niu World
Iumi lukim lo olketa article bifor diswan hao klosap nao God bae finisim nogud pipol and evri problem lo world. Iumi sure diswan bae happen. Why nao olsem? Bikos toktok blo God, Bible hem sei:
“World bae finis.”—1 JOHN 2:17.
Iumi sure olketa pipol bae sev bikos sem scripture antap hem sei tu:
“Man wea duim wanem God hem laekem bae stap for olowe.”
So sapos iumi laek for laef, iumi mas duim samting wea God laekem. For savve lo datwan, first samting iumi mas lane abaotem hem.
FOR “LANE ABAOTEM” GOD SAVVE MEKEM IU SEV TAEM END HEM KAM
Jesus sei: “For olketa kasem laef olowe, olketa mas lane abaotem iu, wea iu nomoa trufala God.” (John 17:3) For iumi sev taem end blo world hem kam and for kasem laef olowe, iumi mas “lane abaotem” God. Datwan hem no minim for biliv nomoa lo God or savve lo tu-thri samting abaotem hem. Iumi need for fren witim hem. Example nao, if iumi laek fren gud witim olketa narawan, iumi need for spendem taem witim olketa. For fren witim God hem semsem tu. Bae iumi lanem samfala important truth lo Bible wea savve helpem iumi for fren gud witim God and for gohed fren witim hem.
READIM BIBLE EVRIDAY
For prea and duim samting wea God laekem datwan savve mekem iu sev taem end blo world hem kam
Iumi kaikai evriday mekem iumi gohed laef. Bat Jesus sei: “Samting wea mekem man laef nao, hem no kaikai nomoa, bat hem evri toktok wea kamaot from mouth bilong Jehovah.”—Matthew 4:4.
Distaem, iumi savve lukim toktok blo Jehovah insaed Bible. Taem iu studyim datfala holy buk, bae iu lanem samting wea God duim lo bifor, distaem, and wanem bae hem duim lo future.
PREA LO GOD FOR HELP
Wat nao iu savve duim sapos iu laek for obeyim God bat faendem hard for stop for duim olketa samting wea hem sei hem no stret? Samting wea savve helpem iu nao hem for lane abaotem God.
Tingim disfala woman wea bae iumi kolem hem Sakura, wea bifor hem duim olketa rabis samting saed lo sex. Taem hem start for studyim Bible, hem lanem law blo God wea sei “ranawe from eni samting wea switim iufala for durong.” (1 Corinth 6:18) Sakura prea lo God for givim hem paoa mekem hem savve changem disfala nogud wei blo hem. Bat hem still kasem olketa temptation. Hem sei: “If mi start for tingim olketa samting wea no stret, mi prea lo Jehovah and storyim evri samting bikos mi savve mi bae no winim datwan seleva. Prea mekem mi fren gud witim Jehovah.” Staka million pipol tu lane abaotem God olsem Sakura. God givim paoa wea olketa needim mekem olketa changem laef blo olketa and duim samting wea Hem hapi lo hem.—Philippi 4:13.
Taem iu savve gud lo God, bae “God hem savve long [iu]” olsem spesol fren blo hem. (Galatia 4:9; Sams 25:14) Then bae iu qualify for laef lo niu world blo God. Bat datfala niu world bae hao? Next article bae storyim datwan.
a Jehovah hem nem blo God wea stap lo Bible.