God wakem body bilong iumi long barava spesol wei. Taem man hem garekil, “body seleva savve healim datfala garekil nomata hem big or smol.” (Johns Hopkins Medicine) Body savve kwiktaem stopem blood for ran, mekem olketa blood vessel big, healim garekil hia, and repairim datfala tissue.

TINGIM DISWAN: Sapos Creator designim body for healim seleva, waswe, hem fitim for iumi trustim promis bilong hem for healim iumi long eni samting wea mekem iumi safa? Man wea raetem psalm sei: “Hemi mekem olketa hu i sore fo hapi moa, an hemi mekem olketa soa blong olketa fo kamap gud moa.” (Sams 147:3) Bat sapos wanfala nogud samting kasem iu, hao nao bae iu sure Jehovah savve helpem iu for kamap gud moa distaem and long future?

God promis olsem: “Yufala no fraet, an yufala no seksek. Mi nao God blong yufala, an mi stap wetem yufala. Bae mi mekem yufala strong, an bae mi helpem yufala.” (Aesaea 41:10) Taem man savve Jehovah lovem hem, datwan helpem hem for garem peace long mind and strongim hem for deal witim eni hard taem wea kasem hem. Aposol Paul kolem diswan “peace bilong God wea winim nao wanem man savve minim.” Paul sei tu: “Nomata wanem samting hem kasem mi, paoa wea mi kasem from God nao hem strongim mi for gohed.”—Philippi 4:4-7, 9, 13.

Bible helpem iumi for garem strongfala faith long olketa promis bilong Jehovah abaotem future. Olsem example, Revelation 21:4, 5 storyim wanem hem bae duim and reason why iumi fit for trustim datfala promis:

• “Hem bae draem evri tias” long eye bilong pipol. Jehovah bae finisim evri nogud samting wea kasem iumi nomata long tingting bilong pipol maet olketa samting hia nating important nomoa.

• Olmaeti King, wea “sidaon long throne” bilong hem long heven, bae iusim paoa bilong hem for helpem iumi and finisim evri nogud samting.

• Jehovah sei olsem abaotem olketa promis bilong hem: “Man savve trustim . . . and hem barava tru.” Bikos hem trufala God and bikos long mining bilong nem bilong hem, iumi savve sure hem bae duim wanem hem promisim.

“‘Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.’ God wea sidaon long throne hem sei: ‘Mi wakem evri niu samting.’ Hem sei tu: ‘Raetem diswan, bikos man savve trustim olketa toktok hia and hem barava tru.’”—Revelation 21:4, 5.

Iumi savve lane abaotem olketa wei bilong Dadi bilong iumi long heven from olketa samting wea iumi lukim long universe and from Bible. Creation savve mekem iumi laek for savve long God, bat Bible nao invaetem iumi for fren witim hem. Bible sei: “Fren gud witim God and bae hem fren gud witim iufala.” (James 4:8) Acts 17:27 sei: “Hem no hard nomoa for savve long [God].”

Taem iu gohed lane abaotem God, gogo bae iu luksavve hem ‘tingim iu.’ (1 Peter 5:7) Wanem gud samting nao iu savve kasem taem iu trustim Jehovah?

Tingim samting wea kasem Toru, from Japan. Mami bilong hem Christian woman, bat gogo Toru joinim Mafia bilong Japan, wea olketa kolem olketa, yakuza. Hem sei: “Mi tingse God heitim mi and panisim mi taem olketa wea mi lovem olketa dae.” Toru sei from hem insaed kaen laef olsem and hem garem kaen tingting olsem, hem “no kea and no sorre long eniwan.” Toru sei: “Mi laek for killim dae eni famous man mekem staka pipol savve long mi, and mi laek for dae taem mi young nomoa.”

 Bat taem Toru and waef bilong hem Hannah studyim Bible, Toru barava changem olketa nogud wei and tingting bilong hem. Hannah sei: “Mi barava lukim long eye bilong mi hao hasband bilong mi hem change.” Distaem, Toru barava sure long diswan: “God stap and hem barava lovem iumi each wan. Hem no laekem eniwan for dae, and hem willing for forgivim olketa wea repent from nogud wei bilong olketa. Hem lisin taem iumi storyim long hem eni samting wea maet iumi nating talem long eniwan, or wea olketa narawan no savve minim. Klosap nao Jehovah bae finisim evri problem, safa, and pain wea iumi kasem. Nomata distaem tu hem helpem iumi long wei wea iumi no tingim. Hem lovem iumi and helpem iumi taem iumi feel wikdaon.”—Psalm 136:23, NW.

Story bilong Toru showimaot taem iumi savve klosap nao God bae finisim evri nogud samting and draem evri tias bilong iumi, datwan givim iumi hope for future and helpem iumi for garem gudfala laef distaem tu. Tru nao, nomata iumi stap insaed world wea staka nogud samting happen, iumi kasem gud samting taem iumi savve God lovem iumi.