God Wakem Iumi for Laef Olowe
IUMI evriwan laek for laef longtaem and for hapi lo laef blo iumi. Tingim sapos iumi savve laef olowe, no sik, and hapi! Iumi bae garem staka taem for stap witim olketa wea iumi lovem, go for lukim olketa difren ples, lane for duim olketa difren samting, garem bigfala savve, and lane for duim staka samting wea iumi laek duim.
Why nao iumi laek for laef olowe? Iumi lanem lo Bible God putim datfala feeling insaed heart blo iumi. (Ecclesiastes 3:11, NW) Bible sei tu “God hem love.” (1 John 4:8) Sapos iumi no fit for laef olowe, waswe, God wea lovem iumi bae hem putim disfala feeling for laek laef olowe lo iumi?
No eniwan laek for dae. Bible storyim dae olsem wanfala “enemy.” (1 Corinth 15:26) Samfala dae taem olketa young nomoa, and olketa narawan dae taem olketa olo. Nomata olsem, iumi evriwan bae dae nomoa. Staka pipol fraet taem olketa ting abaotem dae. Waswe, enitaem bae disfala enemy hem finis? Waswe, datwan savve happen?
HOPE HEM STAP
Waswe, iu savve God wakem iumi olketa man for laef olowe? Bible buk Genesis hem storyim plan blo God for iumi olketa man hem for laef olowe lo earth. Jehovah God wakem earth and putim evri samting wea iumi olketa man needim for enjoyim laef. Then hem wakem firstfala man, Adam, and putim hem insaed wanfala paradaes, lo garden lo Eden. Bihaen datwan, “God hemi lukim olketa waka ya wea hemi bin mekem, olketa i barava gud tumas.”—Jenesis 1:26, 31–2:1.
Taem God wakem Adam hem perfect. (Deuteronomy 32:4, NW) Eve, waef blo Adam, hem tu perfect. Jehovah talem tufala: “Hemi gud fo yutufala garem plande pikinini mekem olketa wea bae olketa kamaot bihaen long yutufala, bae olketa save go an stap long evri ples long wol. . . . Mi putum yufala, mekem yufala rul ovarem olketa fis, an olketa bed, an olketa narasamting moa wea i garem laef wea olketa stap long wol ya.”—Jenesis 1:28.
Bae hem tek taem for Adam and Eve garem pikinini and fulimap disfala earth. Eve bae bornem olketa pikinini, and olketa pikinini hia bae gohed bornem pikinini gogo disfala earth bae fulap witim pipol, wea hem nao plan blo God. (Aesaea 45:18) Waswe, hem stret for Jehovah talem datfala plan blo hem lo Adam and Eve sapos tufala bae laef for lelebet taem nomoa for lukim olketa pikinini and grani blo tufala, and no savve wanem bae happen?
Tingim tu, komand blo God for olketa man rul ovarem olketa animal. God talem Adam for givim nem lo olketa animal, and datwan bae tek taem. (Jenesis 2:19) Bat for Adam rul ovarem olketa animal, bae hem need for lane abaotem olketa and savve hao for lukaftarem olketa. Bae hem needim staka taem moa for duim datwan.
So taem God sei for garem pikinini and fulimap disfala earth and for rul ovarem olketa animal, datwan showim God wakem Adam and Eve for laef longtaem. Hem nao wanem happen, Adam laef longtaem.
PLAN BLO GOD FOR OLKETA MAN LAEF OLOWE LO PARADAES LO EARTH
OLKETA LAEF LONGTAEM TUMAS
Adam, 930 years
Methuselah, 969 years
Noah, 950 years
Distaem, 70-80 years
Bible storyim samfala man wea laef bifor wea olketa laef longtaem winim iumi distaem. Bible sei: “Taem [Adam] dae, hemi kasem 930 yia blong hem.” Bible storyim tu nara sixfala man wea laef winim 900 years! Olketa nao Seth, Enosh, Kenan, Jared, Methuselah, and Noah. Evriwan laef bifor Flood lo taem blo Noah. Noah laef for 600 years bifor Flood kam. (Jenesis 5:5-27; 7:6; 9:29) Wanem nao mekem olketa savve laef longtaem olsem?
Olketa man hia born no longtaem bihaen Adam and Eve garem perfect laef. Maet datwan nao wanfala main reason why olketa laef longtaem. Bat hao nao wei for perfect hem join witim wei for laef longtaem? And hao nao dae bae finis? For kasem olketa ansa, bae iumi storyim firstaem why iumi kamap olo and dae.
Iu Laek Lukim Nara Samting?
ESSENTIAL BIBLE TEACHINGS
Why Nao God Wakem Earth?
Earth fulap witim staka samting wea luk naes tumas. God putim earth lo barava stret distance from sun, hem putim moon mekem earth stedy lo stretfala angle, and mekem earth for tane lo barava raet speed. Why nao God duim bigfala waka for creatim disfala earth?
