Advaes lo Bible: “Iufala mas no laekem tumas selen, bat iufala mas hapi nomoa long samting wea iufala garem.”—Hebrew 13:5.

Distaem staka samting tumas stap wea pipol lo world sei for iumi mas garem. Bat Bible sei iumi savve “hapi nomoa long samting wea [iumi] garem.” Hao nao iumi savve satisfae nomoa?

“No laekem tumas selen.” Pipol bae duim eni samting nomata hem spoelem health, famili, fren, and gudfala wei blo olketa bikos olketa “laekem tumas selen.” (1 Timothy 6:10) Datwan weist taem nomoa! Man wea laekem tumas material samting “bae no savve satisfae.”—Ecclesiastes 5:10, NW.

Pipol important winim material samting. Hem tru, olketa material samting savve helpem iumi. Nomata olsem, olketa no savve lovem or tinghae lo iumi, pipol nomoa savve duim datwan. For garem wanfala “gudfala fren,” datwan bae mekem iu satisfae lo laef.—Proverbs 17:17, NW.

Advaes lo Bible: “Man hemi hapi, laef hemi helti.”—Provebs 17:22.

For iumi “hapi” datwan savve helpem iumi for deal witim sik wea kasem iumi. Bat hao nao iumi savve hapi taem iumi sik?

Showimaot iumi tinghae. Sapos “evriday” iumi tingim nomoa olketa problem blo iumi bae iumi no hapi. (Proverbs 15:15, NW) Bible sei, “showimaot iufala thankiu.” (Colossae 3:15) Tinghae nomata lo olketa smol samting lo laef. Olsem example, wanfala naes sunset, naes wind, and smile blo samwan wea iu lovem. Olketa samting hia savve mekem iumi enjoyim laef.

Helpem narawan. Nomata iumi sik, taem iumi “givim samting [iumi] barava hapi winim man wea kasem samting.” (Acts 20:35) Taem olketa narawan tinghae lo samting wea iumi duim, iumi bae hapi and no tingim tumas olketa problem blo iumi. Iumi savve hapi lo laef blo iumi taem iumi helpem olketa narawan.

Advaes lo Bible: “Luksavve long olketa samting wea barava important.”—Philippi 1:10.

Olketa hasband and waef wea no spendem taem tugeta bae spoelem wei wea olketa fren gud. Olketa shud ting lo marit blo olketa olsem samting wea barava important lo laef.

Duim olketa samting tugeta. Hem gud for hasband and waef plan for duim olketa samting tugeta. Bible sei: “Wei wea tufala pipol save waka tugeta hemi barava gud tumas.” (Eklesiastes 4:9) Tufala savve kuki, exercise, relax, drink tea tugeta, and duim nara samting tugeta.

Showim iu lovem partner blo iu. Bible talem hasband and waef for lovem and respectim each other. (Ephesus 5:28, 33) For smile, hagem, and givim smol present lo each other datwan savve strongim marit. Hasband and waef bae no enitaem tingting for duim sex witim eni narawan.—Hebrew 13:4.