OLKETA toktok hia blo King Solomon, storyim feeling blo pipol. Maet from laef hem short and iumi no savve misstim dae, for staka handred year pipol barava laek for laef longtaem. Start from bifor kam, pipol garem olketa kastom story wea showimaot for staka thousand year pipol barava lukaotem eni wei for laef longtaem.

Olsem example, Gilgamesh, hem wanfala king lo Sumer. Hem garem staka kastom story abaotem laef blo hem. Wanfala story hia nem blo hem Epic of Gilgamesh. Disfala story hem abaotem hao hem putim laef blo hem lo danger for go lukaotem hao for misstim dae. Hem no savve faendem and hem dae.

Lo mek-foa century B.C.E., samfala man lo China trae for mixim kastom medicine wea olketa sei bae mekem man savve laef longtaem. Olketa mekem wanfala drink wea olketa mixim mercury witim arsenic. Luk olsem diswan nao killim dae samfala king lo China. Lo Europe bifor, samfala man trae for mekem gold kamap samting wea man savve swallowim bikos olketa tingse samting wea mekem gold stap for longtaem savve mekem man for laef longtaem tu.

Distaem samfala savveman saed lo body blo man trae for faendemaot why nao olketa man kamap olo. Samting olketa savveman hia trae for faendem showimaot pipol distaem no laek for kamap olo and dae. Bat wanem nao olketa savveman hia faendem?

Olketa scientist wea studyim olketa cell lo body blo man, talem winim 300 difren idea for minim why iumi kamap olo and dae. No longtaem go nomoa, olketa scientist faendem wei for mekem olketa cell blo animal and man for no kamap olo. From diswan, samfala rich pipol givim selen lo olketa scientist for faendemaot why nao iumi dae. Wat nao olketa duim?

Trae for mekem man laef longtaem. Samfala scientist sei iumi kamap olo from samting wea happen lo olketa telomere, wea diswan nao olketa end part blo olketa chromosome. Olketa telomere nao protectim story abaotem man insaed olketa cell taem olketa divaed. Bat taem olketa cell divaed olketa telomere kamap short. Gogo, taem olketa cell stop for divaed, iumi start for olo.

Elizabeth Blackburn, wea hem winim prize lo 2009 for waka blo hem saed lo science, witim  samfala narawan, faendem wanfala enzyme wea mekem olketa telomere for no kwiktaem short, and diswan mekem olketa cell for no kwiktaem kamap olo tu. Bat, report blo olketa talem tu dat olketa telomere ‘no wanfala magic samting wea savve mekem man laef longtaem.’

Wei for mekem change insaed olketa cell hem nara wei for trae stopem wei for kamap olo. Taem olketa cell lo body kamap olo and no savve divaed moa, datwan savve kosim pain lo olketa join lo body and olketa nara sik. No longtaem go nomoa samfala scientist lo France mekem change insaed samfala cell wea olketa tekem from olketa barava olo pipol. Leader blo datfala team, Professor Jean-Marc Lemaître, hem sei samting wea olketa duim hem showim olketa scientist savve stopem wei wea olketa cell savve kamap olo.

Staka scientist talem hao nomata enikaen treatment stap for mekem man no kamap olo, olketa treatment hia no savve mekem man for laef longtaem go moa. Hem tru, start lo mek-19 century kasem distaem, pipol gohed for laef longtaem. Diswan from pipol stap healthy, staka medicine stap for helpem pipol no sik, and olketa nara medicine stap for finisim samfala sik. Samfala scientist luksavve pipol distaem bae no savve laef winim 70 or 80 years.

Samting olsem 3,500 year go finis, Moses, wanfala man wea raetem wanfala buk lo Bible hem sei: “Laef blong mifala save kasem seventi yia nomoa, o sapos bodi blong mifala hemi strong bae mifala save kasem eiti yia. Nomata olsem, plande trabol an sore nomoa save kasem mifala. Ya, no long taem nomoa mifala dae nao.” (Sams 90:10) Nomata olketa man trae for duim enikaen samting for mekem iumi gohed laef longtaem, samting wea Moses talem hem tru.

Bat samfala animal lo sea olsem red sea urchin and wanfala type quahog clam savve laef for winim 200 year and olketa tree olsem giant sequoia savve laef for tu-thri thousand year. Taem iumi markem laef blo iumi witim olketa samting hia, diswan mekem iumi askem disfala kwestin, ‘Waswe, laef hem for 70 or 80 year nomoa?