LAEF wea iumi garem distaem hem difren from plan blo God. Earth hem shud fulap witim pipol wea laek for stap anda lo God, willing for obeyim olketa law blo hem, and showimaot olketa naesfala wei blo hem. God laekem olketa for waka gud tugeta taem olketa lukaftarem famili blo olketa, lanem olketa niu samting, and mekem full earth for paradaes.

• “Hemi finisim olketa faet long evriples long wol.”—Sams 46:9.

• “Taem wea iu markem . . . for finisim olketa wea spoelem earth.” —Revelation 11:18.

• “No eniwan . . . bae hemi talem dat hemi sik.”—Aesaea 33:24.

• “Olketa samting wea [pipol] seleva i wakahad long hem, bae olketa seleva tu save yusim an hapi long hem.” —Aesaea 65:22.

Hao nao bae olketa profesi hia kamap tru? God markem Son blo hem, Jesus, for King ovarem earth lo wanfala perfect gavman wea bae rul from heven. Bible kolem datfala gavman, Kingdom blo God. (Daniel 2:44) Bible sei olsem abaotem Jesus: “God bae mekem hem King.”—Luke 1:32, 33.

Taem Jesus stap lo earth, hem duim staka mirakol wea showimaot taem hem King, laef blo iumi bae gud moa winim distaem.

• Hem healim enikaen sik, so hem bae finisim evri sik wea kasem pipol. —Matthew 9:35.

• Hem mekem sea for stap kwaet, so bae hem protectim pipol from olketa samting blo nature.—Mark 4:36-39.

• Hem feedim staka thousand pipol, so hem bae provaedem staka kaikai for pipol.—Mark 6:41-44.

• Hem mekem wata for kamap wine lo wanfala wedding, so hem bae helpem pipol for enjoyim laef.—John 2:7-11.

Wanem nao iu savve duim for kasem laef wea God promisim for olketa wea lovem hem? Iu mas followim wanfala “road.” Bible sei road hia lead go for laef olowe, and samfala pipol nomoa faendem.—Matthew 7:14.

Wanem nao datfala road? God sei: “Mi nao [Jehovah], an mi nao God blong yufala. Mi nao mi tisim yufala mekem yufala kamap gud. An mi lidim yufala long wei wea yufala mas falom.” (Aesaea 48:17) Sapos iu followim disfala advaes bae iu garem gudfala laef.

Jesus sei: “Mi nao road, mi nao truth, and mi nao laef.” (John 14:6) Sapos iumi obeyim olketa tru teaching blo Jesus and followim example blo  hem, datwan savve mekem iumi fren gud witim God and garem gudfala laef.

Hao nao bae iu luksavve lo datfala road? Staka religion stap, bat Jesus sei: “No evriwan wea sei long mi, ‘Lord, Lord,’ bae go insaed long Kingdom bilong God bat man wea duim wanem Dadi bilong mi long heven laekem nao, bae go insaed.” (Matthew 7:21) Hem sei tu: “Iufala bae luksavve long olketa hia from samting wea olketa duim.” (Matthew 7:16) Bible savve helpem iu for luksavve lo tru religion.—John 17:17.

Wanem nao iu savve duim for followim datfala road? Iu mas lane abaotem God wea givim laef lo evriwan: Hu nao hem? Hu nao nem blo hem? Hem wanem kaen God? Wanem nao hem duim for iumi? Wanem nao hem laekem iumi for duim? *

God hem laekem iumi olketa man for no waka, kaikai, plei, and garem famili nomoa. Iumi savve lane abaotem hem and fren gud witim hem. Taem iumi duim will blo hem iumi showim iumi lovem hem. Jesus sei: “For olketa kasem laef olowe, olketa mas lane abaotem iu, wea iu nomoa trufala God.”—John 17:3.

Taem iumi savve wanem God laekem iumi for duim, iumi mas changem samfala samting lo laef blo iumi. Maet datwan hem no isi. Bat taem iumi wakabaot followim datfala road bae iumi garem gudfala laef. For kasem ansa for samfala kwestin wea iu garem abaotem God, Olketa Jehovah’s Witness savve studyim Bible witim iu lo taem and ples wea fitim iu. Iu savve go online and contactim mifala lo www.pr418.com.