Why Nao Iumi Olo and Dae?
HEM no plan blo God for olketa man dae. God wakem first parents blo iumi, Adam and Eve, witim perfect body and tingting wea minim tufala shud laef kam kasem distaem. Diswan showaot klia from samting wea Jehovah talem lo Adam abaotem wanfala tree wea grow lo garden blo Eden.
God talem Adam: “Sapos yu kaikaim frut blong [datfala tree], bae yu dae nao long sem de.” (Jenesis 2:17) Sapos God wakem Adam for olo and dae, God bae no talem disfala toktok lo hem. Adam savve sapos hem no kaikaim datfala frut bae hem laef olowe.
HEM NO PLAN BLO GOD FOR OLKETA MAN DAE
Adam and Eve garem staka nara frut tree lo garden wea tufala savve kaikaim and gohed laef, no just frut blo datfala tree wea God tambuim. (Jenesis 2:9) Sapos tufala no kaikaim frut blo datfala tree, tufala showimaot tufala obeyim God wea givim laef lo tufala. And datwan showimaot tu, God nomoa savve talem olketa wanem for duim.
WHY NAO ADAM AND EVE DAE?
For minim why nao Adam and Eve dae, iumi need for lukluk gud lo wanfala story wea iumi tu insaed. Satan iusim wanfala snek for talem barava nogud laea. Bible hem sei: “Nao long evrisamting wea [Jehovah] God hemi mekem, snek nao hemi wanfala long olketa wea hemi kleva tumas fo mekem trik. Nao wanfala de, snek ya hemi kam an hemi askem woman ya olsem, ‘Waswe. Hemi tru wea God hemi bin talem yutufala fo no kaikaim frut blong evri tri long gaden ya?’”—Jenesis 3:1.
Eve hem sei: “Mitufala save kaikaim frut blong olketa tri long ples ya, bat wanfala nomoa wea hemi stap long midol long ples ya . . . God hemi stopem mitufala fo no kaikaim o tasim frut blong hem . . . Sapos mitufala brekem tambu ya, bae mitufala dae.” Then snek hia sei: “Yutufala no save dae. Hemi talem olsem bikos hemi save finis sapos yutufala kaikaim frut ya, bae ae blong yutufala i open nao, an bae yutufala kamap olsem hem, wea bae yutufala save long olketa wei wea i nogud an olketa wei wea i gud.” Hem olsem Satan sei Jehovah hem laea lo Adam and Eve and stopem gud samting from tufala.—Jenesis 3:2-5.
Eve bilivim samting wea hem herem. Hem lukluk strong lo datfala tree. Olketa frut blo hem luk naes, and hem barava laekem. Eve tekem samfala frut and kaikaim. Bible sei: “An hemi givim tu fo hasban blong hem, an hem tu hemi kaikaim.”—Jenesis 3:6.
God talem Adam: “Sapos yu kaikaim frut blong hem, bae yu dae nao long sem de.”—JENESIS 2:17
Taem Jehovah lukim olketa pikinini wea hem lovem min for disobeyim hem, diswan mas mekem hem barava sorre tumas! Wanem nao hem duim? Jehovah sei lo Adam: “Bae yu . . . gobaek moa long graon ya wea mi bin wakem yu long hem. Mi bin wakem yu long graon ya, an bae yu gobaek moa long hem.” (Jenesis 3:17-19) Gogo Adam hem dae taem hem 930 years. (Jenesis 5:5) Adam no go lo heven and hem no gohed laef lo eni ples blo olketa spirit. Hem no laef bifor Jehovah wakem hem from dust lo graon. So taem hem dae, hem go bak lo graon wea Jehovah iusim for wakem hem. Hem no laef nao. Diswan hem sorre samting.
WHY NAO IUMI NO PERFECT?
Bikos Adam and Eve min for disobey, tufala lusim wei for perfect and chance for laef olowe. Body blo tufala start for change, tufala no perfect and sin. Bat wei wea tufala disobey no spoelem tufala seleva nomoa. Tufala pasim sin lo evri pikinini blo tufala. Rome 5:12 sei: “Sin hem kasem evriwan long world bikos long wanfala man [Adam] nomoa. From olketa sin, olketa dae, dastawe evriwan dae bikos evriwan sin.”
Bible sei sin and dae hem olsem wanfala “kaleko wea kavarem evri pipol” and “wea trapim evri nation.” (Isaiah 25:7, NW) Diswan minim no eniwan savve ranawe from sin and dae. Olsem Bible talem, “evriwan dae bikos long Adam.” (1 Corinth 15:22) Aposol Paul hem askem disfala kwestin: “Hu nao bae sevem mi from disfala body wea bae mekem mi dae nomoa?” Waswe, eniwan savve duim diswan?—Rome 7:24.
