Creator wea Lovem Iumi Hem Tingim Iumi
1. CREATOR BLO IUMI MEKEM SUN HEM SHAEN
Tingim sapos no eni sun, laef lo earth bae hao? Sun givim energy lo olketa tree mekem olketa garem leaf, flaoa, frut, nat, and seed. Sun mekem tree tu for kasem wata from graon thru lo rut blo hem and wata hia go ap lo olketa leaf, then hem change olsem smoke and go ap lo air.
2. CREATOR BLO IUMI MEKEM HEM RAIN
Rain hem nambawan present from God wea mekem kaikai for grow lo earth for iumi kaikaim. Hem givim rain for iumi and mekem garden blo iumi barava grow gud and givim staka kaikai wea mekem iumi hapi.
3. CREATOR BLO IUMI PROVAEDEM KAIKAI AND KALEKO
Staka dadi savve wari abaotem wei for provaedem inaf kaikai and kaleko for famili. Bible sei: “Lukluk gud long olketa bird. Olketa no wakem garden and harvestim kaikai. Olketa no keepim kaikai long eni foodsafe tu. Nomata olsem, Dadi bilong iufala long heven feedim olketa. Bat iufala important winim olketa bird!”—Matthew 6:25, 26.
“Lukluk gud long hao olketa flaoa long bush grow. . . . Iu savve, nomata olketa barava naesfala kaleko bilong [King] Solomon bat no luk naes olsem olketa flaoa hia. So sapos God hem givim kaleko long olketa flaoa wea stap long bush . . . , hao, iufala tingse hem bae givim nomoa kaleko long olketa flaoa and no long iufala?”—Matthew 6:28-30.
From God savve provaedem kaikai and kaleko for iumi, bae hem savve givim iumi tu olketa nara samting wea iumi needim. Sapos iumi duim wanem God laekem, bae hem blessim hard waka blo iumi for plantim kaikai or helpem iumi for faendem waka mekem iumi garem selen for peim need blo iumi.—Matthew 6:32, 33.
Tru nao, iumi garem olketa gud reason for lovem God taem iumi ting raonem sun, rain, olketa bird, and olketa flaoa. Lo next article bae hem storyim wanem Creator blo iumi iusim for story witim iumi olketa man.