Samfala pipol laek for savve sapos message blo God lo Bible hem change or nomoa. Profet Isaiah sei toktok blo God ‘stap for olowe.’ (Aesaea 40:8) Hao nao iumi savve sure message blo God abaotem olketa promis blo hem no change?

God garem paoa for mek sure message blo hem no change and no eni samting spoelem. Lo bifor, taem olketa man copyim Bible olketa kaontem each leta for mek sure datfala copy hem stret, olketa no addim, changem, or aotem eni samting insaed. Nomata olsem, iumi olketa man no perfect, so samfala wea copyim Bible mekem samfala mistek tu.

Olketa Holy Raeting garem staka thousand copy blo olketa old manuscript. Sapos wanfala copy hem difren lelebet, for comparem datfala copy witim olketa nara copy bae mekem hem isi for luksavve lo mistek. For savve moa, lukim disfala article “Has the Bible Been Changed or Tampered With?” lo jw.org.

Olsem example, lo 1947, samfala lo tribe blo olketa Arab faendem olketa old document wea olketa kolem Dead Sea Scroll lo olketa cave klosap lo Dead Sea. Olketa oldfala raeting hia garem samfala part blo olketa Holy Raeting wea date blo hem winim 2,000 year go finis. Taem olketa savveman comparem olketa old manuscript hia witim olketa Holy Raeting wea iumi garem distaem, wanem nao olketa faendaot?

Taem olketa savveman lukluk gud lo olketa old manuscript, olketa faendaot message blo God wea stap lo Bible distaem hem semsem witim olketa Holy Raeting lo firstaem. * Iumi savve sure God hem mek sure olketa Holy Raeting wea iumi garem distaem hem no change.

So, taem iumi readim message blo God lo Bible iumi sure hem stret and iumi savve barava trustim. Tingim datwan, then bae iumi storyim lo next article wanem iumi savve lanem abaotem God from olketa profet blo hem.