Staka pipol tingse olketa wea garem hae education and rich nao savve garem gud laef. Olketa sei taem man skul lo university, bae hem savve helpem company wea hem waka for hem, famili, and pipol lo community. Maet olketa tingse hae education bae mekem man for garem waka wea hem kasem big pei and olketa wea garem staka selen bae hapi.

Tingim samting wea Zhang Chen, from China hem talem. Hem sei, “Lo tingting blo mi, hem important for garem university degree mekem mi garem gud laef and waka wea garem big pei, and datwan bae mekem mi hapi.”

For garem gud laef, staka laek for go skul lo olketa famous university, maet lo nara kantri. Staka savve duim diswan bat bikos lo COVID-19, pipol no savve travel lo nara kantri. Wanfala report lo 2012 from Organisation for Economic Co-operation and Development sei: “Fifti-tu percent lo olketa student wea skul lo nara kantri hem olketa wea kam from Asia.”

Olketa parents mas waka hard for kasem selen mekem pikinini blo olketa savve go skul lo university lo nara kantri. Qixiang, from Taiwan sei: “Parents blo mi no garem staka selen, bat tufala sendem mifala fofala pikinini for go skul lo college lo United States.” Olsem olketa nara parents, famili blo hem mas kaonem big selen for peim skul fee.

Education savve helpem man, bat staka taem man no savve kasem wat hem expectim from education. For example, bihaen staka year wea olketa skul and kaonem staka selen for peim skul fee, olketa no faendem waka wea olketa laekem. Rachel Mui, wanfala journalist blo Singapore Business Times sei: “Staka wea graduate from university no garem waka.” Jianjie, wanfala man wea stap lo Taiwan wea garem tu-thri university degree sei: “Staka no savve faendem waka wea olketa skulim so olketa duim difren waka nomoa.”

Olketa wea duim waka wea olketa kasem degree for hem maet gogo no kasem nomoa aim blo olketa. Niran wea finis skul kam lo university lo Europe, kam bak lo Thailand and duim waka wea hem skul for hem. Hem sei: “Degree wea mi kasem helpem mi for duim waka wea garem big pei. Bat for kasem big pei, mi mas waka hard and ovataem tu. Gogo, company lay off lo staka wakaman and mi tu insaed. So mi luksavve man no savve waka olowe for wanfala company.”

Nomata pipol wea rich and luk olsem olketa garem gud laef, olketa tu garem problem lo famili, sik, and wari abaotem selen. Katsutoshi, from Japan sei, “Mi rich, bat mi no hapi bikos olketa narawan jealous lo mi and treatim mi nogud.” Lam, wanfala woman wea stap lo Vietnam sei, “Staka pipol waka hard for kasem staka selen bikos olketa tingse datwan bae helpem olketa for garem gud laef, bat staka taem olketa wari, gogo olketa sik, and depress.”

Olsem Franklin, staka narawan tu luksavve wanfala samting stap for duim wea important winim hae education and staka selen. So olketa no waka hard for kasem staka selen, bat olketa tingse bae olketa garem gud laef if olketa duim gud samting for pipol. Hao, datwan bae mekem olketa for garem gud laef? Next article bae storyim datwan.