Hu Nao Savve Helpem Iu for Garem Gud Laef?
Staka pipol tingse paoa blo olketa samting wea iumi no savve lukim nao kontrolem laef blo olketa. Dastawe olketa duim samfala samting wea olketa tingse bae mekem olketa for garem gud laef. Bae iumi storyim samfala samting hia.
WANEM STAKA PIPOL BILIVIM
ASTROLOGY: Samfala pipol bilivim hao position blo olketa star lo taem wea samwan born nao bae showim wat kaen future bae hem garem. So olketa go lo pipol wea bilivim astrology, or olketa horoscope, for talem future blo olketa and for helpem olketa for mekem olketa disison.
FENG SHUI: Olketa narawan bilivim hao olketa designim haos blo olketa savve helpem olketa for hapi. Lo Wing, * wea stap lo Hong Kong sei, “Wanfala man wea savve gud lo feng shui sei, if mi putim wanfala spesol crystal lo wanfala ples insaed stoa blo mi, mi savve kasem staka selen.”
WORSHIPIM OLKETA ANCESTOR: Olketa narawan bilivim olketa mas worshipim olketa ancestor, mekem olketa savve kasem blessing and protection from hem. Van, wea stap lo Vietnam sei, “Mi bilivim hao taem mi worshipim olketa ancestor, bae mi and olketa pikinini blo mi garem gud laef distaem and gud future tu.”
REINCARNATION: Staka bilivim bihaen man dae, hem born moa olsem nara difren samting and diswan hem happen staka taem. Olketa sei gud or nogud samting wea man kasem distaem hem from wanem hem duim bifor.
Staka pipol sei olketa no really bilivim olketa samting hia, bat olketa still duim palm reading, horoscope, Ouija® board, tarot card, and olketa nara samting olsem. Olketa tingse maet datwan savve mekem olketa for savve lo future blo olketa.
HAO, OLKETA SAMTING HIA HELPEM PIPOL?
Hao, olketa wea bilivim olketa teaching hia and followim, olketa hapi and garem gud laef?
Tingim experience blo Hào, wea stap lo Vietnam. Hem bilivim astrology, feng shui, and for worshipim olketa ancestor bae helpem hem. Hao, datwan mekem hem hapi? Hào sei, “Bisnis blo mi brekdaon, mi garem big kaon, famili problem, and mi stress tumas.”
Qiuming, from Taiwan tu, bilivim astrology, reincarnation, fate (God disaedem finis future blo man), feng shui, and for worshipim olketa ancestor. Bihaen hem ting raonem olketa biliv hia, hem sei: “Mi luksavve olketa teaching and kastom hia hem againstim each other and hem mekem man konfius. Mi luksavve pipol wea biliv lo astrology, staka taem wanem olketa talem hem no stret. And disfala reincarnation teaching hem no mek sense. Hao nao man savve change and duim gud samting lo nara laef blo hem if hem no tingim eniting lo laef blo hem bifor?”
“Mi luksavve olketa teaching and kastom hia hem againstim each other and hem mekem man konfius.”—QIUMING, TAIWAN
Hào, Qiuming, and staka narawan luksavve fate, astrology, for worshipim olketa ancestor, or reincarnation no savve helpem iumi for garem gud laef. Hao, datwan minim iumi no savve duim eniting nao for garem gud laef?
Staka pipol tingse for garem gud laef, man mas garem hae education and staka selen. Hao, olketa wea duim datwan kasem eni gud samting?
^ par. 5 Lo disfala article and lo olketa nara article, mifala changem samfala nem.
^ par. 16 Disfala toktok hem stap lo Holy Bible lo Galatia 6:7. Pipol lo Asia garem saying wea klosap semsem wea sei iu plantim melon, bae iu harvestim melon. Iu plantim bean, bae iu harvestim bean.
Iu Laek Lukim Nara Samting?
WASTAOA
Astrology and Pipol wea Sei Olketa Savve Long Future—Iumi Fit for Trustim?
Waswe, iu fit for trustim olketa samting hia wea pipol bilivim hem savve helpem man for savve long future?
WASTAOA
Wanem Bible Teachim Abaotem Laef and Dae
Waswe, eni part long iumi hem gohed for laef bihaen iumi dae? Waswe, iumi garem soul wea no savve dae? Olketa wea dae go long wea?
