WASWE, iu Christian? Winim tu billion pipol sei olketa Christian. Diswan minim wanfala long evri thrifala pipol long earth sei olketa Christian. Distaem plande thousand religion stap wea sei olketa Christian, bat wanem olketa bilivim and tingting bilong olketa no semsem. So maet samting wea iu bilivim hem difren from wanem olketa nara Christian bilivim. Waswe, datwan hem gud nomoa? Sapos iu laek for followim wanem Bible talem, hem important for mek sure samting wea iu bilivim hem tru.

Olketa firstfala disaepol bilong Jesus Christ kasem datfala nem “Christian.” (Acts 11:26) Long datfala taem, wanfala grup nomoa olketa Christian. Olketa Christian followim olketa teaching and instruction bilong Jesus Christ. Waswe long religion bilong iu? Waswe, iu tingse religion bilong iu teachim sem samting wea Christ teachim and wea olketa firstfala disaepol bilivim? Hao nao bae iu faendaot? Wanfala wei nomoa stap. Hem nao for comparem wanem religion bilong iu teachim witim olketa teaching bilong Bible.

 Tingim diswan: Jesus Christ barava tinghae long olketa Holy Raeting and bilivim datwan nao toktok bilong God. Hem no acceptim olketa wea mekhae long kastom bilong man and go raonem olketa teaching bilong Bible. (Mark 7:9-13) So iumi savve samting wea olketa tru disaepol bilong Jesus bilivim mas kam from Bible. Evri Christian shud ting raonem disfala kwestin: “Waswe, samting wea religion bilong mi teachim hem kam from Bible?” For faendaot, waswe, iu willing for comparem wanem religion bilong iu teachim witim Bible?

Jesus sei iumi mas worshipim God followim samting wea tru, and olketa samting wea tru hem stap insaed long Bible. (John 4:24; 17:17) And aposol Paul sei for iumi sev, iumi mas garem “stretfala savve abaotem olketa tru teaching.” (1 Timothy 2:4) So for iumi kasem laef, samting wea iumi bilivim mas followim olketa tru teaching long Bible!

Mifala encouragem iu for readim sixfala kwestin long daon and ansa wea kam from Bible. Readim olketa scripture long Bible bilong iu, and ting raonem olketa ansa. Then ting raonem disfala kwestin: “Waswe, samting wea religion bilong mi teachim hem semsem witim samting wea Bible talem?”

Olketa kwestin long daon savve helpem iu for luksavve long samfala important samting. Waswe, iu willing for comparem olketa nara teaching bilong religion bilong iu witim samting wea Bible talem? Olketa Jehovah’s Witness bae hapi for helpem iu for lukluk gud long olketa tru teaching long Bible. Iu savve askem olketa Witness for studyim Bible witim iu, or iu savve go long website bilong mifala, jw.org.