Bible sei tol bilong Goliath hem “sixfala cubit and wanfala span.” (1 Samuel 17:4) Cubit hem 44.5 centimeter, and span hem 22.2 centimeter. Datwan minim Goliath hem samting olsem 2.9 meter tol. Samfala pipol sei hard for Goliath hem tol olsem. Bat tingim, wanfala man wea born long 1918 hem 2.7 meter tol. Goliath hem lelebet tol winim hem nomoa. Goliath kam from tribe bilong Rephaim. Staka man long datfala tribe olketa barava tol. Wanfala man wea stap long Egypt long mek-13 century B.C.E raet abaotem olketa soldia long Canaan and hem sei olketa soldia hia winim 2.4 meter tol. So olketa samting hia helpem iumi for trustim wanem Bible talem abaotem tol bilong Goliath.

Samfala savveman sei story abaotem King David hem olsem kastom story nomoa. Bat distaem staka pruv stap wea showimaot David hem really stap bifor. Olketa savveman wea digdig long graon faendem wanfala ston wea raeting stap long hem, wea storyim “haos bilong David.” And tu, Jesus Christ story abaotem David. (Matthew 12:3; 22:43-45) Buk bilong Matthew and Luke storyim hao Jesus kam from laen bilong David and datwan hem wanfala pruv for showim Jesus hem datfala Messiah. (Matthew 1:6-16; Luke 3:23-31) Olketa samting hia pruvim David hem really stap bifor.

Bible hem sei David killim dae Goliath long Valley long Elah. And tu, Bible sei long datfala taem olketa Philistine camp long wanfala hill saed long datfala valley, wea stap midolwan long tufala taon, Socoh and Azekah. Olketa Israelite camp long nara hill wea stap long narasaed bilong datfala valley. Waswe, olketa ples hia really stap?

Wanfala man wea go visit long datfala area hem sei: “Man wea savve gud long area hem tekem mifala go long Valley long Elah. Mifala wakabaot go ap long wanfala hill. Taem mifala luk go daon long valley, hem sei for mifala readim 1 Samuel 17:1-3. Then hem point go long narasaed long valley and hem sei: ‘Long left saed bae iu lukim ples wea taon bilong Socoh stap bifor.’ Then hem sei, ‘Long raet saed, iu savve lukim ples wea taon bilong Azekah stap bifor. Olketa Philistine camp long wanfala hill midolwan long tufala taon hia. So distaem maet iumi standap long ples wea olketa Israelite camp.’ Mi tingim maet Saul and David standap long barava ples wea mi standap long hem. Then mifala wakabaot go daon, and taem mifala kasem valley mifala akrosim wanfala stream wea no ran, bat staka ston hem stap long there. Mi tingim taem David pikim faevfala ston, and hem iusim wanfala ston for killim dae Goliath.” Disfala man tinghae long wei wea Bible hem barava stret taem hem storyim olketa samting hia.

Iumi savve trustim wanem Bible talem abaotem David and Goliath. David and olketa ples wea Bible storyim really stap bifor. Bible hem toktok bilong God, so olketa samting wea Bible storyim hem kam from God, wea “no savve laea.”—Titus 1:2; 2 Timothy 3:16.