KAVA SUBJECT | OLKETA VISION ABAOTEM HEVEN
Tingting Bilong Pipol Abaotem Olketa Long Heven
Waswe, enitaem iu ting abaotem heven, and olketa wea stap long there? Staka pipol tu ting abaotem datwan. Winim staka thousand year, pipol garem olketa difren tingting abaotem heven. Samfala pipol sei olketa laen dadi stap long there and man mas worshipim olketa. Olketa narawan tingse heven hem ples for hapi, wea staka angel and gudfala pipol stap long hem. Samfala moa olketa tingse staka million god stap long heven.
Staka pipol sei hard for iumi savve long eni samting abaotem heven, bikos no eniwan kam daon from heven mekem hem savve storyim long iumi. Bat datwan hem no tru. Bifor Jesus Christ kam long earth, hem wanfala spirit wea stap long heven. Hem sei olsem long olketa bigman bilong religion long first century: “Mi kam daon from heven, no for duim samting wea miseleva laekem bat for duim samting wea Dadi, wea hem sendem mi kam, laekem mi for duim.” Dastawe Jesus sei olsem long olketa aposol bilong hem: “Haos bilong Dadi bilong mi garem staka spes.”—John 6:38; 14:2.
God nao hem Dadi bilong Jesus. Nem bilong hem Jehovah and hem stap long heven. (Psalm 83:18) So Jehovah God and Jesus Christ nomoa savve explainim heven long iumi. Tufala showim staka samting abaotem heven long samfala faithful wan insaed long olketa vision.
Nextfala article bae storyim samfala Bible scripture abaotem olketa samting wea olketa man lukim long samfala vision. Taem iumi storyim olketa vision abaotem olketa samting long heven, hem gud for tingim olketa samting hia iumi no savve tasim or lukim. Nomata olsem, taem God iusim olketa vision for storyim olketa samting long heven, hem iusim olketa samting wea hem isi for iumi savve minim. Olketa vision hia bae helpem iu for savve long olketa wea stap long heven.
