1. Wanem nao hem minim for obeyim God and olketa gavman bilong man?

BIBLE sei iumi mas obeyim olketa gavman bilong man, bat Bible sei tu iumi mas obeyim God evritaem. (Acts 5:29; Titus 3:1) Hao nao iumi savve duim tufala samting hia? Jesus storyim wanfala principle wea helpem iumi for savve hu nao iumi shud obeyim. Jesus sei iumi shud “givim go bak long King samting wea hem bilong King, and givim go bak long God samting wea hem bilong God.” ^[1] (Matt. 22:21) Iumi “givim go bak long King samting wea hem bilong King” taem iumi obeyim olketa law bilong gavman, respectim olketa bigman long gavman, and peim tax wea gavman askem. (Rome 13:7) Nomata olsem, sapos gavman askem iumi for duim samting wea bae brekem law bilong God, bae iumi explainim gud long olketa bae iumi no duim datwan.

2. Hao nao iumi showimaot iumi no teksaed long olketa samting saed long politik?

² Wanfala wei wea iumi savve “givim go bak long God samting wea hem bilong God,” hem nao for no teksaed long olketa samting saed long politik. (Isa. 2:4) From Jehovah letem olketa  gavman bilong man for rul, iumi no againstim olketa. Iumi no join insaed long eni samting wea mekhae long kantri tu. (Rome 13:1, 2) Iumi no trae for aotem eni gavman or trae for switim olketa bigman long gavman for duim wanem iumi laekem, and iumi no vote long election or joinim politik.

3. Why nao iumi mas no teksaed?

³ Bible storyim why God no laekem iumi for teksaed. Wanfala reason nao iumi followim example bilong Jesus, wea hem “no olsem pipol long world.” Hem no teksaed long politik or join insaed olketa war. (John 6:15; 17:16) Nara reason hem bikos iumi sapotim Kingdom bilong God. From iumi no sapotim olketa gavman bilong man, iumi no hol bak for sei Kingdom bilong God nomoa bae stretem evri problem bilong olketa man. Olketa false religion nao join insaed politik, and diswan hem mekem pipol no stap gud tugeta. Bat from iumi no teksaed, iumi wan mind witim olketa brata and sista bilong iumi evriwea long world.—1 Pet. 2:17.

4. (a) Why nao maet bae iumi kasem test for no teksaed long politik long future? (b) Why nao iumi mas redyim iumiseleva distaem mekem iumi no teksaed?

⁴ Maet long ples wea iumi stap, pipol no forcem iumi for teksaed long politik. Bat taem disfala world bilong Satan hem gogo for finis, maet bae iumi kasem test long diswan. World distaem hem fulap witim pipol wea “no willing for agree” and “bighed,” wea mekem pipol divaed, and diswan bae kamap moa worse. (2 Tim. 3:3, 4) Long samfala kantri, olketa brata bilong iumi kasem test for no teksaed wea olketa no expectim, bikos samfala change kamap saed long politik. Dastawe iumi mas redyim iumiseleva distaem mekem iumi no teksaed nomata iumi kasem eni hard test long future. Distaem bae iumi storyim fofala samting wea savve helpem iumi long diswan.

5. Wanem nao tingting bilong Jehovah abaotem olketa gavman bilong man?

⁵ Firstfala samting wea savve helpem iumi for no teksaed hem for garem sem tingting olsem Jehovah abaotem olketa gavman. Hem no plan bilong Jehovah for olketa man rulim olketa seleva. (Jer. 10:23) Long tingting bilong Jehovah, evriwan long earth olketa olsem wanfala famili nomoa. Bat olketa gavman mekem pipol for divaed taem olketa sei kantri bilong olketa nao gud winim narawan. Nomata samfala gavman duim gudfala samting, olketa no savve stretem evri problem. And tu, olketa gavman bilong man againstim Kingdom bilong God wea start for rul long 1914. Klosap nao Kingdom bilong God bae finisim evri gavman long earth.—Readim Psalm 2:2, 7-9.

6. Hao nao iumi shud ting long olketa bigman long gavman?

⁶ God letem olketa gavman for rul bikos gavman savve helpem pipol long kantri for stap gud and garem peace. Bikos long diswan, iumi free for preachim gud nius long staka kantri. (Rome 13:3, 4) God sei tu for iumi prea for olketa bigman long gavman mekem iumi free for gohed worshipim Hem. (1 Tim. 2:1, 2) Taem eniwan againstim iumi, iumi savve askem olketa bigman long gavman for helpem iumi. Hem nao wanem aposol Paul duim. (Acts 25:11) Bible sei Satan nao hem kontrolem olketa gavman bilong man, bat hem no sei Satan kontrolem olketa man wanwan insaed long gavman. (Luke 4:5, 6) So iumi shud no sei Satan nao kontrolem eni bigman long gavman. Bible sei iumi shud “no tok spoelem eniwan.”—Titus 3:1, 2.

7. Wanem kaen tingting nao iumi mas stap klia long hem?

⁷ Iumi obeyim God taem iumi no teksaed  witim eni bigman long politik or eni politik party, nomata iumi maet kasem gud samting from wanem olketa duim. Samfala taem diswan hem olsem wanfala test for iumi. Olsem example, tingim sapos wanfala sekson againstim gavman wea spoelem pipol and wea maet spoelem tu Olketa Jehovah’s Witness. Hem tru iumi no joinim datfala sekson, bat waswe, maet long tingting bilong iumi samting wea datfala sekson duim hem stret and iumi laekem olketa for win for againstim gavman? (Eph. 2:2) Wei for no teksaed hem no long wanem iumi talem or duim nomoa, bat long tingting bilong iumi tu iumi mas no tingse wanfala grup hem winim narafala grup.

8. Hao nao iumi showimaot iumi gohed “lukaot” and “no duim nogud samting”?

⁸ Mek-tu samting wea savve helpem iumi for no teksaed hem for “olsem olketa snek long wei for lukaot and garem gudfala tingting,” and for “olsem olketa kurukuru long wei for no duim nogud samting.” (Readim Matthew 10:16, 17.) Iumi showimaot iumi “lukaot” taem iumi luksavve wanem nao olketa danger samting. And iumi showimaot iumi “no duim nogud samting” taem iumi no teksaed. Distaem bae iumi storyim samfala samting wea savve happen and wanem iumi savve duim for no teksaed.

9. Wanem nao iumi mas careful long hem taem iumi story witim pipol?

⁹ Wanem iumi storyim. Taem pipol start for storyim olketa samting saed long politik iumi mas careful. Olsem example, taem iumi story abaotem Kingdom long eniwan, iumi mas careful for no praisem or tok againstim idea bilong eni politik party or eni bigman long politik. Iumi no storyim plan bilong olketa man for stretem olketa problem long world, bat iumi laek for storyim Kingdom nao bae finisim evri problem long disfala world. Sapos pipol argue abaotem wanfala topic, olsem wei for man maritim man or for killim dae baby long bele, storyim long olketa wanem Bible talem and wei wea iumi traem best for followim wanem Bible talem. Sapos samwan storyim hao gavman shud changem samfala law long kantri, iumi no teksaed, and iumi no trae for forcem hem for changem tingting bilong hem.

10. Wanem nao savve helpem iumi for no teksaed long olketa story wea kamaot long nius?

¹⁰ Nius. Staka taem story wea kamaot long nius savve favorim wansaed. Diswan savve happen staka taem long olketa kantri wea gavman kontrolem nius. Sapos olketa wea reportim nius favorim wansaed, iumi mas careful for no garem sem tingting olsem olketa. Olsem example, ting raonem diswan, ‘Waswe, mi evritaem laek for herem story bilong wanfala nius reporter bikos mi agree witim wanem hem talem saed long politik.’ Iumi shud trae for lisin long olketa nius reporter wea no teksaed. And iumi evritaem laek for tingim sapos samting iumi herem hem fitim wanem Bible talem or nomoa.—2 Tim. 1:13.

11. Hao nao wei for laekem tumas material samting savve mekem hem hard for no teksaed?

¹¹ Wei for laekem tumas material samting. Sapos iumi laekem tumas selen and olketa material samting, maet bae hem hard for iumi no teksaed. Long olketa year bihaen 1970, staka Witness long Malawi lusim staka material samting wea olketa garem bikos olketa no joinim politik party. Sorre samting nao, samfala wea garem rich living no laek for lusim datwan. Wanfala sista wea nem bilong hem Ruth sei: “Samfala wea ranawe witim mifala go long nara kantri joinim politik party bihaen and go bak long hom bikos olketa no laek for stap long refugee camp.”  Bat staka wea worshipim God olketa no teksaed nomata olketa kasem hard taem saed long selen or lusim evri samting wea olketa garem.—Heb. 10:34.

12, 13. (a) Hao nao Jehovah ting long olketa man? (b) Hao nao bae iumi luksavve sapos iumi start for praod and tingse kantri bilong iumi hem winim nara kantri?

¹² Wei for praod. Hem wei bilong staka pipol for praod and tokplas abaotem kantri, tribe, culture, or taon bilong olketa. Bat hem no stret for tingse samfala pipol olketa gud winim olketa narawan. Long tingting bilong Jehovah, iumi evriwan semsem. Hem tru, hao Jehovah wakem iumi hem difren, and iumi savve hapi and tinghae long diswan. Hem no sei for iumi lusim culture bilong iumi bat long semtaem hem no laekem iumi for tingse iumi gud winim olketa narawan tu.—Rome 10:12.

¹³ Iumi shud no praod and tingse kantri bilong iumi hem winim nara kantri. Sapos iumi garem kaen feeling olsem, bae hem barava hard for iumi no teksaed. Diswan nao samting wea happen long first century. Olketa brata wea story long Hebrew languis no treatim gud olketa widow wea story long Greek languis. (Acts 6:1) Hao nao bae iumi luksavve sapos iumi start for garem kaen tingting olsem? Sapos wanfala brata or sista long nara kantri talem wanfala idea for iu followim, waswe, iu kwiktaem rejectim datwan and ting olsem, ‘Hao mifala duim diswan long hom bilong mi nao hem gud’? Sapos olsem, tingim disfala important kaonsel: “Iufala mas hambol and ting long narawan olsem hem winim iufala.”—Phil. 2:3.

14. Why nao hem important for prea long Jehovah for helpem iumi no teksaed, and wanem example long Bible nao showimaot diswan?

¹⁴ Mek-tri samting wea savve helpem iumi for no teksaed hem nao for depend long Jehovah. Prea long God for holy spirit, mekem iumi savve patient and kontrolem seleva. Olketa wei hia savve helpem iumi sapos gavman duim samting wea no stret. Askem Jehovah for wisdom for helpem iu luksavve long eni samting wea savve mekem hem hard for iu no teksaed, and askem hem for helpem iu duim datwan. (Jas. 1:5) Maet olketa putim iu long prison or duim eni nara nogud samting long iu from iu worshipim Jehovah. Sapos olsem, prea long Jehovah for helpem iu for no fraet mekem iu savve explainim long olketa why nao iu no teksaed. Jehovah bae helpem iu for gohed faithful.—Readim Acts 4:27-31.

15. Hao nao Bible savve helpem iu for no teksaed? (Lukim box “Bible Helpem Olketa for No Teksaed.”)

¹⁵ Jehovah givim Bible for helpem iumi. Ting raonem olketa scripture wea bae helpem iu for no teksaed. Trae for baeheartim olketa scripture hia, bikos olketa bae strongim iu nomata iu no garem Bible. And tu, Bible savve helpem iu for strongim faith bilong iu long hope wea iu garem for future. Disfala hope savve helpem iumi for no givap taem iumi kasem persecution. (Rome 8:25) Ting raonem olketa scripture wea storyim wanem iu luk forward long hem long niu world, and piksarem long mind bilong iu taem wea iu bae enjoyim olketa blessing hia.

16, 17. Wanem nao iumi lanem from example bilong olketa brata and sista wea no teksaed? (Lukim piksa long start bilong study.)

¹⁶ Mek-foa samting wea savve helpem iumi for no teksaed hem nao for lane from example bilong olketa wea faithful. Staka wea worshipim Jehovah bifor, olketa no fraet and olketa no tek saed from olketa mekem olketa wise disison. Tingim example  bilong Shadrach, Meshach, and Abednego wea sei olketa bae no worshipim image wea stand for gavman bilong Babylon. (Readim Daniel 3:16-18.) Example bilong olketa hia helpem staka Witness distaem for no fraet for sei olketa bae no worshipim flag bilong kantri wea olketa stap long hem. Jesus no join long politik or olketa raoa wea divaedem pipol. Hem savve gudfala example bilong hem bae helpem olketa disaepol. Hem sei: “No fraet! Mi winim world finis.”—John 16:33.

¹⁷ Staka brata and sista distaem olketa no teksaed. Samfala go long prison, pipol spoelem olketa, and samfala dae tu bikos olketa faithful long Jehovah. Example bilong olketa savve helpem iumi for no fraet and gohed faithful. Wanfala brata long Turkey sei: “Olketa killim dae wanfala young brata, wea nem bilong hem Franz Reiter, bikos hem no laek for joinim army bilong Hitler. Leta wea hem raetem long mami bilong hem long datfala naet bifor hem dae showimaot strongfala faith and trust wea hem garem long Jehovah. Mi laek for followim example bilong hem sapos mi feisim semkaen test.” ^[2]

18, 19. (a) Wanem help nao iu savve kasem from kongregeson for no teksaed? (b) Wanem nao iumi laek for duim?

¹⁸ Olketa brata and sista long kongregeson bilong iu savve helpem iu for no teksaed. Story witim olketa elder sapos iu kasem test. Olketa savve givim advaes long iu wea kam from Bible. And tu, sapos olketa brata and sista long kongregeson savve long samting wea kasem iu, olketa savve encouragem iu. Askem olketa for prea for iu. And iumi tu shud sapotim olketa narawan and prea for olketa. (Matt. 7:12) Datfala article wea garem title “Jehovah’s Witnesses Imprisoned for Their Faith—By Location” wea stap long jw.org website, long NEWSROOM > LEGAL DEVELOPMENTS, hem garem list bilong nem bilong olketa brata and sista wea stap long prison. Taem iu prea long Jehovah, talem nem bilong samfala long olketa brata and sista hia, and askem Jehovah for helpem olketa for no fraet and for gohed faithful.—Eph. 6:19, 20.

¹⁹ Taem disfala world hem gogo for finis, iumi bae no sapraes sapos olketa gavman putim hevi long iumi for teksaed. Dastawe hem important for iumi redyim iumiseleva distaem for no teksaed long disfala world wea divaed!