MINISTRY wea iumi duim hem important and hem helpem pipol. Bat staka pipol no luksavve long datwan. Olsem example, samfala pipol interest long gud nius, bat olketa no laek for studyim Bible.

Tingim Gavin, wea hem go long olketa meeting bat hem no laek studyim Bible. Hem sei: “Mi no savve gud long Bible, and mi shame for olketa narawan for savve long datwan. Mi no laekem eniwan for trikim mi, and mi no laekem eniwan for forcem mi for duim eni samting.” Wanem nao tingting bilong iu? Waswe, iu tingse hem hard nao for Gavin lanem truth? Nomoa! Tingim wei wea Bible savve helpem man. Jesus sei olsem long olketa Israelite: “Toktok bilong mi bae isisi foldaon olsem dew, and olsem smol rain wea mekem grass grow gud.” (Deut. 31:19, 30; 32:2) Iumi bae storyim samfala wei wea ministry bilong iumi savve olsem dew, mekem iumi savve helpem evri difren kaen pipol for lanem truth.—1 Tim. 2:3, 4.

Dew hem isisi foldaon. Dew hem isisi foldaon kam from skae. Toktok bilong Jehovah hem olsem dew wea “isisi foldaon,” wea minim Jehovah tingim feeling bilong pipol bilong hem and tok kaen long olketa. Iumi followim example bilong Jehovah taem iumi showimaot iumi respectim narawan long wanem hem disaedem. Iumi laekem pipol for disaed seleva for followim samting wea iumi teachim long olketa. Taem iumi respectim pipol, olketa bae lisin long wanem iumi talem, and datwan savve helpem iumi for duim gud ministry.

Dew mekem olketa plant grow gud. Iumi savve helpem pipol taem iumi ting raonem wanem olketa bae interest long hem. Olketa brata no trae for forcem Gavin for study. Wanfala brata, wea nem bilong hem Chris, ting raonem wanem hem savve duim for helpem Gavin interest for story abaotem Bible. Chris talem Gavin Bible hem garem wanfala theme, and sapos hem savve long datfala theme, datwan bae helpem hem for minim olketa samting wea hem herem long olketa meeting. Then Chris talem Gavin, olketa profesi long Bible wea kamap tru mekem hem bilivim wanem hem lanem long Bible. Datwan mekem Gavin laek for story witim Chris abaotem samfala profesi. Wanem tufala storyim encouragem Gavin, and gogo hem studyim Bible.

Dew mekem olketa plant gohed for laef. Long Israel, long taem bilong drae season, maet hem no savve rain for tu-thri month, and hem savve hot tumas. Sapos no eni dew, olketa plant savve dae. Distaem pipol thirsty long spiritual wei, olsem Jehovah talem. (Amos 8:11) Hem sei taem olketa anointed Christian and “olketa nara sheepsheep” preach abaotem Kingdom, message wea olketa talemaot hem “olsem dew wea kam from Jehovah.” (John 10:16; Mic. 5:7) Waswe, iumi luksavve message wea iumi talemaot hem olsem dew wea kam from Jehovah wea savve helpem pipol gohed for laef?

Dew hem blessing wea kam from Jehovah. (Deut. 33:13) Pipol wea followim wanem Bible talem kasem gud samting. Gavin kasem blessing from Jehovah. Taem hem studyim Bible, hem kasem ansa for evri kwestin bilong hem. No longtaem bihaen, hem dedicate and baptaes. Distaem hem and waef bilong hem, Joyce, busy long waka for preachim gud nius abaotem Kingdom.

Taem iumi lane abaotem dew, datwan savve helpem iumi for luksavve wanem iumi wanwan duim long ministry hem important. Why nao iumi sei olsem? Wanfala drop wata hem tuwetem lelebet ples nomoa. Bat dew, wea hem staka drop wata, savve tuwetem staka ples. Maet iumi tingse wanem iumi wanwan duim long ministry hem no important. Bat waka wea evriwan wea worshipim Jehovah duim long ministry, hem helpem “pipol long evri kantri” for herem gud nius. (Matt. 24:14) Waswe, pipol bae kasem gud samting from preaching waka wea iumi duim? Yes, sapos ministry wea iumi duim hem olsem dew!