1-3. (a) Wanem nao samfala Christian duim wea showimaot olketa laekem tumas for hipap tugeta? (Lukim piksa long start bilong study.) (b) Wanem nao bae iumi storyim long disfala study?

TAEM Corinna 17 year, police arrestim mami bilong hem and sendem hem for go stap long wanfala raf prison. Gogo, olketa sendem Corinna tu go long farawe ples long Siberia. Long Siberia, olketa forcem hem for waka hard long wanfala farm. Samfala taem hem mas waka nomata hem cold fogud and olketa no givim hem eni wool kaleko for keepim hem warm. Nomata olsem, Corinna and nara sista disaed strong for go long wanfala meeting.

² Corinna sei: “Long evening, mifala lusim ples wea mifala waka, and mifala wakabaot for 25 kilometer for kasem ples for go long train. Long tu klok long morning, train lusim datfala ples and mifala gogo for sixfala hour. Then mifala go aot from train and wakabaot for 10 kilometer for kasem ples for meeting.” Corinna hapi tumas for go long datfala meeting. Hem sei: “Long meeting hia, mifala studyim Wastaoa and singim olketa Kingdom song. Diswan barava encouragem mifala and strongim faith bilong  mifala.” Bihaen thrifala day, tufala sista hia go bak long farm, bat farmer no savve nomoa tufala go.

³ Pipol bilong Jehovah laekem tumas for hipap tugeta. Olsem example, olketa firstfala Christian barava laek for hipap tugeta for worshipim Jehovah and lane abaotem hem. (Acts 2:42) Masbi iu tu laek for go long olketa meeting. Nomata olsem, maet samfala taem hem no isi for iu evritaem go long olketa meeting. Maet iu mas waka for staka hour, or iu garem staka samting for duim, or iu evritaem feel taed. Wanem nao savve helpem iumi for no misstim eni meeting? ^[1] Wanem nao iumi savve duim for helpem olketa Bible study and olketa narawan for evritaem go long olketa meeting? Disfala study bae storyim thrifala reason why iumi shud evritaem go long olketa meeting: (1) Iumi kasem gud samting, (2) iumi strongim narawan, and (3) iumi mekem Jehovah hapi. ^[2]

4. Hao nao olketa meeting helpem iumi for gohed lane abaotem Jehovah?

⁴ Olketa meeting teachim iumi. Long evri meeting iumi savve lanem samting abaotem Jehovah. Olsem example, no longtaem go nomoa iumi studyim disfala buk, “Gohed Kasem Gud Samting From Love Bilong God” long Kongregeson Bible Study. Long datfala meeting, iumi storyim olketa wei bilong Jehovah and iu herem olketa naesfala koment bilong olketa brata and sista. Masbi datwan strongim wei wea iu lovem Jehovah. Long olketa meeting, iumi lanem moa samting abaotem Bible taem iumi herem olketa tok and Bible reading, and taem iumi lukim olketa demonstration. (Neh. 8:8) And evri week iumi lanem staka samting taem iumi duim Bible reading for datfala week, and herem wanem olketa narawan lanem from datfala Bible reading!

5. Hao nao olketa meeting helpem iu for followim olketa Bible principle and kamap gud long ministry?

⁵ Olketa meeting teachim iumi for followim olketa Bible principle. (1 Thess. 4:9, 10) Olsem example, Wastaoa Study barava helpem pipol bilong God. Waswe, iu tingim yet eni Wastaoa wea encouragem iu for duim moa samting long waka bilong Jehovah, for forgivim wanfala brata or sista, or wea helpem iu for talem olketa gudfala prea? And tu, meeting wea kamap long midol week savve helpem iumi for duim gud ministry bilong iumi. Iumi lane hao for preachim gud nius and teachim pipol abaotem Bible.—Matt. 28:19, 20.

6. Hao nao olketa meeting strongim and encouragem iumi?

⁶ Olketa meeting encouragem iumi. World bilong Satan savve mekem iumi wari, wikdaon, and no garem strongfala faith. Bat olketa meeting encouragem iumi and strongim iumi for gohed worshipim Jehovah. (Readim Acts 15:30-32.) Staka taem, iumi lane abaotem olketa profesi long Bible wea kamap tru. Diswan mekem iumi barava sure evri samting wea Jehovah promisim bae kamap tru. Olketa brata and sista encouragem iumi taem olketa givim tok, givim koment, and taem olketa singim olketa song for praisem Jehovah. (1 Cor. 14:26) And taem iumi story witim olketa bifor meeting hem start and bihaen long meeting, datwan encouragem iumi bikos iumi savve olketa lovem iumi.—1 Cor. 16:17, 18.

7. Why nao hem important for no misstim eni meeting?

⁷ Iumi savve kasem holy spirit bilong Jehovah long taem bilong olketa meeting. Jesus iusim holy spirit for leadim olketa kongregeson.  Jesus sei iumi shud “herem samting wea holy spirit talem long olketa kongregeson.” (Rev. 2:7) Holy spirit savve helpem iumi for no foldaon long olketa test and for no fraet for preach. Hem savve helpem iumi tu for mekem olketa gudfala disison. Dastawe iumi shud no misstim eni meeting mekem holy spirit bilong God hem helpem iumi.

8. Taem iumi go long meeting, givim koment, and singim olketa Kingdom song, hao nao datwan encouragem olketa brata and sista? (Lukim box “Hem Evritaem Feel Gud Bihaen Olketa Meeting.”)

⁸ Long olketa meeting, iumi savve duim samting for showimaot iumi lovem olketa brata and sista. Staka long kongregeson bilong iumi kasem olketa hard taem. Aposol Paul sei: “Iumi mas barava tingim narawan.” (Heb. 10:24, 25) Iumi showimaot iumi tingim olketa brata and sista taem iumi go long olketa meeting for encouragem each other. Taem iumi go long olketa meeting, iumi showimaot iumi laek for associate witim olketa brata and sista, story witim olketa, and iumi interest long olketa. Iumi encouragem olketa tu taem olketa herem iumi givim koment, and taem iumi singim olketa Kingdom song.—Col. 3:16.

9, 10. (a) Hao nao toktok bilong Jesus long John 10:16 helpem iumi for luksavve hem important for go long olketa meeting? (b) Taem iumi evritaem go long olketa meeting, hao nao iumi savve encouragem olketa brata and sista wea famili againstim olketa?

⁹ Olketa meeting helpem iumi for fren gud witim olketa brata and sista. (Readim John 10:16.) Jesus sei hem olsem wanfala man for lukaftarem sheepsheep, and olketa disaepol bilong hem olketa olsem wanfala sekson bilong olketa sheepsheep. Tingim diswan: Sapos tufala sheepsheep long wanfala hill, nara tufala sheepsheep long valley, and wanfala sheepsheep hem long nara ples, waswe, bae iumi sei faevfala sheepsheep hia insaed long wanfala sekson? Nomoa nao, bikos wanfala sekson bilong sheepsheep bae stap tugeta and followim man wea lukaftarem olketa. Olsem tu, iumi no misstim olketa meeting bikos datwan bae mekem iumi stap difren from olketa brata bilong iumi. Iumi mas hipap tugeta mekem iumi “wanfala sekson” wea “wanfala man” nao lukaftarem iumi.

¹⁰ Olketa meeting helpem iumi for wan mind witim olketa brata and sista. (Ps. 133:1) Samfala brata and sista long kongregeson famili bilong olketa againstim olketa. Bat Jesus sei bae olketa kasem famili wea lovem and lukaftarem olketa. (Mark 10:29, 30) Sapos iu go long meeting evritaem, iu savve kamap wanfala dadi, mami, brata,  or sista bilong olketa hia! Taem iumi tingim datwan, iumi laek for traem best bilong iumi for evritaem go long olketa meeting.

11. Hao nao olketa meeting helpem iumi for givim Jehovah samting wea hem fit for kasem?

¹¹ Long olketa meeting iumi givim Jehovah samting wea hem fit for kasem. Jehovah nao wakem iumi, so hem fitim for iumi talem thankiu long hem, mekhae long hem, and praisem hem. (Readim Revelation 7:12.) Iumi savve duim olketa samting hia long olketa meeting taem iumi prea long Jehovah, singim olketa Kingdom song, and story abaotem hem. Evri week iumi garem chance for worshipim Jehovah!

12. Hao nao tingting bilong Jehovah taem iumi evritaem go long olketa meeting?

¹² Jehovah wakem iumi and iumi shud obeyim hem. Hem talem iumi for evritaem hipap tugeta, especially long distaem wea end hem barava klosap. So Jehovah hem hapi taem iumi duim olsem. (1 John 3:22) Hem savve long wanem iumi duim for no misstim olketa meeting, and hem tinghae long datwan.—Heb. 6:10.

13, 14. Long wanem wei nao olketa meeting mekem iumi fren gud witim Jehovah and Jesus?

¹³ Taem iumi go long olketa meeting, iumi showim long Jehovah iumi laek fren gud witim hem and Son bilong hem. Long olketa meeting, iumi studyim Bible and iumi lanem wanem Jehovah laekem iumi for duim. (Isa. 30:20, 21) Samfala wea no worshipim Jehovah wea kam long olketa meeting, luksavve God hem leadim iumi. (1 Cor. 14:23-25) Jehovah teachim iumi long olketa meeting and holy spirit bilong hem stap witim iumi long olketa meeting. So taem iumi go long olketa meeting, iumi herem wanem Jehovah talem, iumi luksavve hem barava lovem iumi, and iumi fren gud witim hem.

¹⁴ Jesus, wea hem Hed bilong kongregeson, sei: “Taem tu or thrifala man hipap tugeta bikos long nem bilong mi, mi stap witim olketa.” (Matt. 18:20) Bible sei tu Jesus “wakabaot midolwan” long olketa kongregeson. (Rev. 1:20–2:1) Tru nao, Jehovah and Jesus stap witim iumi long olketa meeting and strongim iumi. Jehovah barava hapi taem hem lukim iu traem best bilong iu for fren gud witim hem and Son bilong hem.

15. Taem iumi go long olketa meeting, hao nao datwan showimaot iumi laek for obeyim God?

¹⁵ Taem iumi go long olketa meeting, iumi showim long Jehovah iumi sapotim rul bilong hem. Jehovah no forcem iumi for obeyim hem. (Isa. 43:23) So taem iumi obeyim hem for go long olketa meeting, iumi showim long hem iumi lovem hem and iumi sapotim rul bilong hem. (Rome 6:17) Olsem example, maet boss laekem iumi for duim ovataem and bae iumi misstim olketa meeting. Or maet gavman sei sapos iumi hipap tugeta for worshipim Jehovah, iumi mas peim fine, go long prison, or kasem nara nogud panis. Or maet samfala taem iumi no laek go long meeting bikos iumi laek for duim difren samting. Taem olketa samting hia kamap, iumiseleva mas disaedem wanem iumi bae duim. (Acts 5:29) Taem iumi obeyim Jehovah, datwan mekem hem barava hapi.—Prov. 27:11.

16, 17. (a) Wanem nao showimaot olketa firstfala Christian laek tumas for hipap tugeta? (b) Wanem nao tingting bilong Brata George Gangas abaotem olketa meeting?

¹⁶ Bihaen olketa Christian hipap tugeta long Pentecost 33 C.E., olketa savve evritaem hipap tugeta for worshipim Jehovah. Bible sei: “Olketa barava tingim narawan . . . [and] no misstim wei for hipap tugeta.”  (Heb. 10:24, 25) And olketa no stop for hipap tugeta, nomata taem gavman bilong Rome and olketa bigman long Jew religion againstim olketa. Nomata hem no isi, olketa traem best for evritaem hipap tugeta.

¹⁷ Pipol bilong Jehovah distaem tu barava tinghae long olketa meeting. George Gangas, wea hem member bilong Governing Body for winim 22 year hem sei: “Wanfala samting wea mekem mi hapi tumas hem taem mi hipap witim olketa brata. Datwan barava encouragem mi. Mi laek tumas for go early long Kingdom Hall, and mi laek for wanfala long olketa last wan for lusim Kingdom Hall. Mi hapi tumas taem mi story witim pipol bilong God. Taem mi stap witim olketa, mi feel olsem mi stap witim famili bilong mi and mi insaed long wanfala spiritual paradaes.” Hem sei tu: “Mi laekem tumas for go long evri meeting.”

18. Wanem nao tingting bilong iu abaotem olketa meeting?

¹⁸ Waswe, iu tu laekem tumas for hipap witim pipol bilong Jehovah for worshipim hem? Sapos olsem, traem best bilong iu for evritaem go long olketa meeting nomata hem no isi. Showim long Jehovah iu garem sem feeling olsem King David, wea sei: “Jehovah, mi laekem tumas for stap long haos bilong iu.”—Ps. 26:8.