1, 2. (a) Eliphaz and Bildad sei God hem ting hao long wanem iumi duim for hem? (b) Wanem nao tingting bilong Jehovah abaotem datwan?

LONG bifor, thrifala man go for story witim Job wea faithful for worshipim God. Wanfala long olketa hem Eliphaz, wea hem wanfala Temanite. Hem sei olsem long Job: “Hao nao man savve helpem God? Waswe, man wea wise savve helpem hem? Waswe, Olmaeti God tinghae long wei wea iu raeteous, or waswe, hem kasem eni samting bikos iu gohed for faithful long hem?” (Job 22:1-3) Eliphaz tingse hem hard for iumi helpem God. Bildad, wea hem wanfala Shuhite sei tu hard for God ting long olketa man olsem olketa raeteous.—Readim Job 25:4.

² Eliphaz and Bildad trae for mekem Job for tingse hem iusles nomoa for worshipim Jehovah. Tufala laekem Job for tingse iumi no important nomoa long God olsem olketa moth or worm. (Job 4:19; 25:6) Nomata tufala story olsem, luk olsem tufala no hambol. (Job 22:29) From Jehovah hem Olmaeti, taem iumi comparem iumi witim hem, iumi smol tumas. Olsem example, sapos iumi standap antap long wanfala maunten or iumi luk go aot long  window bilong wanfala plane, bae iumi luksavve iumi barava smol tumas. Bat waswe, hem nao hao Jehovah ting long wei wea iumi waka hard for worshipim hem and sapotim Kingdom bilong hem? Nomoa! Jehovah sei Eliphaz, Bildad, and Zophar olketa laea nomoa. God hem hapi long Job and hem sei Job hem ‘wakaman bilong hem.’ (Job 42:7, 8) So nomata iumi no perfect iumi savve duim samting wea God laekem.

3. Waswe, Elihu sei hem iusles nomoa for iumi worshipim God? Minim kam.

³ Wanfala young man wea nem bilong hem Elihu, hem herehere long story bilong Job, Eliphaz, Bildad, and Zophar. Taem olketa story finis, Elihu ask olsem long Job: “Sapos iu wanfala raeteous man, wanem nao iu givim long God? Wanem nao hem kasem from iu?” (Job 35:7) Waswe, Elihu tu sei hem iusles nomoa for iumi worshipim God? Nomoa. Jehovah no stretem Elihu, olsem hem duim long nara thrifala man. Elihu laek for mekhae long difren point. Hem sei Jehovah no needim eni samting from iumi. No eni samting wea iumi duim savve mekem hem for rich or for strong. Olketa gudfala wei bilong iumi or savve wea iumi garem for duim samting hem kam from God, and hem savve sapos iumi iusim datwan long gudfala wei.

4. Taem iumi duim gudfala samting for olketa narawan, hao nao Jehovah ting long datwan?

⁴ Sapos iumi showimaot love long olketa wea worshipim Jehovah, hem bae ting long datwan olsem iumi duim for hem. Proverbs 19:17 sei: “Taem iu kaen long man wea poor, Jehovah hem garem kaon long iu, and Hem bae changem datwan.” Evritaem iumi duim gudfala samting for olketa narawan, Jehovah savve long datwan. Nomata Jehovah nao wakem evri samting, hem ting long olketa samting wea iumi duim for olketa narawan olsem hem garem kaon long iumi and hem bae givim iumi staka gud samting for changem datwan. Jesus tu hem mekhae long diswan.—Readim Luke 14:13, 14.

5. Olketa wanem kwestin nao bae iumi storyim?

⁵ Long bifor, Jehovah talem profet Isaiah for go story for hem long olketa Israelite and for duim important waka. (Isa. 6:8-10) Isaiah willing for acceptim datfala assignment taem hem sei: “Mi long hia! Sendem mi!” Distaem tu, Jehovah iusim staka wea faithful for worshipim hem for duim waka bilong hem. Staka thousand pipol bilong Jehovah followim example bilong Isaiah. Olketa willing for duim eni assignment wea olketa kasem from Jehovah, nomata olketa mas deal witim samfala hard samting. Bat samfala maet ting olsem: ‘Mi tinghae long disfala privilege for duim waka bilong Jehovah, bat waswe, Jehovah needim help bilong mi? Sapos mi no duim disfala waka, waswe, bae hem hard for Jehovah duim eni samting for mekem wanem hem laekem for happen?’ Waswe, iu tu garem kaen tingting olsem? Iumi bae kasem ansa for olketa kwestin hia taem iumi storyim samfala samting wea happen long laef bilong Deborah and Barak.

6. Why nao hem luk olsem army bilong Jabin savve winim olketa Israelite?

⁶ Barak hem wanfala Israelite and hem man for faet. Deborah hem wanfala woman profet long Israel. For 20 year, king bilong Canaan, Jabin, barava spoelem olketa Israelite. Army bilong Jabin olketa barava raf, and datwan mekem olketa Israelite no feel free for go aot from haos bilong olketa. Army bilong Jabin garem 900-fala chariot wea garem olketa sharp sword wea pokaot from wheel bilong olketa, bat olketa Israelite no garem olketa samting for faet or for protectim olketa.—Judg. 4:1-3, 13; 5:6-8.

7, 8. (a) Wanem nao Jehovah talem Barak for duim? (b) Hao nao olketa Israelite winim army bilong Jabin? (Lukim piksa long start bilong study.)

 ⁷ Taem iumi comparem army bilong Jabin and army bilong Israel, olketa Israelite nating strong and olketa bae lus nomoa. Bat Jehovah talem Deborah for talem disfala toktok long Barak: “Tekem 10,000 man from tribe bilong Naphtali and Zebulun and iufala go ap long Maunt Tabor. Bae mi mekem Sisera, wea hem bigman bilong army bilong Jabin, and army bilong hem wea iusim olketa chariot for go long stream long Kishon, and bae mi mekem iufala for winim hem.”—Judg. 4:4-7.

⁸ Barak talemaot hem needim samfala man for faet, and 10,000 man kam hipap long Maunt Tabor. Then Barak and olketa soldia bilong hem go for faetem army bilong Sisera long Taanach. (Readim Judges 4:14-16.) Waswe, Jehovah helpem olketa Israelite? Yes. Long datfala taem, seknomoa wanfala big rain foldaon and ples wea olketa faet long hem mud nao. Datwan barava helpem olketa Israelite. Barak ronem army bilong Sisera for 24-fala kilometer go kasem Harosheth. Gogo chariot bilong Sisera hem pas insaed long mud. Hem go aot from datfala chariot and hem ranawe go long Zaanannim, wea maet hem klosap long Kedesh. Long there, hem go haed insaed tent bilong wanfala woman wea nem bilong hem Jael. From Sisera taed tumas, hem barava deep sleep nao, and taem hem sleep, Jael killim hem dae. (Judg. 4:17-21) Jehovah helpem olketa Israelite for winim enemy bilong olketa! *

9. Wanem nao iumi lanem long Judges 5:20, 21 abaotem faet wea happen midolwan olketa Israelite and Sisera?

⁹ Iumi savve lanem moa samting abaotem wanem Judges chapter 4 storyim long chapter 5. Judges 5:20, 21 sei: “From skae olketa star faet. From ples wea olketa stap, olketa faetem Sisera. Stream long Kishon hem tekem olketa.” Waswe, datwan minim olketa angel helpem olketa Israelite long datfala faet, or hem minim olketa hot ston from space hem foldaon kam olsem rain? Bible no storyim datwan. Bat hem stret for sei Jehovah sevem pipol bilong hem taem hem mekem bigfala rain for foldaon long barava taem and ples wea faet gohed long hem, mekem hem no isi for 900 chariot hia for muv. Long Judges 4:14, 15, thrifala taem nao scripture hem sei Jehovah nao mekem olketa Israelite for winim datfala faet. No eniwan long 10,000 soldia hia sei olketa nao winim datfala faet.

10, 11. Waswe, Meroz hem wanfala taon, and why nao hem kasem panis?

¹⁰ Distaem bae iumi storyim wanfala interesting samting. Bihaen olketa Israelite winim datfala faet, Deborah and Barak singsing for praisem Jehovah. Tufala sing olsem: “Angel bilong Jehovah sei, ‘Meroz bae kasem panis. Olketa wea stap long there bae kasem panis bikos olketa no laek for helpem Jehovah. Olketa no laek for helpem olketa soldia wea go for faet.’”—Judg. 5:23.

¹¹ Waswe, Meroz hem wanfala taon? Bible no talem datwan. Bat Meroz hem barava finis bikos no eni samting stap for pruvim datwan. Maet hem wanfala taon, bikos pipol long there no willing for joinim Barak for go faet. From 10,000 man nao willing for go faetem olketa long Canaan, masbi olketa long Meroz tu herem datwan. Or maet Meroz hem taon wea Sisera ran kam pas long hem taem hem ranawe from Barak. Maet pipol long there savve kasholem Sisera, bat olketa no duim datwan. Tingim, olketa pipol long Meroz lukim disfala raf komanda hem ranawe followim road long taon bilong olketa! Olketa fit for duim samting wea Jehovah laekem. Sapos olketa duim olsem, Jehovah bae blessim olketa. Bat olketa nating duim eni  samting nomoa. Olketa hia barava difren from Jael, wea hem no fraet for killim dae Sisera!—Judg. 5:24-27.

12. Wanem kaen wei nao olketa pipol garem wea Judges 5:9, 10 storyim, and wanem nao iumi savve lanem from datwan?

¹² Long Judges 5:9, 10 hem showimaot 10,000 man nao willing for go faet bat samfala no willing for go faet. Deborah and Barak praisem “olketa komanda bilong Israel wea willing for go witim olketa narawan for faet.” Olketa komanda hia no olsem “olketa wea raedem olketa brown donkey,” wea tingse olketa important tumas and no willing for go faet. Bible sei olketa hia “sidaon long olketa naesfala carpet,” and olketa “wakabaot long road,” wea diswan minim olketa enjoyim gudfala laef. Olketa hia no olsem olketa wea willing for go witim Barak for faet long Maunt Tabor and valley long Kishon. Olketa hia wea laek for enjoyim gudfala laef shud ting raonem wei wea olketa missim chance for duim samting for Jehovah long datfala taem. Distaem tu iumi mas ting raonem sapos iumi willing for duim wanem God laekem.

13. Storyim wei wea tribe bilong Reuben, Dan, and Asher olketa difren from tribe bilong Zebulun and Naphtali.

¹³ Ten thousand man wea willing for faet lukim olketa samting wea Jehovah duim wea showimaot hem Haefala Ruler. Olketa savve storyim olketa samting hia long olketa narawan. (Judg. 5:11) Bat olketa long tribe bilong Reuben, Dan, and Asher warim nomoa olketa material samting olsem, olketa sheepsheep, olketa ship, and olketa harbor winim wei for duim waka bilong Jehovah. (Judg. 5:15-17) No evri tribe bilong Israel nao duim olsem. Tribe bilong Zebulun and Naphtali helpem Deborah and Barak for faet nomata maet olketa bae dae. (Judg. 5:18) Iumi savve lanem wanfala important leson from olketa wea willing and olketa wea no willing for go faet.

14. Wanem nao iumi duim wea showimaot iumi sapotim rul bilong Jehovah distaem?

¹⁴ Distaem iumi no faet long wanfala war for sapotim rul bilong Jehovah. Bat iumi sapotim rul bilong hem taem iumi no fraet  and strong for preach. Distaem Jehovah needim staka volunteer for duim waka bilong hem winim enitaem bifor. Staka million brata and sista willing for duim difren waka insaed full-taem service. Olsem example, staka duim pioneer waka, buildim olketa Kingdom Hall, and waka long Bethel. Staka volunteer long olketa assembly and convention. Samfala elder waka long Hospital Liaison Komiti and organizem olketa convention. Jehovah hem barava tinghae long wei wea iumi willing for duim waka bilong hem and hem bae no forgetim hard waka bilong iumi.—Heb. 6:10.

15. Wanem nao savve helpem iumi for mek sure iumi no ting smol long waka bilong Jehovah?

¹⁵ Hem gud for iumi wanwan ting raonem olketa kwestin hia: ‘Waswe, mi laekem olketa narawan nao for duim moa samting long waka bilong Jehovah? Waswe, olketa material samting nao mi waka hard tumas for kasem winim wei for duim waka bilong Jehovah? Waswe, mi followim example bilong Barak, Deborah, Jael, and 10,000 man wea no fraet and garem faith, and iusim wanem mi garem long waka bilong Jehovah? Waswe, mi ting for muv go long taon, nara province, or long nara kantri mekem mi savve garem staka selen for garem gudfala laef? Sapos mi ting for muv, waswe, mi prea abaotem and ting raonem hao datwan savve affectim famili bilong mi and kongregeson?’ *

16. Nomata Jehovah savve duim eni samting, wanem nao iumi savve duim for hem?

¹⁶ Jehovah givim iumi nambawan privilege for sapotim rul bilong hem. Start long taem bilong Adam and Eve, Satan laekem olketa man for saedem hem and againstim Jehovah. Bat taem iumi sapotim rul bilong Jehovah, datwan showimaot iumi againstim Satan. From iumi garem faith long Jehovah, datwan mekem iumi laek for duim waka bilong hem and datwan mekem hem barava hapi. (Prov. 23:15, 16) God savve givim ansa long Satan taem iumi faithful and obeyim hem. (Prov. 27:11) Jehovah tinghae long wei wea iumi obeyim hem and hem barava hapi long datwan.

17. Olsem Judges 5:31 storyim, wanem nao bae happen long future?

¹⁷ Klosap nao pipol wea sapotim rul bilong Jehovah nomoa bae stap long earth. Iumi barava luk forward long datfala taem! Iumi olsem Deborah and Barak wea singsing olsem: “Jehovah, killim dae olketa enemy bilong iu, and olketa wea lovem iu bae olsem sun wea kamap and go daon wea luk naes tumas.” (Judg. 5:31) Datwan bae happen taem Jehovah finisim Satan and disfala nogud world. Taem Armageddon start, Jehovah bae no iusim iumi for killim dae olketa enemy bilong hem. Iumi bae ‘standap kwaet and lukim wei wea Jehovah bae sevem iumi.’ (2 Chron. 20:17) Bat distaem, iumi garem chance for showimaot iumi no fraet and strong for sapotim rul bilong hem.

18. Hao nao wei wea iumi willing for duim waka bilong Jehovah savve helpem olketa narawan?

¹⁸ Olketa toktok long start bilong datfala song wea Deborah and Barak singim hem mekhae long Jehovah and no olketa man. Tufala sing olsem: “From olketa willing for go faet, datwan mekhae long Jehovah.” (Judg. 5:1, 2) Distaem tu olketa narawan savve praisem Jehovah from gudfala waka wea iumi duim for hem.