1. Wanem encouragement nao Jehovah givim bihaen Adam and Eve sin againstim hem?

START kam long taem wea olketa man sin and no perfect, Jehovah showimaot hem God wea givim encouragement. Stretawe bihaen Adam and Eve sin againstim Jehovah long Eden, Jehovah talem wanfala profesi wea bae encouragem olketa wea born kam long laen bilong Adam. Diswan bae mekem evriwan garem hope. Taem olketa man minim datfala profesi wea stap long Jenesis 3:15 datwan bae givim hope long olketa hao “datfala snek bilong bifor kam” wea nem bilong hem Satan bae distroe, and evri nogud samting wea hem duim bae finis.—Rev. 12:9; 1 John 3:8.

2. Hao nao Jehovah encouragem Noah?

² Noah hem wakaman bilong Jehovah and hem stap long taem wea pipol no lovem God, and famili bilong hem nomoa worshipim Jehovah. Wei for raf and durong hem barava big tumas long taem bilong Noah. Datwan maet mekem hem feel wikdaon.  (Jenesis 6:3-5, 11; Jude 6) Bat Jehovah talem hem samting wea encouragem hem for gohed “frengud wetem God.” (Jenesis 6:9, 10) Jehovah talem Noah Hem bae finisim datfala nogud world and hem talem Noah wanem for duim for sevem laef bilong famili bilong hem. (Jenesis 6:13-18) Jehovah showimaot long Noah hao hem God wea givim encouragement.

3. Wanem encouragement nao Joshua hem kasem? (Lukim piksa long start bilong study.)

³ Bihaen, Jehovah encouragem tu wakaman bilong hem Joshua, wea garem bigfala waka for leadim pipol bilong God long Promis Land. Olketa mas faet witim olketa nara nation wea garem bigfala army wea stap long there. Dastawe hem fitim nomoa for Joshua fraet. From diswan, Jehovah talem Moses for encouragem Joshua. God sei: “Bat mi laekem yu fo toktok gudfala long Josua, an yu mas mekem tingting blong hem fo strong, bikos hem nao bae hemi lidim olketa pipol fo katkros long Jodan Riva fo tekova long olketa lan wea bae yu lukim.” (Diutronomi 3:28) Bifor Joshua go long faet, Jehovah encouragem hem, and sei: “Mi talem finis long yu. Yu mas stanap strong olowe an yu mas no fraet, an tingting blong yu mas no wikdaon, bikos eniples wea yu go long hem, mi [Jehovah], God blong yu bae mi stap wetem yu.” (Josua 1:1, 9) Datwan mas barava encouragem Joshua!

4, 5. (a) Wanem encouragement nao Jehovah givim long pipol bilong hem bifor? (b) Hao nao Jehovah encouragem Son bilong hem?

⁴ Jehovah savve encouragem man wanwan, and tu, hem savve givim encouragement long evri pipol bilong hem. Olsem example, taem olketa Jew prisoner long Babylon Jehovah comfortim olketa taem hem talem disfala profesi wea sei: “Yufala no fraet, an yufala no seksek. Mi nao God blong yufala, an mi stap wetem yufala. Bae mi mekem yufala strong, an bae mi helpem yufala. Ya, bae strongfala raet han blong mi hemi gadem yufala long stretfala wei.” (Aesaea 41:10) Jehovah encouragem olketa Christian long first century, and hem encouragem pipol bilong hem distaem tu.—Readim 2 Corinth 1:3, 4.

⁵ Jesus tu kasem encouragement from Dadi bilong hem. Taem Jesus baptaes hem herem voice from heven wea sei: “Diswan nao Son bilong mi wea mi lovem and wea mi hapi long hem.” (Matt. 3:17) Datfala toktok mas barava strongim Jesus taem hem duim ministry bilong hem long earth!

6. Hao nao tokpiksa abaotem olketa silver selen hem encouragem iumi?

⁶ Jesus followim example bilong Dadi bilong hem. Taem Jesus profesi abaotem taem wea world gogo for finis, hem talem tokpiksa abaotem olketa silver selen, wea diswan encouragem olketa disaepol bilong hem for faithful. Long datfala tokpiksa, boss showimaot hem tinghae long each wakaman bilong hem taem hem sei: “Gud tumas! Iu barava faithful long wanem iu duim witim selen hia. Mi laekem iu for lukaftarem samfala samting moa. Iumi tufala hapi nao.” (Matt. 25:21, 23) Datfala toktok mas barava strongim evri disaepol for gohed faithful long Jehovah!

7. Wanem encouragement nao Jesus givim long olketa aposol bilong hem, especially Peter?

⁷ Staka taem olketa aposol bilong Jesus raoa abaotem hu nao important, bat Jesus patient taem hem encouragem olketa for hambol and for kamap olketa wakaman nomoa, and no for kamap boss. (Luke 22:24-26) Samfala taem Peter duim mistek and hem mekem Jesus feel nogud. (Matt. 16:21-23; 26:31-35, 75) Datwan no mekem Jesus  les long Peter, bat Jesus encouragem hem and talem hem for strongim olketa nara brata.—John 21:16.

8. Hao nao Hezekiah encouragem olketa bigman bilong army and olketa pipol long Jerusalem?

⁸ Bifor Jesus kam long earth and showim perfect example long hao for encouragem olketa narawan, olketa faithful servant bilong Jehovah luksavve olketa need for encouragem narawan. Tingim example bilong Hezekiah. Taem olketa long Assyria klosap attakim Jerusalem, olketa bigman bilong army and pipol long Jerusalem hipap tugeta and Hezekiah encouragem olketa. Bible sei: “Toktok blong King Hesekaea hemi strongim tingting blong olketa.”—Readim Mektu Kronikols 32:6-8.

9. Wanem nao iumi savve lanem from Job abaotem wei for encouragem narawan?

⁹ Iumi savve lane abaotem wei for encouragem narawan from example bilong Job tu. Nomata hemseleva needim encouragement, Job helpem thrifala man wea kam for comfortim hem for savve hao for givim encouragement. Hem talem olketa hao sapos olketa kasem hard taem wea hem kasem, ‘bae hem strongim tingting blong olketa, an toktok blong hem bae mekem olketa filgud moa.’ (Job 16:1-5) Gogo Job kasem encouragement from Elihu and from Jehovah tu.—Job 33:24, 25; 36:1, 11; 42:7, 10.

10, 11. (a) Why nao dota bilong Jephthah needim encouragement? (b) Hu nao iumi savve encouragem distaem?

¹⁰ Nara example long bifor abaotem samwan wea needim encouragement, hem gele bilong Jephthah. Bifor Jephthah, wea hem wanfala judge, go for faet againstim olketa bilong Ammon, hem talem wanfala promis long Jehovah. Hem sei sapos Jehovah mekem hem win long faet, first wan wea kamaot from haos bilong hem for meetim hem, bae hem givim long Jehovah for waka long tabernacle. Bihaen hem win, first wan wea kam for meetim hem nao hem only dota bilong hem. Jephthah barava sorre tumas, bat hem duim wanem hem promisim and sendem gele bilong hem long Shiloh for waka long tabernacle for full laef bilong hem.—Jajis 11:30-35.

¹¹ Masbi diswan hard for Jephthah, bat hem barava hard go moa for gele bilong hem wea willing for followim wanem dadi bilong hem disaedem. (Jajis 11:36, 37) Diswan minim hem bae no marit or garem pikinini, and from datwan laen bilong dadi bilong hem finis nao. Hem barava needim eniwan for comfortim and encouragem hem. Bible sei: “Olketa garem wanfala kastom wea evri yia olketa gele blong Israel i save goaot fo fofala de fo tingim dota blong Jefta, disfala man blong Gilead.” (Jajis 11:39, 40) Distaem tu hem gud for iumi praisem and encouragem olketa singol wan wea iusim laef bilong olketa for “duim waka bilong Lord.”—1 Cor. 7:32-35.

12, 13. Hao nao Peter ‘strongim olketa brata’?

¹² Long naet bifor Jesus dae, hem sei olsem long aposol Peter: “Simon, Simon, iu savve, Satan sei hem laek for separatem iufala olsem man hem separatem wheat from skin bilong hem. Bat mi barava prea strong for iu, mekem faith bilong iu no wik. Bihaen iu repent and gud bak, strongim olketa brata bilong iu.”—Luke 22:31, 32.

¹³ Peter hem wanfala strongfala brata wea lead insaed Christian kongregeson long first century. (Gal. 2:9) Wei wea Peter no fraet  long taem bilong Pentecost and long olketa nara taem, hem encouragem olketa brata. Taem hem klosap for finisim ministry bilong hem, hem raet go long olketa nara Christian. Hem talem why hem raetem disfala leta, taem hem sei: “Mi no raetem kam staka samting bat mi raet kam for encouragem iufala, and for mekem iufala savve God hem barava kaen long iufala. Iufala mas hol strong long datwan.” (1 Pet. 5:12) Olketa leta bilong Peter encouragem olketa Christian long datfala taem. And iumi tu needim datwan taem iumi gohed for weitim olketa promis bilong Jehovah for kamap tru.—2 Pet. 3:13.

14, 15. Hao nao olketa leta bilong aposol John encouragem olketa Christian kam kasem distaem?

¹⁴ Aposol John tu hem wanfala strongfala brata wea lead long Christian kongregeson long first century. Barava interesting Gospel wea hem raetem abaotem ministry bilong Jesus hem encouragem olketa Christian long first century kam kasem distaem. Olsem example, Gospel bilong hem nomoa storyim toktok wea Jesus talem hao wei for showimaot love hem mark bilong olketa tru Christian.—Readim John 13:34, 35.

¹⁵ Thrifala leta bilong John garem tu olketa nara nambawan truth insaed. Taem iumi feel wikdaon bikos iumi sin, iumi kasem encouragement taem iumi readim hao “blood bilong . . . Jesus, hem mekem iumi klin from evri sin bilong iumi.” (1 John 1:7) And sapos iumi gohed feel guilty, iumi savve kasem comfort taem iumi readim toktok wea sei, “God hem savve gud long iumi winim iumiseleva.” (1 John 3:20) John nomoa raetem disfala toktok: “God hem love.” (1 John 4:8, 16) Long mek-tu and mek-thri leta bilong John, hem praisem olketa Christian wea “gohed followim olketa tru teaching.”—2 John 4; 3 John 3, 4.

16, 17. Hao nao aposol Paul encouragem olketa Christian long first century?

 ¹⁶ Long first century, wanfala aposol wea barava encouragem olketa brata hem aposol Paul. No longtaem bihaen Jesus dae, staka long olketa aposol stap long Jerusalem, so hem nao ples wea governing body stap. (Acts 8:14; 15:2) Olketa Christian long Judea preach abaotem Christ long olketa Jew wea biliv long wanfala God nomoa. Bat holy spirit sendem aposol Paul for preach long olketa pipol bilong Greece, Rome, and olketa nara nation wea worshipim staka god.—Gal. 2:7-9; 1 Tim. 2:7.

¹⁷ Paul go long staka ples insaed long kantri wea distaem olketa kolem Turkey, and tu long Greece and Italy, and hem preach long olketa wea no Jew and hem startim olketa kongregeson long there. Olketa niu Christian hia safa “bikos olketa wantok bilong [olketa]” persecutim olketa, dastawe olketa needim encouragement. (1 Thess. 2:14) Long samting olsem 50 C.E., Paul raet long niu kongregeson long Thessalonica and hem sei: “Evritaem wea mifala prea for iufala evriwan, mifala thankiu long God. Taem mifala prea long God wea hem Dadi bilong iumi, mifala evritaem tingim waka wea iufala duim from iufala garem faith, and evri hard waka wea iufala duim.” (1 Thess. 1:2, 3) And tu, hem talem olketa for “gohed for encouragem and strongim narawan.”—1 Thess. 5:11.

18. Hao nao governing body long first century encouragem Philip?

¹⁸ Jehovah iusim governing body long first century for encouragem olketa brata wea leadim waka long kongregeson and olketa nara Christian tu. Taem Philip preach long olketa bilong Samaria abaotem Christ, olketa long governing body barava sapotim hem. Olketa sendem tufala member bilong olketa, Peter and John, for prea for olketa niu disaepol hia for kasem holy spirit. (Acts 8:5, 14-17) Philip and olketa niu disaepol hia barava kasem encouragement from sapot bilong governing body!

19. Hao nao feeling bilong olketa Christian long first century taem olketa readim leta from governing body?

¹⁹ Bihaen, governing body need for disaedem sapos olketa Christian wea no Jew shud circumcise, olsem wei wea olketa Jew duim datwan from olketa stap anda long Law bilong Moses. (Acts 15:1, 2) Bihaen olketa prea for holy spirit and ting raonem samfala scripture, olketa disaedem hao olketa Christian no need for circumcise. Then olketa raetem leta long olketa kongregeson for talemaot datwan. Governing body sendem olketa brata for go givim datfala leta long olketa kongregeson. Wanem nao kamaot from datwan? “Olketa readim datfala leta and olketa hapi tumas long samting wea olketa readim.”—Acts 15:27-32.

20. (a) Wanem encouragement nao Governing Body distaem givim long olketa brata and sista evriwea long world? (b) Wanem kwestin nao bae iumi ansarem long next study?

²⁰ Distaem tu Governing Body bilong Olketa Jehovah’s Witness encouragem olketa Bethelite, olketa wea joinim spesol full-taem service, and evri brata and sista raonem full world. Olsem olketa Christian long first century, iumi tu hapi taem iumi kasem encouragement olsem. And nara samting tu, long 2015 Governing Body pablisim disfala brochure Kam Bak Long Jehovah, wea barava encouragem staka pipol evriwea long world. Bat waswe diswan minim olketa wea lead nomoa shud followim example bilong Jehovah for encouragem narawan? Bae iumi kasem ansa bilong datfala kwestin long next study.