1, 2. (a) Why nao pipol long taem bilong aposol Paul interest for storyim wei for slave and wei for free? (b) Hu nao Paul sei hem fit for mekem man barava kamap free?

OLKETA Christian long first century stap anda long rul bilong Rome, and pipol bilong Rome tinghae tumas long olketa law, wei wea pipol kasem justice, and wei wea olketa free. Bat, Rome kamap strong bikos olketa garem staka slave for duim waka bilong olketa. Long datfala taem, samting olsem 30 percent long pipol olketa slave. Luk olsem, staka pipol and olketa Christian tu laek storyim tumas wei wea samfala pipol slave and samfala free.

² Staka taem aposol Paul raet abaotem wei for free. Bat hem no trae for stretem olketa problem wea gohed long world nomata staka pipol long datfala taem laek duim datwan. Paul and olketa nara Christian waka hard for teachim pipol gud nius abaotem Kingdom bilong God and helpem olketa for tinghae long ransom sakrifaes bilong Jesus Christ. Paul helpem olketa nara Christian for luksavve hu nao fit for mekem olketa barava kamap free. Long mek-tu leta wea hem raetem for olketa long Corinth, hem sei, “Jehovah nao datfala Spirit, and olketa wea kasem holy spirit bilong Jehovah, olketa free.”—2 Cor. 3:17.

3, 4. (a) Wanem nao Paul story abaotem bifor hem talem toktok long 2 Corinth 3:17? (b) Wanem nao iumi mas duim for garem datfala freedom wea kam from Jehovah?

 ³ Insaed datfala sem leta, Paul storyim samting wea kasem Moses taem hem kam daon from Maunt Sinai. Bihaen Moses story witim wanfala angel bilong Jehovah, feis bilong hem shaen braet fogud. Taem olketa Israelite lukim feis bilong Moses olketa fraet, so hem kavarem feis bilong hem. (Eksodas 34:29, 30, 33; 2 Cor. 3:7, 13) Paul hem sei: “Bat taem eniwan hem changem wei bilong hem mekem hem worshipim Jehovah, datfala kava hem aot.” (2 Cor. 3:16) Wanem nao Paul minim?

⁴ Olsem iumi lanem finis long first study, Jehovah, wea creatim evri samting, hem nomoa free for duim eni samting wea hem laekem. So dastawe taem olketa man “kasem holy spirit bilong Jehovah, olketa free.” Bat, Paul sei sapos iumi laek garem datfala freedom, iumi mas worshipim Jehovah, wea minim iumi mas fren gud witim hem. Taem olketa Israelite stap long wilderness olketa no garem spiritual tingting abaotem freedom wea Jehovah givim olketa. Hem olsem wanfala samting hem kavarem mind and heart bilong olketa. Olketa laek for iusim wei wea olketa kamap free from Egypt for duim samting wea olketa seleva nomoa laekem.—Heb. 3:8-10.

5. (a) Wanem kaen freedom nao spirit bilong Jehovah givim? (b) Nomata man stap long prison or hem slave, hao nao iumi savve hem garem freedom wea Jehovah givim? (c) Olketa wanem kwestin nao iumi need for ansarem?

⁵ Datfala freedom wea iumi kasem from spirit bilong Jehovah, hem difren from wei wea man savve kamap free from wei for slave. Winim wei wea olketa man savve mekem iumi free, spirit bilong Jehovah mekem iumi free from sin and dae. And tu, hem mekem iumi free from olketa false religion and teaching bilong olketa. (Rome 6:23; 8:2) Datfala freedom hem barava winim eni nara wei for free! Nomata man kamap slave or stap long prison, hem savve garem datfala freedom. (Jenesis 39:20-23) Experience bilong Brata Erick Frost and Brata Horst Henschel showimaot diswan hem tru. Tufala stap long prison for staka year bikos tufala faithful for worshipim Jehovah. Iu savve lukim and herem experience bilong olketa long JW Broadcasting. (Go long OLKETA INTERVIEW AND EXPERIENCE > WINIM OLKETA HARD TAEM.) Bat tingim diswan: Hao nao iumi savve showimaot iumi tinghae long freedom wea iumi garem? And hao nao iumi savve iusim freedom wea iumi garem long wisefala wei?

6. Hao nao olketa Israelite showimaot olketa no tinghae long freedom wea Jehovah givim olketa?

⁶ Taem iumi luksavve wei wea wanfala present hem spesol, datwan bae muvim iumi for showimaot iumi tinghae long man wea givim datwan. Olketa Israelite nating tinghae long wei wea Jehovah mekem olketa kamap free from slave long Egypt. Tu-thri month bihaen olketa kamap free, olketa start for ting bak long olketa kaikai and drink wea olketa garem long Egypt and olketa komplen abaotem samting wea Jehovah provaedem, and tu, olketa laek for go bak long Egypt. Tingim diswan, olketa tingse ‘fis, kiukamba, melen, salat, anian, an galik’ hem winim wei wea olketa free for worshipim Jehovah. Dastawe, Jehovah barava kros long olketa. (Nambas 11:5, 6, 10; 14:3, 4) Iumi lanem wanfala important leson from diswan.

7. Hao nao Paul followim kaonsel wea hem talem long 2 Corinth 6:1, and hao nao iumi savve duim sem samting?

⁷ Aposol Paul encouragem olketa Christian  for no ting nating long freedom wea Jehovah hem givim iumi thru long Son bilong hem, Jesus Christ. (Readim 2 Corinth 6:1.) Paul hem slave long sin and dae, and datwan mekem hem barava feel nogud. Nomata olsem, hem sei: “Mi thankiu long God wea hem sevem mi bikos long samting wea Lord bilong iumi Christ Jesus hem duim!” Why nao hem tok olsem? Hem explainim diswan long olketa nara Christian taem hem sei: “Law bilong spirit wea givim laef long olketa wea wan mind witim Christ Jesus, hem mekem iufala for no slave long law bilong sin and dae.” (Rome 7:24, 25; 8:2) Olsem Paul, iumi shud no ting nating long wei wea Jehovah mekem iumi kamap free from wei for sin and dae. Thru long ransom, iumi free for worshipim God witim klin konsens and datwan mekem iumi kasem trufala hapi.—Sams 40:8.

8, 9. (a) Wanem nao aposol Peter talem abaotem wei for iusim freedom bilong iumi? (b) Why nao datwan hem fitim iumi distaem?

⁸ Witim wei for sei thankiu long God, iumi mas stap klia long wei for iusim long rongfala wei freedom wea iumi garem for chus. Aposol Peter sei nomata iumi garem datfala freedom, iumi shud no iusim datwan olsem excuse for duim olketa nogud samting. (Readim 1 Peter 2:16.) Datwan remindim iumi abaotem samting wea happen long olketa Israelite long wilderness. Datfala toktok barava fitim iumi distaem. Satan and world bilong hem mekhae long staka samting saed long kaleko and lukluk, kaikai and drink, olketa difren kaen hapitaem, and staka nara samting. Olketa wea advertisem samting iusim olketa pipol wea luk naes for mekem iumi tingse iumi shud baem staka samting wea iumi no really needim. Hem isi tumas for Satan trikim iumi and mekem iumi for no duim samting wea Jehovah laekem.

⁹ Toktok bilong Peter savve helpem iumi tu taem iumi disaedem olketa important samting long laef, olsem education and waka for selen. Olsem example, world mekem olketa young wan feel olsem olketa mas waka hard for mekem olketa fit for go skul long best university. Pipol sei sapos olketa kasem hae education bae olketa garem gud waka wea bae mekem olketa kasem hae position and big selen. Maet olketa showim tu information wea mekem hem luk olsem olketa wea graduate from university nomoa savve kasem staka selen winim olketa wea graduate from hae skul. Datwan mekem olketa young wan for tingse hem gud idea for kasem hae education from wanem olketa disaedem bae affectim full laef bilong olketa. Bat wanem nao olketa young wan and parents bilong olketa shud tingim?

10. Wanem nao iumi need for tingim taem iumi disaedem olketa samting for iumiseleva?

¹⁰ Samfala tingse from hem disison bilong olketa seleva, olketa shud free for chusim wanem olketa laekem saed long diswan sapos konsens bilong olketa letem olketa for duim. Nomata iumi free for chusim wanem education or waka wea bae iumi duim, iumi shud tingim hao iumi no free for duim evri samting wea iumi laekem, and tu, iumi savve kasem gud or nogud samting from wanem iumi disaedem. Dastawe Paul sei: “Man free for duim eni samting, bat no evri samting hia savve helpem hem or olketa narawan. Man free for duim eni samting, bat no evri samting savve strongim hem or olketa narawan.” (1 Cor. 10:23) Datwan helpem iumi for luksavve staka nara samting important winim wei for duim wanem iumiseleva laekem.

11. Why nao Jehovah mekem iumi free?

¹¹ Taem Peter story abaotem wei for iusim freedom long rongfala wei, hem storyim  tu wanem nao stretfala samting for iumi duim. Hem encouragem iumi for iusim freedom wea iumi garem for “duim waka bilong God.” So reason why Jehovah iusim Jesus for mekem iumi free from sin and dae hem for mekem iumi iusim full laef bilong iumi for worshipim Hem.

12. Wanem nao iumi savve lanem from example bilong Noah and famili bilong hem?

¹² Best wei for iusim freedom bilong iumi hem for iusim taem and strong for duim olketa spiritual samting. Datwan bae protectim iumi for no letem olketa samting long disfala world and samting wea iumiseleva laekem kamap important samting long laef. (Gal. 5:16) Tingim example bilong Noah and famili bilong hem. Pipol long datfala taem barava raf tumas and durong. Bat Noah and famili bilong hem no duim samting wea pipol long datfala taem laekem and busy for duim. Hao nao olketa win for duim datwan? Olketa disaed for gohed busy for duim wanem Jehovah talem olketa for duim, hem nao for buildim ark, kolektem kaikai for olketa seleva and olketa animal, and for warnim olketa nara pipol abaotem Flood. Bible sei: “Noa hemi duim evrisamting ya nao olsem wea God hemi bin talem hem.” (Jenesis 6:22) From datwan, Noah and famili bilong hem sev taem Flood kam.—Heb. 11:7.

13. Wanem nao Jehovah komandim iumi for duim?

¹³ Wanem nao Jehovah komandim iumi for duim distaem? Jehovah talem Jesus for preach and from iumi olketa disaepol bilong Jesus iumi tu mas duim sem samting. (Readim Luke 4:18, 19.) Distaem, Satan wea hem god bilong disfala world, blindim mind bilong staka pipol. Hem mekem olketa for kamap slave long false religion, olketa material samting, and community bilong olketa. (2 Cor. 4:4) Hem wanfala privilege for followim example bilong Jesus for helpem olketa nara pipol for savve and worshipim Jehovah, God wea mekem iumi free. (Matt. 28:19, 20) Preaching waka hem no isi and iumi savve feisim staka hard samting. Long samfala ples, pipol no interest for savve long God, and samfala narawan savve kros taem iumi preach long olketa. Hem gud for iumi wanwan ting raonem disfala kwestin, ‘From  mi free for worshipim Jehovah, hao nao mi savve duim samfala samting moa for barava sapotim Kingdom waka?’

14, 15. Wanem nao staka brata and sista disaed for duim? (Lukim piksa long start bilong study.)

¹⁴ Iumi kasem encouragement taem iumi lukim staka brata and sista mekem laef bilong olketa simpol for duim full-taem service bikos olketa luksavve end hem klosap. (1 Cor. 9:19, 23) Samfala duim pioneer waka long hom bilong olketa, and olketa narawan muv go long ples wea needim staka pablisa for preach. Insaed long faevfala year wea go pas, winim 250,000 start for pioneer, and distaem winim 1,100,000 regular pioneer nao stap. Datwan hem barava nambawan wei wea olketa iusim freedom bilong olketa long wisefala wei for worshipim Jehovah.—Sams 110:3.

¹⁵ Wanem nao helpem olketa brata and sista hia for putim waka bilong Jehovah first long laef bilong olketa? Tingim John and Judith, wea go pioneer long olketa nara kantri insaed 30 year wea go pas. Tufala storyim taem Pioneer Service Skul hem start long 1977, olketa kasem encouragement for muv and pioneer long ples wea needim staka pablisa. For mekem tufala kasem goal bilong tufala, staka taem John mas changem waka bilong hem mekem tufala gohed garem simpol laef. Gogo tufala go for preach long nara kantri. Tufala luksavve wei for prea and depend long Jehovah helpem tufala for winim olketa hard taem, olsem for lanem niu languis, for savve long niu culture, and for deal witim weather long there. Hao nao tufala feel abaotem olketa year wea tufala pioneer? John sei: “Mi feel olsem mi joinim wanfala nambawan waka wea winim olketa waka wea mi duim bifor. Jehovah kamap real long mi, olsem wanfala dadi wea garem love. Distaem nao mi minim gud wanem nao James 4:8 hem minim, wea sei: ‘Fren gud witim God and bae hem fren gud witim iufala.’ Mi faendem nao samting wea mi lukaotem, wea hem nao for barava hapi and satisfae long wanem mi duim long laef.”

16. Hao nao staka thousand brata and sista iusim freedom wea olketa garem long wisefala wei?

¹⁶ Olsem John and Judith, samfala tu pioneer for longtaem. Bat olketa narawan savve pioneer for short taem nomoa bikos long samting wea kamap long laef. Nomata olsem, staka lukaotem chance for volunteer long olketa construction project wea gohed raonem world. Olsem example, taem olketa buildim world hedquarter long Warwick, New York, samting olsem 27,000 brata and sista nao go for help long there. Samfala kam waka for tufala week, olketa narawan for samfala month, and samfala moa waka for wanfala year or winim datwan. Staka long olketa brata and sista hia sakrifaesim samfala samting for waka long there. Datwan hem nambawan example long hao for iusim freedom wea God givim olketa for praisem and worshipim Jehovah, God wea mekem iumi free!

17. Wanem nao olketa wea iusim gud freedom wea God givim savve luk forward long hem?

¹⁷ Iumi hapi tumas from iumi savve long Jehovah and iumi garem datfala freedom wea iumi kasem from iumi worshipim hem. Iumi showimaot iumi tinghae long datfala freedom long olketa samting iumi disaedem long laef. Winim wei for iusim freedom wea iumi garem long rongfala wei, iumi laek for iusim freedom and chance wea iumi garem for worshipim Jehovah witim best bilong iumi. Sapos iumi duim olsem, iumi bae luk forward for enjoyim olketa blessing wea Jehovah promisim taem hem bae mekem “olketa samting wea hem wakem for no slave moa long sin and dae. From datwan olketa bae free olsem olketa pikinini bilong God, wea datwan hem nambawan samting.”—Rome 8:21.