1. Olsem Ephesus 6:10-13, wanem nao wanfala wei wea showimaot Jehovah lovem and tingim iumi? Explainim datwan.

JEHOVAH showimaot hem lovem and tingim iumi wea worshipim hem taem hem helpem iumi for againstim olketa enemy bilong iumi. Main enemy bilong iumi nao hem Satan and olketa demon. Jehovah warnim iumi abaotem olketa enemy hia, and hem givim iumi wanem iumi needim for againstim olketa. (Readim Ephesus 6:10-13.) Taem iumi acceptim help from Jehovah and barava trustim hem, iumi savve win for againstim Devil. Iumi savve garem sem trust olsem aposol Paul wea sei: “Sapos God hem saedem iumi, no eniwan savve againstim iumi.”—Rome 8:31.

2. Wanem nao bae iumi storyim long disfala study?

² Iumi olketa tru Christian no laek for interest tumas long Satan and olketa demon. Main interest bilong iumi hem for lane abaotem Jehovah and for worshipim hem. (Sams 25:5) Nomata olsem, iumi need for savve abaotem samfala samting wea Satan duim. Why nao olsem? For mekem Satan no savve winim iumi. (2 Cor. 2:11) Long disfala study, iumi bae storyim wanfala main wei wea Satan and olketa demon trae for laea long pipol. Iumi bae storyim tu hao iumi savve againstim olketa.

3-4. (a) Wanem nao spiritism? (b) Haomas pipol nao bilivim spiritism?

³ Wanfala main wei wea Satan and olketa demon savve trae for laea long pipol nao hem thru long spiritism. Pipol wea duim spiritism savve sei olketa garem paoa for savve long samting or duim samting wea winim wanem normal pipol savve duim. Olsem example, samfala sei olketa savve hao for luksavve long olketa saen or olketa star for savve wanem bae kamap long future. Samfala maet act olsem olketa story witim olketa wea dae. Samfala iusim  paoa bilong olketa demon or duim magic, and maet olketa trae for poisonim or spoelem nara man. *

⁴ Haomas pipol nao bilivim paoa bilong spiritism? Wanfala survey wea olketa duim long 18-fala kantri long Latin America and Caribbean faendaot hao samting olsem wan third long pipol biliv long magic, devil, or wei for iusim paoa bilong demon for spoelem man, and klosap sem namba long pipol bilivim hao man savve story witim olketa spirit. Nara survey kamap long 18-fala kantri long Africa, and olketa faendaot hao winim haf long olketa pipol long there sei olketa bilivim wei for iusim paoa bilong demon. Tru nao, nomata long wea nao iumi stap, iumi mas protectim iumi from spiritism bikos Satan gohed trae for laea long “evriwan long earth.”—Rev. 12:9.

5. Wanem nao tingting bilong Jehovah abaotem spiritism?

⁵ Jehovah hem God wea evritaem laekem samting wea tru. (Aesaea 65:16) So wanem nao tingting bilong Jehovah abaotem spiritism? Hem barava heitim! Jehovah tok olsem long olketa Israelite: “Yufala mas no letem eniwan bonem pikinini blong hem long faea fo mekem sakrifaes. Yufala mas no letem eniwan mekem sakrifaes fo save abaotem wanem bae hemi kamap bihaen. Yufala mas no letem eniwan fo mekem enikaen majik o poesen. Yufala mas no letem eniwan wakem grinlif. An yufala mas no letem eniwan fo kolem olketa devoldevol, o toktok long spirit blong man hu hemi dae. Eniwan hu hemi mekem olketa kaen wei ya, hemi barava nogud tumas long ae blong [Jehovah].” (Diutronomi 18:10-12) Olketa Christian distaem no stap anda long datfala Law wea Jehovah givim long olketa Israelite. Bat, iumi savve tingting bilong hem abaotem spiritism hem no change.—Malakae 3:6.

6. (a) Hao nao Satan iusim spiritism for spoelem pipol? (b) Olsem Eklesiastes 9:5 talem, wanem nao tru teaching abaotem olketa wea dae?

⁶ Jehovah warnim iumi for againstim spiritism bikos hem savve Satan iusim datwan for spoelem pipol. Satan iusim spiritism for mekhae long olketa laea, olsem wei for sei man wea dae hem gohed laef long nara ples. (Readim Eklesiastes 9:5.) Satan iusim tu spiritism for mekem pipol fraet and for mekem olketa no worshipim Jehovah. Main goal bilong hem nao for pipol wea duim spiritism for trustim olketa demon and no trustim Jehovah.

7. Wanem nao Jehovah talem long iumi?

⁷ Olsem iumi storyim finis, Jehovah talem iumi wanem iumi need for savve, mekem Satan and olketa demon no laea long iumi. Distaem bae iumi storyim samfala samting wea iumi savve duim for faet againstim Satan and olketa demon.

8. (a) Wanem nao main wei wea iumi savve againstim olketa demon? (b) Hao nao Sams 146:4 showimaot laea bilong Satan abaotem olketa wea dae?

⁸ Readim and ting raonem Bible. Diswan hem main wei wea iumi savve rejectim olketa laea wea olketa demon mekhae long hem. Bible hem olsem wanfala sharp sword wea savve showimaot klia olketa laea wea Satan mekhae long hem. (Eph. 6:17) Olsem example, Bible talemaot klia olketa wea dae no savve story witim olketa wea laef. (Readim Sams 146:4) Bible remindim iumi tu hao only Jehovah nomoa savve wanem  bae kamap long future. (Aesaea 45:21; 46:10) Sapos iumi readim and ting raonem Bible evritaem, datwan bae helpem iumi for redi for rejectim and heitim olketa laea wea olketa demon laekem iumi for bilivim.

9. Olketa wanem samting wea join witim spiritism nao iumi stap klia long hem?

⁹ No duim eniting wea join witim spiritism. From iumi olketa tru Christian, iumi no duim eniting wea join witim eni wei for duim spiritism. Olsem example, iumi no go long olketa kastom man or trae for story long eni wei witim olketa wea dae finis. Olsem iumi storyim finis long study bifor diswan, iumi stap klia from olketa funeral kastom wea mekhae long biliv wei sei olketa wea dae olketa gohed for laef samwea. And iumi no iusim olketa star or eni nara samting for trae for savve long wanem bae happen long future. (Aesaea 8:19) Iumi savve evri wei olsem hem barava danger tumas and hem savve mekem wei for Satan and olketa demon for affectim iumi.

10-11. (a) Wanem nao samfala long first century duim taem olketa lanem truth? (b) Olsem 1 Corinth 10:21 storyim, why nao iumi shud followim example bilong olketa Christian bifor and hao nao iumi savve duim datwan?

¹⁰ Torowem eni samting wea join witim olketa demon. Samfala pipol wea stap long Ephesus long first century duim spiritism. Bat, taem olketa lanem truth, olketa disaed strong for duim samting. Bible sei: “Staka wea duim magic tekem kam olketa buk bilong olketa and bonem front long evriwan.” (Acts 19:19) Each wan long olketa hia duim evri samting wea olketa fit for duim for againstim olketa demon. Olketa buk bilong olketa abaotem magic hem kostim staka selen. Bat winim wei for givim or salem olketa buk hia long olketa narawan, olketa disaed for bonem. Wei for mekem Jehovah hapi nao hem important winim haomas selen olketa savve kasem from olketa buk hia.

¹¹ Hao nao iumi savve followim example bilong olketa Christian long first century? Hem wise for iumi torowem eni samting wea iumi garem wea join witim olketa demon.  Olsem olketa nekles, or eni nara samting wea pipol werem or garem for trae protectim olketa seleva from olketa demon.—Readim 1 Corinth 10:21.

12. Olketa wanem kwestin nao iumi savve askem long iumiseleva abaotem wanem iumi laek for readim, lukim, or lisin long hem?

¹² Careful long wanem iu chusim for readim, lukim, or herem. Askem iuseleva: ‘Waswe, mi readim olketa buk, magasin, or olketa article long Internet abaotem olketa demon? Waswe long olketa music wea mi lisin long hem, olketa movie or TV show wea mi lukim, or olketa video game wea mi savve pleim? Waswe, olketa join witim spiritism? Waswe, hem abaotem olketa samting olsem vampire, or olketa samting wea garem olketa spesol paoa? Waswe, hem showim hao wei for duim magic, or talem olketa curse hem samting nating nomoa? Hem tru, no evri story or movie abaotem olketa samting wea no real hem join witim spiritism. Taem iu ting raonem wanem for readim, lukim, or lisin long hem, chusim samting wea bae helpem iu for no duim eniting wea Jehovah heitim. Iumi laek for duim best bilong iumi for “gohed waka hard for garem gudfala konsens front long God.”—Acts 24:16. *

13. Wanem nao iumi laek for stap klia long hem?

¹³ Stap klia long wei for storystory abaotem olketa demon. Iumi laek for followim example bilong Jesus. (1 Pet. 2:21) Bifor Jesus kam long earth, hem stap long heven and hem savve long staka samting abaotem Satan and olketa demon. Bat hem nating laek for storyim wanem olketa demon hia duim. Main wan wea Jesus laek for teach abaotem hem Jehovah, and no Satan. Iumi savve followim  example bilong Jesus taem iumi no spredim olketa story abaotem olketa demon. Bat, iumi showimaot long toktok bilong iumi hao tingting bilong iumi hem “fulap long olketa gudfala toktok” wea hem nao truth.—Sams 45:1.

14-15. (a) Why nao iumi shud no fraetem olketa demon? (b) Wanem pruv nao showimaot Jehovah protectim pipol bilong hem distaem?

¹⁴ No fraetem olketa demon. Long world distaem, olketa nogud samting savve happen long iumi. Olketa accident, sik, or dae savve kasem iumi long enitaem wea iumi no expectim. Bat iumi shud no tingse olketa demon nao kosim datwan. Bible sei: “Enikaen samting hemi save kasem evriwan ya long enikaen taem.” (Eklesiastes 9:11) Jehovah showimaot hem garem bigfala paoa winim olketa demon. Olsem example, God no letem Satan for killim dae Job. (Job 2:6) Long taem bilong Moses, Jehovah showimaot hem garem paoa winim olketa priest wea savve duim magic long Egypt. (Eksodas 8:18; 9:11) Jesus showimaot paoa wea hem kasem from Jehovah taem hem torowem kam daon Satan and olketa demon from heven. And klosap nao Jesus bae torowem Satan and olketa demon insaed long datfala hol wea deep tumas, and olketa bae no savve spoelem eniwan.—Rev. 12:9; 20:2, 3.

¹⁵ Iumi lukim staka pruv wea showimaot Jehovah protectim pipol bilong hem distaem. Tingim diswan, iumi preachim and teachim truth long evri kantri long earth. (Matt. 28:19, 20) Taem iumi duim datwan, iumi showimaot klia olketa nogud samting wea Devil duim. So iumi sure, sapos Satan fit for stopem evri waka bilong iumi, hem bae duim finis, bat hem nating fit for duim datwan. So iumi no need for fraetem olketa demon. Iumi savve hao “[Jehovah] hemi gohed fo lukluk long evri ples long disfala wol, an hemi save strongim olketa pipol hu i tinghevi fo obeim hem.” (Mektu Kronikols 16:9) Sapos iumi faithful long Jehovah, olketa demon hard for spoelem iumi for olowe.

16-17. Storyim example wea showimaot iumi needim wei for no fraet for againstim olketa demon.

¹⁶ For againstim olketa demon, iumi needim wei for no fraet, especially taem olketa  fren or relative againstim iumi bikos olketa tingse samting wea iumi duim bae mekem iumi kasem nogud samting. Bat Jehovah blessim olketa wea no fraet. Tingim example bilong wanfala sista wea nem bilong hem Erica, wea stap long Ghana. Erica hem 21 year taem hem start for studyim Bible. From hem dota bilong wanfala magic priest, olketa expectim hem for followim wanfala kastom wea join witim spiritism and wei for kaikaim meat wea olketa sakrifaesim long olketa god bilong dadi bilong hem. Taem Erica no laek for duim datwan, famili bilong hem sei hem againstim olketa god bilong olketa. Famili bilong hem bilivim hao olketa god hia bae panisim olketa and mekem olketa for sik and mentol.

¹⁷ Famili bilong Erica trae for forcem hem for followim datfala kastom, bat hem no laek for duim datwan nomata datwan minim hem mas lusim famili bilong hem. So hem go stap witim samfala Witness. Datwan hem olsem Jehovah blessim Erica witim wanfala niu famili, wea hem nao olketa brata and sista wea garem sem biliv. (Mark 10:29, 30) Nomata olketa relative bilong hem raosem hem and bonem evri samting wea hem garem, Erica gohed faithful long Jehovah, hem baptaes, and distaem hem kamap regular pioneer. Hem no fraetem olketa demon. Erica sei olsem abaotem famili bilong hem: “Mi prea evriday for famili bilong mi luksavve long blessing wea man kasem from wei for savve long Jehovah and freedom wea kamaot from wei for worshipim God wea barava lovem iumi.”

18. Olketa wanem blessing nao bae iumi kasem from wei for trustim Jehovah?

¹⁸ No evriwan long iumi savve feisim sem kaen test olsem. Bat, iumi evriwan need for againstim olketa demon and trustim Jehovah. Sapos iumi duim olsem, bae iumi kasem staka blessing, and Satan bae no savve laea long iumi. And tu, iumi bae no letem wei for fraetem olketa demon mekem iumi stop for worshipim Jehovah. And main samting nao, iumi bae strongim wei wea iumi fren witim Jehovah. James sei: “Iufala mas stap anda long God and againstim Devil mekem hem ranawe from iufala. Fren gud witim God and bae hem fren gud witim iufala.”—Jas. 4:7, 8.