LONG taem bilong Paul, no eni passenger ship stap. So taem man laek for travel, hem mas askem olketa narawan sapos olketa savve long eni kago ship wea bae go long ples wea hem laek for go long hem, and sapos olketa willing for tekem eni passenger. (Acts 21:2, 3) Sapos wanfala ship bae no go kasem ples wea wanfala passenger laek for kasem, datfala passenger savve followim ship hia go kasem eni port wea klosap lelebet, and then hem lukaotem nara ship moa for go kasem stret ples wea hem laek for kasem.—Acts 27:1-6.

Staka taem, for travel long sea hem depend long season insaed datfala year, and olketa ship no really followim eni schedule. Weather savve delayim gogo bilong ship, and tu, ship savve delay sapos olketa sailor wea bilivim spiritism lukim olketa saen. Olsem example, sapos wanfala bird wea olketa kolem raven krae antap long rope wea sapotim sail bilong ship or sapos olketa lukim ship hem rek long saedsea. Olketa sailor savve lukluk tu for direction bilong wind and then taem wind hem fitim, olketa sail nao. So dastawe, taem passenger faendem ship, hem mas tekem basket bilong hem and go weit long wharf mekem taem hem herem announcement, hem go insaed ship nao.

Wanfala man for raetem history, Lionel Casson, hem sei: “Winim wei for pipol seleva wakabaot for go lukaotem ship long front wharf, Rome hem mekem hem lelebet isi for olketa faendem ship. Port bilong Rome stap front long river long Tiber. Long Ostia, taon wea stap klosap long datfala port, hem garem wanfala big area wea olketa office stap raonem. Samfala ship garem olketa office long there, olsem olketa ship bilong Narbonne [wea distaem olketa kolem France], bilong Carthage [wea distaem olketa kolem Tunisia], and samfala nara ples moa. And eniwan wea lukaotem ship savve go checkim olketa office bilong ship wea bae go long ples wea hem laek for go long hem.”

For travel long ship hem mekem hem isi for man kwiktaem kasem ples wea hem laek go long hem, bat hem savve danger tu. Taem Paul duim missionary waka, samfala taem ship wea hem go insaed, hem rek.—2 Cor. 11:25.