1. Wanem nao iumi evriwan mas duim?

WASWE, iu laek for ran lo wanfala resis wea iu savve hem bae hard, especially sapos iu feel sik or taed? Maet nomoa. Nomata olsem, aposol Paul sei evri tru Christian insaed lo wanfala resis. (Heb. 12:1) And iumi evriwan, nomata iumi young or olo, strong or taed, iumi mas no givap go kasem end sapos iumi laek for kasem datfala prize wea Jehovah promisim.—Matt. 24:13.

2. Olsem 2 Timothy 4:7, 8 storyim, why nao Paul fit for talem disfala advaes?

² Paul fit for talem disfala advaes bikos hem win for “kasem end bilong datfala resis.” (Readim 2 Timothy 4:7, 8.) Bat wanem kaen resis nao Paul story abaotem?

3. Wanem resis nao Paul storyim?

³ Samfala taem Paul iusim example blo olketa game lo Greece bifor for teachim olketa important leson. (1 Cor. 9:25-27; 2 Tim. 2:5) Tu-thri taem, hem markem wei for ran lo wanfala resis witim laef blo wanfala Christian. (1 Cor. 9:24; Gal. 2:2; Phil. 2:16) Wanfala man start for ran lo disfala resis taem hem dedicatem hemseleva lo Jehovah and baptaes. (1 Pet. 3:21) Hem finisim datfala resis taem Jehovah givim hem datfala prize blo laef olowe.—Matt. 25:31-34, 46; 2 Tim. 4:8.

4. Wanem nao iumi bae storyim lo disfala study?

⁴ Lo wanem wei nao laef blo wanfala Christian hem semsem witim wei for ran lo wanfala long-distance resis? Staka samting semsem. Bae iumi storyim thrifala. First samting, iumi need for ran followim stretfala road. Mek-tu, iumi mas putim mind blo iumi for kasem end blo datfala resis, and mek-thri, iumi  mas gohed for ran nomata iumi feisim olketa challenge.

5. Wanem road nao iumi mas followim, and why nao olsem?

⁵ For qualify for tekem prize lo wanfala real resis, olketa wea ran mas followim stretfala road wea olketa wea organizem datfala game markem. Lo sem wei tu, sapos iumi laek for kasem prize blo laef olowe, iumi mas followim stretfala wei wea olketa Christian shud followim. (Acts 20:24; 1 Pet. 2:21) Bat, Satan and olketa wea followim example blo hem, laekem iumi for followim difren wei, olketa laekem iumi for gohed ran witim olketa. (1 Pet. 4:4) Olketa mekfani lo road wea iumi chus for followim and olketa sei road wea olketa followim nao gud, and bae mekem man free. Bat wanem olketa talem hem no tru.—2 Pet. 2:19.

6. Wanem nao iu lanem from example blo Brian?

⁶ Eniwan wea ran witim olketa wea followim world blo Satan, gogo bae hem luksavve dat road wea hem chusim hem no mekem man free, bat hem mekem hem for slave. (Rome 6:16) Tingim example blo Brian. Parents blo hem encouragem hem for followim wei wea olketa Christian shud followim. Bat taem hem teenager, hem tingse datwan bae no mekem hem hapi. Brian disaed for ran witim olketa wea followim standard blo Satan. Hem sei lo datfala taem hem no luksavve freedom wea hem laekem bae mekem hem slave. Hem start for tekem drug, drinkim tumas alcohol, and laef blo hem barava olobaot. Lo olketa year bihaen, hem start for traem olketa strong drug, and gogo hem slave lo staka lo olketa drug hia. And hem start for salem drug for sapotim hemseleva. Gogo, Brian disaed for followim olketa standard blo Jehovah. Brian changem road wea hem followim and hem baptaes lo 2001. Distaem hem barava hapi bikos hem followim nao wei wea olketa Christian shud followim. *

7. Wanem nao tufala road wea iumi savve chusim wea Matthew 7:13, 14 storyim?

⁷ Hem barava important for iumi chusim stretfala road for followim! Satan laekem iumi evriwan for stop for ran followim datfala road wea smol and wea lead go for “laef olowe,” and hem laekem iumi for akros go lo datfala road wea waed and staka pipol lo world followim. Datfala road hem isi for followim and staka nao laekem. Bat hem lead go for “dae.” (Readim Matthew 7:13, 14.) For gohed followim stretfala road and no go difren, iumi mas trustim Jehovah and lisin lo hem.

8. Sapos wanfala man wea ranran hem foldaon, wanem nao hem bae duim?

⁸ Olketa wea ran lo wanfala long-distance resis mas luk stret lo front mekem olketa no foldaon. Nomata olsem, maet eni mistek wea narawan wea olketa ran tugeta duim savve mekem olketa foldaon or maet olketa step lo eni pot-hol. Sapos olketa foldaon, olketa bae getap and ranran moa. Main samting wea olketa tingim hem no samting wea mekem olketa foldaon, bat hem for finisim resis and for kasem datfala prize.

9. Sapos iumi foldaon, wanem nao iumi shud duim?

⁹ Lo resis wea iumi insaed, iumi maet foldaon staka taem, from iumi mistek lo wanem iumi talem or duim. Or maet olketa wea iumi ranran tugeta nao duim mistek wea mekem iumi feel nogud. Iumi shud no sapraes lo datwan. Iumi evriwan no perfect, and iumi evriwan ranran lo sem smol road wea lead go for laef. So samfala taem maet iumi savve “bangam” narawan. Paul sei tu samfala taem iumi bae duim samting wea savve mekem narawan feel nogud. (Col. 3:13) Bat winim wei for tingim olowe samting wea mekem iumi foldaon, iumi laek for tingim nomoa datfala prize wea iumi bae kasem. Sapos iumi foldaon, iumi laek for getap and gohed for ran. Sapos iumi kros and feel nogud and no laek for getap, iumi bae no finisim datfala resis and no kasem datfala prize nao. And tu, maet iumi bae blokem olketa narawan wea trae for ran lo datfala smol road for laef.

10. Hao nao iumi savve stap klia lo wei for mekem narawan foldaon?

¹⁰ Narafala wei wea iumi savve stap klia lo wei for mekem narawan foldaon, hem for letem olketa brata and sista blo iumi duim samting followim tingting blo olketa sapos hem fitim, winim for evritaem laekem olketa for followim tingting blo iumi. (Rome 14:13, 19-21; 1 Cor. 8:9, 13) Diswan hem difren from olketa wea ranran lo real resis. Olketa wea ranran lo real resis, olketa compete againstim narawan, and each wan trae for kasem prize for hemseleva nomoa. Main goal blo olketa hem for winim narawan. So maet olketa trae for pushim aot olketa narawan mekem olketa seleva nao ran lo front. Bat iumi barava difren, iumi no compete againstim narawan.  (Gal. 5:26; 6:4) Goal blo iumi hem for helpem staka pipol for finisim disfala resis witim iumi and for kasem datfala prize for laef. So iumi trae for followim kaonsel blo Paul for “evritaem tingim olketa narawan and no tingim [iumiseleva] nomoa.”—Phil. 2:4.

11. Wanem nao man wea ran lo resis hem tingim, and why nao olsem?

¹¹ Olketa wea ranran lo wanfala real resis savve luk stret lo road front lo olketa, and tingim nomoa for winim datfala resis. Nomata sapos olketa no lukim yet datfala laen lo end blo resis, bat lo mind blo olketa, olketa kasem finis laen and datfala prize. From olketa evritaem tingim datfala prize, datwan mekem olketa gohed strong for ran.

12. Wanem nao Jehovah kaen tumas for givim lo iumi?

¹² Lo resis wea iumi ran insaed, Jehovah kaen tumas for givim pipol blo hem wanfala prize wea olketa sure bae olketa kasem taem olketa finisim datfala resis. Hem nao for laef olowe lo heven or lo paradaes earth. Bible storyim samfala samting abaotem datfala reward mekem iumi savve piksarem lo mind blo iumi hao laef bae barava gud tumas. Taem iumi gohed for tingim future wea Jehovah promisim for iumi, iumi bae no givap.

13. Wanem nao iumi garem wea olketa wea ranran lo real resis no garem?

¹³ Olketa wea ranran lo olketa game lo Greece bifor feisim samfala challenge, olsem for taed tumas and feel pain. Only samting wea bae helpem olketa for win hem training wea olketa kasem and strong blo olketa seleva. Iumi olsem olketa tu bikos iumi kasem training lo hao for ran lo resis wea iumi insaed. Bat iumi garem wanfala samting wea olketa hia no garem. Iumi savve kasem strong from paoa blo Jehovah wea no savve finis. Sapos iumi depend lo Jehovah, hem promis for trainim iumi and strongim iumi tu!—1 Pet. 5:10.

14. Hao nao 2 Corinth 12:9, 10 helpem iumi for feisim olketa challenge?

¹⁴ Paul tu deal witim staka challenge. Olketa pipol tok spoelem and persecutim hem, and samfala taem hem feel wik and mas deal witim samting wea hem sei hem olsem “wanfala nila wea stap long body” blo hem. (2 Cor. 12:7) Bat winim wei for ting lo olketa challenge hia olsem reason for givap, hem ting lo datwan olsem chance for depend lo Jehovah. (Readim 2 Corinth 12:9, 10.) From Paul garem diskaen tingting, Jehovah helpem hem for winim evri hard taem wea kasem hem.

15. Sapos iumi followim example blo Paul, wanem nao bae iumi experiencem?

¹⁵ Maet iumi tu kasem persecution or pipol tok spoelem iumi bikos lo faith blo iumi. Maet iumi tu mas deal witim wei wea health blo iumi hem nogud or iumi savve taed tumas. Bat sapos iumi followim example blo Paul, each wan lo olketa challenge hia savve kamap wanfala chance for experiencem wei wea Jehovah lovem and sapotim iumi.

16. Nomata sapos iu sik and olo, wanem nao iu savve duim?

¹⁶ Waswe, iu leidaon lo bed or iu sidaon lo wheelchair? Waswe, knee blo iu hem wik or eye blo iu hem no mas gud? Sapos olsem, hao, iu savve ran witim olketa wea young and healthy tu? Iu savve duim! Staka wea olo and sik olketa ran lo disfala road for laef. Olketa no duim disfala waka lo strong blo olketa seleva. Bat olketa kasem strong from Jehovah taem olketa lisin lo olketa Christian meeting, thru lo telephone or watchim thru lo video streaming. And olketa preach lo olketa doctor, nurse, and relative.

17. Wanem nao feeling blo Jehovah for olketa wea no savve duim staka samting?

 ¹⁷ No letem wei wea iu no fit for duim staka samting for mekem iu discourage and tingse iu no fit nao for ran lo resis for laef. Jehovah lovem iu bikos lo faith wea iu garem and evri samting wea iu duim for hem. And winim enitaem bifor iu needim help blo hem distaem, and hem bae no lusim iu. (Sams 9:10) Bat, hem bae barava kam klos lo iu. Tingim koment blo wanfala sista wea deal witim olketa problem saed lo health blo hem, hem sei: “From olketa problem saed lo health blo mi kamap staka, mi lukim dat mi no garem staka chance for sharem truth. Bat mi savve dat nomata smol samting wea mi duim hem mekem heart blo Jehovah hapi, and datwan mekem mi hapi.” Taem iu feel discourage, tingim hao iu no stap seleva. Tingim example blo aposol Paul and toktok blo hem wea savve encouragem iumi: “Mi hapi for garem olketa wik point, . . . diswan hem bikos taem mi wik, hem nao taem wea mi strong.”—2 Cor. 12:10.

18. Wanem nao nara challenge wea samfala feisim?

¹⁸ Samfala wea ran lo disfala road for laef feisim narakaen challenge. Olketa deal witim problem wea olketa narawan no savve lukim and maet no minim. Olsem example, olketa mas deal witim wei for stress or olketa garem depression. Why nao challenge wea olketa hia feisim hem hard tumas? Bikos sapos hand blo man hem brek or hem sidaon lo wheelchair, evriwan savve lukim problem wea hem garem and maet datwan muvim olketa for helpem hem. Bat staka taem hem hard for iumi luksavve dat man wea deal witim sik lo mind or feeling, hem safa. Hao hem safa hem semsem nomoa olsem man wea hand blo hem brek, bat bikos pipol no luksavve lo datwan, staka taem hem no kasem love and kea wea hem needim.

19. Wanem nao iumi lanem from example blo Mephibosheth?

¹⁹ Sapos iu no fit for duim staka samting nao and feel olsem olketa narawan no minim iu, example blo Mephibosheth maet encouragem iu. (Mektu Samuel 4:4) Mephibosheth mas deal witim wei wea hem sik, and wantaem King David duim samting wea showimaot hem no minim hem. Olketa problem wea kasem Mephibosheth hem no bikos hem duim eni rong samting. Nomata olsem, hem no letem datwan for mekem hem feel nogud. Hem tinghae lo olketa gud samting wea hem kasem lo laef blo hem. And hem tinghae lo kaenfala fasin wea David showim lo hem bifor. (Mektu Samuel 9:6-10) So taem David treatim hem nogud, Mephibosheth luksavve lo situation wea mekem David for duim datwan. Hem no letem mistek wea David duim for mekem hem  feel nogud. And hem no blamem Jehovah for wanem David duim. Mephibosheth tingim nomoa wanem hem savve duim for sapotim king wea Jehovah nao appointim. (Mektu Samuel 16:1-4; 19:24-30) Jehovah putim example blo Mephibosheth lo Bible mekem iumi savve lane from datwan.—Rome 15:4.

20. Hao nao wei for stress maet affectim samfala, bat wanem nao iumi sure lo hem?

²⁰ Bikos lo wei for barava stress, samfala brata and sista no feel gud for stap witim olketa narawan and duim olketa samting wea narawan savve duim. Olketa maet faendem hem hard for stap midolwan staka pipol, nomata olsem, olketa gohed attendim olketa meeting, assembly, and convention. Nomata olketa faendem hem hard for story lo olketa stranger, olketa savve story lo pipol lo ministry. Sapos diswan kasem iu, tingim dat ino iuseleva nao kasem datwan. Staka pipol tu garem sem feeling olsem. Tingim hao Jehovah hem hapi lo wanem iu duim witim full heart blo iu. Wei wea iu no givap hem pruv wea showimaot hem blessim iu and givim iu strong wea iu needim. * (Phil. 4:6, 7; 1 Pet. 5:7) Sapos iu gohed servem Jehovah nomata iu deal witim sik lo body or feeling wea mekem iu no duim staka samting, iu savve sure iu mekem Jehovah hapi.

21. From Jehovah helpem iumi, wanem nao iumi evriwan fit for duim?

²¹ Iumi barava hapi bikos resis wea Paul storyim hem difren from wanfala real resis. Lo taem blo Bible, only wanfala man nomoa bae winim prize lo wanfala resis. Bat for iumi, evriwan wea faithful for followim wei wea wanfala Christian shud followim bae kasem prize for laef olowe. (John 3:16) And lo wanfala real resis, evriwan wea ranran mas strong, sapos nomoa bae olketa no savve win. Lo resis blo iumi, nomata staka lo iumi no strong for duim samfala samting, iumi gohed and no givap. (2 Cor. 4:16) From Jehovah helpem iumi, iumi evriwan bae ran lo disfala resis go kasem end!