LAEF STORY
“Distaem Mi Enjoyim Preaching Waka!”
MI GROW ap lo South Island blo New Zealand lo wanfala smol taon wea olketa kolem Balclutha. Mami and dadi blo mi teachim mi truth and taem mi pikinini mi lovem Jehovah and mi hapi mi insaed lo truth. Mi laekem tumas olketa brata and sista and mi enjoyim olketa meeting. Nomata mi savve shame, mi hapi for go preaching evri week, and mi no hol bak for preach lo olketa narawan, olsem olketa skulfren. From mi laek for kamap wanfala Jehovah’s Witness, mi dedicate and baptaes taem mi 11 years.
TINGTING BLO MI HEM CHANGE
Start taem mi samting olsem 13 years, isisi mi start for no interest lo olketa spiritual samting. Mi lukim olketa skulfren free for duim eni samting olketa laekem, and mi tu laek for olsem. Mi start for tingse parents blo mi and organization strict tumas, and for go lo olketa meeting and preaching hem hard waka nomoa. Mi bilivim Jehovah hem stap, bat mi wikdaon lo spiritual wei.
From mi no laek inactive, samfala taem nomoa mi go preach. Mi nating prepare, and mi laekem partner blo mi nomoa for story, so mi no garem return visit or Bible study. Datwan mekem mi for no enjoyim preaching waka, and mi ting olsem, ‘Why nao olketa narawan laek for duim preaching waka?’
Taem mi 17 years mi no laek for stap witim parents blo mi, so mi lusim New Zealand and muv go lo Australia. Mami and dadi sorre tumas taem mi lusim tufala. Nomata tufala warim mi, tufala tingse bae mi gohed worshipim Jehovah.
Lo Australia, mi misstim staka meeting. Mi start for fren witim olketa young wan lo kongregeson wea samfala taem nomoa olketa savve go lo meeting tu, then lo weekend mifala savve go drink and dance lo naetclub. Distaem mi luksavve lo datfala taem mi laek for insaed lo truth and insaed lo world, bat mi nating hapi nomoa.
EXAMPLE BLO WANFALA SISTA BARAVA HELPEM MI
Gogo tufala year bihaen, gudfala wei blo wanfala sista helpem mi for stretem tingting blo mi. Lo datfala taem, mi and nara fofala singol sista stap lo wanfala haos. Mifala invaetem circuit overseer and waef blo hem Tamara for kam stap witim mifala for wanfala week. Taem circuit overseer busy lo nara samting, mifala olketa gele and Tamara savve storystory and laflaf tugeta. Mi laekem Tamara bikos hem garem naesfala wei. Mi sapraes wanfala spiritual sista olsem hem savve mekfani and laek spendem taem witim mifala.
Mi lukim Tamara evritaem hapi and hem showimaot hem tinghae lo truth. Hem barava enjoyim preaching waka, and hem duim best blo hem lo waka blo Jehovah. Mi luksavve mi no hapi bikos mi no duim olketa samting hia. Gudfala wei blo Tamara barava helpem mi for laek change. Example blo hem mekem mi tingim samting wea Bible talem: Jehovah laekem iumi wea worshipim hem for “hapi.”—Sams 100:2.
MI ENJOYIM PREACHING WAKA MOA
Mi laek for hapi olsem Tamara, bat mi luksavve mi need for changem staka samting. Hem no isi for duim datwan and hem tek taem. Mi isisi duim samfala samting, olsem mi savve prepare bifor mi go preaching, and samfala month mi auxiliary pioneer. Olketa samting hia helpem mi for no fraet for preach lo pipol. Samting wea helpem mi for enjoyim preaching waka hem from staka taem mi readim scripture lo pipol. Gogo mi auxiliary pioneer evri month.
Mi start for fren witim olketa lo kongregeson wea lovem Jehovah and enjoyim preaching waka, nomata olketa wanem age. Gudfala example blo olketa helpem mi for tinghae moa lo olketa spiritual samting and for readim Bible evriday. Mi barava enjoyim preaching waka, gogo mi start for regular pioneer. Mi hapi for stap lo kongregeson, olsem taem mi smol.
WANFALA BRATA LAEK PIONEER OLOWE WITIM MI
Bihaen wanfala year mi meetim Alex, wanfala naes brata wea lovem Jehovah and enjoyim ministry. Hem ministerial servant and hem pioneer for six year finis. Wanfala taem bifor hem go help lo preaching waka lo Malawi. Hem tinghae lo olketa missionary lo there and olketa encouragem hem for gohed busy lo preaching waka.
Lo 2003, mitufala Alex marit, and mitufala gohed duim full-taem service kasem distaem. Datwan teachim mifala staka samting, and mifala kasem staka blessing from Jehovah.
MIFALA KASEM OLKETA NARA PRIVILEGE
Duim preaching waka lo Gleno, Timor-Leste
Lo 2009, mifala kasem invitation for duim missionary waka lo Timor-Leste, wanfala smol kantri lo olketa island blo Indonesia. Mifala no expectim diswan bat mifala hapi, and lelebet fraet tu. Bihaen faevfala month, mifala arrive lo Dili, wea hem kapitol blo Timor-Leste.
Olketa samting lo Timor-Leste hem barava difren from Australia. Haos blo mifala and kaikai hem difren, and mifala mas lanem niu languis and culture. Taem mifala preach mifala meetim pipol wea barava poor, no skul gud, and laef blo olketa no isi. Mifala meetim tu olketa wea safa yet from nogud samting wea kasem olketa lo war wea gohed lo kantri bifor. *
Pipol lo Timor-Leste interest tumas for herem message abaotem Kingdom! For example, wantaem mi meetim Maria * wea 13 years nomoa. Hem sorre tumas bikos mami blo hem dae tu-thri year bifor and dadi no savve stap kwaet lo haos. So olsem staka pikinini lo there, Maria feel olsem no eniwan lovem hem. Mi tingim wantaem hem trae explainim lo mi feeling blo hem, and hem krae. Bat mi no savve wanem hem talem bikos mi no minim gud yet languis blo hem. Mi prea lo Jehovah mekem mi talem toktok wea bae helpem hem, then mi readim olketa scripture wea barava encouragem hem. Insaed tu-thri year, mi lukim Maria barava change. Hem start for hapi, werem klin kaleko, and changem staka nara samting. Gogo hem baptaes and garem olketa Bible study blo hemseleva. Distaem Maria insaed big spiritual famili wea lovem hem.
Jehovah blessim waka wea gohed lo Timor-Leste. Nomata staka pablisa no insaed lo truth for longfala taem, staka kamap pioneer, ministerial servant, or elder. Olketa narawan duim transleison lo samfala languis lo there. Mi hapi taem mi lukim olketa brata and sista smile olowe, singsing lo olketa meeting, and isisi kamap mature Christian.
Mi witim Alex redi for go lo farawe territory for givimaot invitation for Memorial
LAEF BLO MITUFALA HEM BARAVA GUD
Nomata laef blo mitufala lo Timor-Leste hem barava difren from laef lo Australia, mifala barava enjoyim datfala assignment. Samfala taem mifala mas skwis insaed smol bas wea fulap witim pipol wea garem drae fish and staka vegetable from market. Samfala day, mifala conductim Bible study insaed smol haos wea no garem floor and olketa kokorako kam insaed tu. Haos hem barava hot, and mifala swet tumas. Nomata mifala feisim olketa samting olsem mi tingim, ‘Mi hapi fogud!’
Lo bas for go lo territory
Taem mi ting go bak, mi barava tinghae lo parents blo mi wea gohed teachim mi abaotem Jehovah and sapotim mi nomata mi noti teenager. Samting wea Provebs 22:6 talem hem kamap tru for mi. Mami and dadi blo mi barava tinghae lo waka wea mitufala Alex duim for Jehovah. Start kam lo 2016, mitufala duim circuit waka lo territory blo Australasia branch.
Olketa pikinini hapi for lukim Caleb and Sophia video wea mi showim lo olketa
Mi hard for bilivim lo bifor mi no enjoyim preaching waka. Distaem mi barava enjoyim preaching waka! Mi luksavve nomata iumi mas deal witim samfala hard samting, wanem bae mekem iumi for hapi hem taem iumi worshipim Jehovah lo full heart blo iumi. Mi barava hapi insaed 18 year wea mi duim full-taem service and mitufala Alex worshipim Jehovah tugeta. Distaem mi barava minim toktok blo David wea sei lo Jehovah: ‘Evriwan wea i go long yu fo stap sef, olketa ya nao i hapi bikos yu nao yu mekem olketa barava hapi.’—Sams 5:11.
Mifala hapi for teachim hambol pipol abaotem Bible!
