1-2. Wanem tokpiksa nao helpem iumi for minim iumi savve followim footstep blo Jesus?

TINGIM, iu witim samfala narawan wakabaot lo bush wea mud fogud. Nomata no eni road, man wea leadim iufala savve gud lo bush. Hem wakabaot front lo iufala and iu lukim footstep blo hem lo mud. Seknomoa iu no savve lukim hem nao. Bat iu and olketa narawan no wari bikos iufala savve followim footstep blo hem!

² Iumi olketa Christian wea stap insaed disfala nogud world olsem olketa wea wakabaot lo bush wea samfala part steep, mud, and slippery. Gud samting nao, Jehovah givim Son blo hem Jesus Christ for leadim iumi, and iumi laek for followim footstep blo hem. (1 Pet. 2:21) Wanfala savveman sei, lo 1 Peter 2:21 Peter comparem Jesus witim man wea leadim olketa narawan. Olsem olketa wea wakabaot lo bush followim footstep blo man wea leadim olketa, nomata iumi no lukim Jesus iumi savve followim footstep blo hem. So iumi laek ansarem thrifala kwestin hia: Wanem nao hem minim for followim footstep blo Jesus? Why nao iumi shud followim footstep blo hem? And hao nao iumi savve followim footstep blo Jesus?

3. Wanem nao hem minim for followim footstep blo samwan?

³ Taem Bible storyim footstep, maet hem comparem footstep blo man witim example wea samwan showimaot. Olsem iumi savve followim footstep blo man wea wakabaot go firstaem lo iumi, iumi savve followim example blo samwan wea duim olketa gud samting.

4. Wanem nao hem minim for followim footstep blo Jesus?

 ⁴ So wanem nao hem minim for followim footstep blo Jesus? Hem minim for followim example blo hem. Taem Peter sei for followim footstep blo Jesus, hem minim iumi shud followim example blo Jesus for no givap. Bat iumi savve followim example blo Jesus lo olketa nara samting tu. (1 Pet. 2:18-25) Datwan bikos evri samting wea Jesus duim and talem hem gudfala example for iumi followim.

5. Waswe, iumi savve followim example blo Jesus nomata iumi no perfect? Storyim kam.

⁵ Nomata iumi no perfect, waswe, iumi savve followim example blo Jesus wea perfect? Ia! Taem Peter sei for “followim gud footstep bilong [Jesus]” hem encouragem iumi for traem best for followim example blo Jesus. Aposol John tu talem iumi for “duim sem samting wea [Jesus] duim,” wea minim iumi mas traem best for followim example blo hem.—1 John 2:6.

6-7. Why nao iumi sure taem iumi followim example blo Jesus bae iumi fren gud witim Jehovah?

⁶ Followim example blo Jesus, mekem iumi fren gud witim Jehovah. Wanem nao Jesus duim mekem hem fren gud witim Jehovah? First samting, Jesus evritaem duim samting wea God laekem. (John 8:29) Taem iumi duim wanem God laekem olsem Jesus, datwan bae mekem Jehovah hapi and bae showimaot iumi laek fren witim Jehovah. So Jehovah bae laek fren witim iumi tu.—Jas. 4:8.

⁷ Mek-tu samting, Jesus barava followim example blo Dadi blo hem. Dastawe Jesus fit for sei: “Man wea lukim mi hem lukim Dadi tu.” (John 14:9) Olsem  example, Jesus garem olketa gudfala wei olsem hem sorre lo man wea leprosy, hem tok kaen lo wanfala woman wea barava sik, and hem krae witim olketa fren and relative blo Lazarus wea dae. Taem iumi garem olketa wei olsem Jesus, iumi followim example blo Jehovah tu. (Mark 1:40, 41; 5:25-34; John 11:33-35) From iumi traem best for showimaot olketa wei blo Jesus and Jehovah, iumi bae fren gud witim Jehovah.

8. From iumi followim example blo Jesus, hao nao datwan savve helpem iumi for “winim” world?

⁸ Followim example blo Jesus, mekem olketa samting lo world no savve switim iumi. Lo naet bifor Jesus dae, hem fit for sei: “Mi winim world finis.” (John 16:33) Datwan showimaot Jesus no letem tingting blo pipol lo world, goal blo olketa, and wanem olketa laekem for switim hem. Hem evritaem tingim hem kam lo earth for mekhae lo nem blo Jehovah. Waswe, iumi followim example blo Jesus? Staka samting lo world savve switim iumi. Bat sapos iumi evritaem tingim wanem Jehovah laekem, olsem Jesus duim, iumi tu bae fit for sei iumi “winim” disfala world.—1 John 5:5.

9. Wanem nao iumi savve duim for kasem laef olowe?

⁹ Followim example blo Jesus, mekem iumi kasem laef olowe. Taem wanfala young man wea rich askem Jesus wanem nao hem mas duim for kasem laef olowe, Jesus sei: “Iu kam followim mi.” (Matt. 19:16-21) Jesus talem samfala Jew tu wea no bilivim hem datfala Christ, ‘Olketa sheepsheep bilong mi followim mi. Bae mi mekem olketa laef olowe.’ (John 10:24-29) And taem Nicodemus, wanfala bigman blo olketa Jew, laek for minim gud olketa teaching blo Jesus, Jesus sei olketa wea “showimaot faith long hem” bae “kasem laef olowe.” (John 3:16) So iumi showimaot faith lo Jesus taem iumi followim olketa teaching and example blo hem. Datwan bae helpem iumi for kasem laef olowe.—Matt. 7:14.

10. Why nao iumi mas “lane abaotem” Jesus? (John 17:3)

¹⁰ Bifor iumi savve followim gud example blo Jesus, iumi mas lane abaotem hem. (Readim John 17:3.) Iumi savve gohed “lane abaotem” Jesus taem iumi lanem staka samting abaotem tingting and wei blo hem. Nomata iumi stap lo truth for longtaem finis, iumi mas gohed lane abaotem Jehovah and Son blo hem.

11. Wanem nao olketa Gospel storyim?

¹¹ Jehovah mek sure olketa Gospel (Matthew, Mark, Luke, and John) stap lo  Bible for helpem iumi lane abaotem Son blo hem. Fofala buk hia storyim laef and ministry blo Jesus, wanem Jesus story abaotem, wanem hem duim, and feeling blo hem abaotem olketa samting. Olketa Gospel helpem iumi for “ting raonem” example blo Jesus. (Heb. 12:3) So taem iumi studyim fofala Bible buk hia, datwan bae helpem iumi for savve gud lo Jesus, and followim example blo hem.

12. Hao nao iumi savve lanem staka gud samting from olketa Gospel?

¹² Hem important for spendem taem for readim, studyim, and ting raonem olketa Gospel mekem iumi lanem staka gud samting. (Josua 1:8.) Distaem iumi storyim wanem bae helpem iumi for ting raonem and followim wanem iumi readim lo olketa Gospel.

13. Wanem nao bae helpem iu for piksarem story iu readim lo olketa Gospel?

¹³ First samting, piksarem lo mind story iumi readim lo Gospel. Tingim iu lo there, and tingim wanem iu maet lukim and herem. Samting wea bae helpem iu hem for duim research lo olketa pablikeson blo iumi. Ting raonem olketa samting wea happen bifor or bihaen lo story hia. Duim research abaotem pipol and olketa ples lo datfala story. Comparem wanem olketa nara Gospel talem abaotem datfala story bikos samfala taem olketa nara Gospel talem samting wea no insaed lo Gospel wea iu readim.

14-15. Wanem nao bae helpem iumi for followim wanem iumi lanem from olketa Gospel?

¹⁴ Mek-tu samting, followim wanem iumi lanem from story lo Gospel. (John 13:17) Bihaen iumi readim wanfala story lo olketa Gospel, hem gud for tingim tufala kwestin hia: ‘Hao nao mi savve followim wanem mi lanem from disfala story? Hao nao mi savve iusim story hia for helpem narawan?’ Tingim samwan wea bae kasem gudfala samting from datfala story,  then lukaotem chance for storyim datwan lo kaenfala wei lo hem.

¹⁵ Distaem bae iumi iusim wanfala story lo olketa Gospel for helpem iumi savve hao for duim tufala samting hia. Datfala story hem abaotem wanfala widow woman wea poor, wea Jesus lukim lo temple.

16. Wanem nao iu piksarem lo mind taem iu readim Mark 12:41?

¹⁶ Piksarem story lo mind. (Readim Mark 12:41.) Tingim, date hem Nisan 11, 33 C.E., wea hem tu-thri day nomoa bifor Jesus bae dae. Lo datfala day Jesus gohed for teach lo temple, bat samfala bigman blo religion askem hem hu nao givim paoa lo hem, and olketa narawan askem hem olketa kwestin wea olketa tingse Jesus bae hard for ansarem. (Mark 11:27-33; 12:13-34) Bihaen datwan, Jesus go lo nara ples insaed lo temple wea olketa kolem Court of the Women. Olketa contribution box stap lo there, so Jesus sidaon and lukluk taem pipol kam putim contribution insaed lo olketa box. Pipol wea rich putim staka coin insaed lo box. From hem sidaon klosap, maet hem herem saond blo olketa coin wea foldaon insaed lo box.

17. Wanem nao widow woman wea Mark 12:42 storyim duim?

¹⁷ Readim Mark 12:42. Gogo, Jesus lukim wanfala “widow woman wea poor tumas” hem kam. (Luke 21:2) From hem poor, laef blo hem no isi and maet hem no savve peim evri samting hem needim. Nomata olsem, hem go putim tufala smol coin lo contribution box. From tufala coin no hevi maet hem no mekem eni saond taem olketa foldaon insaed lo box, bat Jesus lukim tufala coin hia wea olketa kolem lepta coin. Tufala coin no fit for peim wanfala smol bird for kaikaim, nomata datkaen bird hem cheap tumas.

18. Lo Mark 12:43, 44, wanem nao Jesus talem olketa disaepol abaotem selen wea widow woman givim?

¹⁸ Readim Mark 12:43, 44. Jesus barava tinghae lo wanem disfala widow woman duim. So hem kolem kam olketa disaepol blo hem and sei lo olketa: “Selen wea disfala widow woman givim, hem barava winim nao selen wea evri narawan givim.” Then Jesus sei moa: “Olketa [wea rich] givim lelebet nomoa long staka selen wea olketa garem, bat disfala woman, nomata hem poor, givim evri selen wea hem garem.” Taem disfala faithful widow woman givim last selen blo hem for datfala day, hem showimaot hem trustim Jehovah bae provaedem need blo hem.—Sams 26:3.

19. Wanem nao iumi lanem from wanem Jesus talem abaotem datfala widow woman?

¹⁹ Followim wanem iumi lanem from disfala story. Wanem nao iumi lanem from wanem Jesus talem abaotem datfala widow woman? Tingim, maet datfala widow laek for givim staka selen lo Jehovah, bat hem duim samting wea hem fit for duim, and givim best blo hem for Jehovah. And Jesus savve Jehovah tinghae lo contribution blo datfala woman. So important leson for iumi hem olsem: Taem iumi duim samting from full heart and full soul blo iumi and duim best blo iumi, datwan mekem Jehovah barava hapi. (Matt. 22:37; Col. 3:23) Jehovah hapi taem hem lukim iumi duim wanem iumi fit for duim for worshipim hem, olsem for duim best  blo iumi lo ministry and for go lo olketa meeting.

20. Hao nao iumi savve iusim story abaotem widow woman for helpem narawan?

²⁰ Hao nao iumi savve iusim datfala story abaotem widow woman for helpem narawan? Iumi savve tingim samfala lo kongregeson wea maet tingse Jehovah no hapi lo olketa. For example, maet iu tingim wanfala olo sista wea sik and no strong, and hem feel sorre bikos hem no fit for duim staka samting lo ministry olsem hem duim bifor. Or maet iu tingim wanfala brata wea needim encouragement bikos hem no savve go lo evri meeting from hem sik witim pain lo body. Iu savve talem “gudfala toktok for strongim and helpem olketa” hia. (Eph. 4:29) Storyim samting iu lanem from story blo datfala widow woman. Datwan savve helpem olketa for luksavve Jehovah hem hapi taem iumi duim best blo iumi. (Provebs 15:23; 1 Thess. 5:11) Nomata maet olketa tingse samting olketa duim hem smol nomoa, taem iumi praisem olketa from olketa duim best for Jehovah, iumi followim example blo Jesus for tinghae lo wanem narawan duim.

21. Disfala study mekem iu for laek duim wanem?

²¹ Iumi hapi tumas from iumi savve lanem staka samting lo olketa Gospel abaotem laef blo Jesus. Datwan savve helpem iumi for followim example blo Jesus! Bae hem gud for studyim olketa Gospel lo Famili Worship or taem iu duim study seleva. For kasem gud samting from datwan iumi need for piksarem olketa story lo mind and followim wanem iumi lanem. Iumi laek for followim wanem Jesus duim, bat hem important tu for followim olketa samting wea hem talem. Lo next article, bae iumi storyim wanem iumi savve lanem from lastfala toktok blo Jesus.