1. Why nao Jehovah leadim iumi kam lo truth?

JEHOVAH GOD “hapi tumas long yumi olketa pipol blong hem.” (Sams 149:4) Iumi hapi for savve lo datwan! Jehovah leadim iumi kam lo truth bikos hem lukim olketa gudfala wei blo iumi, and luksavve iumi fit for changem samfala samting. Sapos iumi gohed faithful, bae hem fren blo iumi for olowe!—John 6:44.

2. Why nao samfala tingse Jehovah no lovem olketa?

² Maet samfala garem tingting olsem, ‘Mi savve Jehovah lovem pipol blo hem bat waswe, hem lovem mi tu?’ Why nao maet olketa ting olsem? Tingim example blo Oksana * wea taem hem pikinini samfala nogud samting happen lo hem. Hem sei: “Taem mi baptaes mi barava hapi and gogo mi pioneer. Bat taem mi samting olsem 30 years, mi start for tingim olketa nogud samting wea happen lo mi taem mi smol. Datwan mekem mi tingse mi nogud nao and Jehovah no hapi lo mi.” Nara example hem Yua, wanfala pioneer sista wea kasem hard samting tu taem hem pikinini. Hem sei: “Mi dedicate and baptaes bikos mi laek mekem Jehovah hapi. Bat mi tingse Jehovah hard for lovem kaen man olsem mi.”

3. Wanem nao bae iumi storyim lo disfala article?

³ Maet olsem tufala sista hia, iu lovem Jehovah bat iu tingse Jehovah no lovem iu. Why nao hem important for savve Jehovah lovem iu? And wanem nao bae helpem iu  sapos iu tingse Jehovah hard for lovem iu? Distaem bae iumi ansarem olketa kwestin hia.

4. Wanem nao savve happen sapos iumi tingse Jehovah no lovem iumi?

⁴ Hem important for luksavve Jehovah lovem iumi bikos nomata iumi deal witim olketa hard samting bae iumi laek for gohed worshipim Jehovah. Bat sapos iumi tingse God no lovem iumi, datwan savve mekem iumi for wikdaon. (Provebs 24:10) And taem iumi wikdaon, hem isi nao for Satan attakim iumi.—Eph. 6:16.

5. Wanem nao happen lo samfala wea tingse God no lovem olketa?

⁵ From samfala brata and sista tingse Jehovah no lovem olketa, datwan mekem olketa for wikdaon. For example, James, wanfala elder sei: “Nomata mi waka lo Bethel and mi enjoyim preaching waka lo kongregeson wea iusim nara languis, mi start for tingse Jehovah no hapi lo wanem mi duim. Gogo, mi tingse Jehovah no laek herem olketa prea blo mi.” Eva, wea insaed full-taem service sei tu: “Taem mi tingse Jehovah no lovem mi, datwan mekem mi for barava wikdaon. Mi start for no enjoyim olketa spiritual samting and laek for givap.” Michael, wanfala regular pioneer and elder sei: “Taem iumi tingse God no lovem iumi, maet isisi iumi lusim Jehovah.”

6. Wanem nao iumi shud duim sapos iumi start for tingse God no lovem iumi?

⁶ Olketa example hia showimaot sapos iumi tingse God no lovem iumi, datwan savve mekem iumi for wikdaon. So wanem nao iumi shud duim sapos iumi start for tingse God no lovem iumi? Iumi mas stretawe aotem datfala tingting! Askem Jehovah for changem tingting blo iumi and for givim iumi ‘peace bilong God wea bae gaedem heart and tingting bilong iumi.’ (Sams 139:23; Phil. 4:6, 7) Hem no iumiseleva nomoa savve ting daonem seleva. Samfala brata and sista tu deal witim datwan. And tu, Bible storyim samfala wea garem tingting olsem. Distaem bae iumi storyim wanem iumi savve lanem from aposol Paul.

7. Wanem nao samfala samting wea Paul deal witim?

⁷ Sapos iu wanfala elder, maet iu garem staka waka and samfala taem iu tingse hem big tumas. Sapos olsem, bae iu minim feeling blo Paul wea “wari tumas abaotem olketa kongregeson.” (2 Cor. 11:23-28) Or sapos iu sik, maet datwan mekem iu no hapi. Paul tu garem sik wea olsem ‘nila wea stap long body bilong hem,’ and hem barava laekem sik hia for finis. (2 Cor. 12:7-10) Or maet iu ting daonem iuseleva. Samfala taem Paul tu savve feel olsem, and hem sei hem “iusles man nomoa.”—Rome 7:21-24.

8. Wanem nao helpem Paul for no laek givap?

⁸ Paul deal witim staka hard samting. Nomata olsem hem gohed worshipim Jehovah. Wanem nao helpem hem for no givap? Paul hem man wea sin, bat bikos lo dae blo Jesus hem savve God forgivim hem. Hem savve tu lo promis blo Jesus wea sei ‘evriwan wea showimaot faith long Jesus bae kasem laef olowe.’ (John 3:16; Rome 6:23) From Paul showimaot faith lo ransom sakrifaes blo Jesus, nomata hem duim bigfala sin from hem repent, hem sure Jehovah forgivim hem.—Sams 86:5.

9. Wanem nao toktok blo Paul lo Galatia 2:20 showimaot?

⁹ Nara samting, Paul sure God lovem hem bikos God sendem Jesus for dae for hem and olketa narawan. (Readim Galatia 2:20.) Hem sei ‘Son bilong God lovem mi and dae for sevem mi.’ Datwan showimaot Paul savve Jehovah lovem hem. And Paul luksavve Jehovah lovem olketa narawan tu, dastawe hem sei lo olketa blo Rome: “Christ hem dae for iumi taem iumi sin yet.” (Rome 5:8) God lovem iumi evriwan!

10. Wanem nao iumi lanem from Rome 8:38, 39?

¹⁰ Readim Rome 8:38, 39. Paul barava sure no eni samting ‘savve stopem iumi for no kasem love bilong God.’ Paul savve Jehovah patient and showimaot mercy lo olketa Israelite bifor, and Jehovah showimaot mercy lo hem tu. So Paul luksavve from Jehovah sendem kam Jesus for dae for hem, no eni samting savve stopem Paul for kasem love blo Jehovah.—Rome 8:32.

11. Nomata Paul duim olketa sin wea 1 Timothy 1:12-15 storyim, why nao hem sure God lovem hem?

 ¹¹ Readim 1 Timothy 1:12-15. Maet Paul feel shame taem hem tingim olketa nogud samting wea hem duim bifor. Hem sei hem nao “worst wan” lo olketa wea sin! Bifor Paul kamap Christian, hem persecutim olketa Christian, hem putim samfala lo prison, and hem agree for olketa killim dae samfala. (Acts 26:10, 11) Tingim sapos bihaen Paul kamap Christian hem meetim wanfala pikinini blo wanfala Christian olsem, maet hem bae feel shame. Paul sorre lo wanem hem duim bifor, bat hem savve hem hard for changem datwan. Nomata olsem, hem sure God forgivim hem bikos hem sei: “From God hem kaen long mi nao mi duim disfala waka.” (1 Cor. 15:3, 10) Samting iumi savve lanem from diswan, hem hao Christ hem dae for iumi wanwan mekem iumi fren gud witim Jehovah. (Acts 3:19) God no gohed tingim nogud samting wea iumi duim bifor bikos hem forgivim iumi. Hem tingim nomoa wanem iumi duim distaem and wanem iumi bae duim lo future.—Aesaea 1:18.

12. Hao nao toktok lo 1 John 3:19, 20 savve helpem iumi sapos iumi feel guilty and tingse God no lovem iumi?

¹² Taem iu ting raonem hao Jesus hem dae for mekem iu kasem forgiveness for olketa sin blo iu, maet iu tingse, ‘Kaen man olsem mi no fit for kasem datwan.’ Why nao maet iu ting olsem? Olsem Bible talem, heart blo iumi savve mekem iumi feel guilty, then bae iumi tingse God no lovem iumi. (Readim 1 John 3:19, 20.) Nomata iumi garem kaen  feeling olsem, iumi need for luksavve “God hem savve gud long iumi winim iumiseleva” and hem lovem and forgivim iumi. Iumi need for changem tingting blo iumi and acceptim hao Jehovah lovem iumi. Samting wea savve helpem iumi hem for readim Bible evriday, prea evritaem, and spendem taem witim olketa brata and sista. Why nao hem barava important for duim olketa samting hia?

13. Taem iumi readim Bible evriday, hao nao datwan savve helpem iumi? (Lukim tu box “ Hao Bible Helpem Olketa.”)

¹³ Readim Bible evriday, and bae iu lanem staka samting abaotem olketa naesfala wei blo Jehovah. And tu, bae iu luksavve hem barava lovem iu. Bihaen iu readim samting lo Bible and ting raonem datwan, hem savve stretem tingting blo iu and helpem iu for luksavve Jehovah lovem iu. (2 Tim. 3:16) Kevin, wanfala elder wea savve ting daonem hemseleva sei: “Taem mi readim Sams 103 and ting raonem, datwan helpem mi for barava luksavve Jehovah lovem mi.” Eva wea iumi storyim bifor sei: “Taem hem kwaet lo evening, mi ting raonem olketa naesfala wei blo Jehovah. Diswan strongim faith blo mi and mi garem peace lo mind.”

14. Hao nao prea savve helpem iumi?

¹⁴ Prea evritaem. (1 Thess. 5:17) Iumi savve kamap gudfala fren witim narawan sapos iumi story witim hem evriday. So for fren gud witim Jehovah iumi need for story witim hem evritaem. Taem iumi storyim lo Jehovah feeling, tingting, and wanem iumi warim, iumi showimaot iumi luksavve hem lovem iumi and iumi trustim hem. (Sams 94:17-19; 1 John 5:14, 15) Yua, wea iumi storyim bifor sei: “Taem mi prea, mi no storyim nomoa wanem hem happen lo datfala day olsem wanfala report, bat mi storyim feeling blo mi lo Jehovah. Gogo mi luksavve Jehovah no olsem big boss lo wanfala company, bat hem Dadi wea barava lovem olketa pikinini blo hem.”—Lukim box “ Waswe, Iu Readim Finis?”

15. Wanem nao showimaot Jehovah tingim iumi wanwan?

¹⁵ Spendem taem witim olketa brata and sista. Olketa lo kongregeson olsem present from Jehovah. (Jas. 1:17) Jehovah showimaot hem tingim iumi wanwan from hem givim iumi wanfala spiritual famili lo olketa brata and sista wea lovem iumi. (Provebs 17:17) Lo leta  wea Paul raetem for olketa lo Colossae, hem talem nem blo samfala wea “barava comfortim” hem. (Col. 4:10, 11) Christ Jesus tu needim and tinghae lo olketa angel and olketa fren wea helpem and sapotim hem.—Luke 22:28, 43.

16. Hao nao olketa brata and sista savve helpem iumi luksavve Jehovah lovem iumi?

¹⁶ Taem iumi feel wikdaon, hem gud for askem olketa brata and sista lo kongregeson for helpem iumi. Diswan no minim iumi no garem strong faith, bat for duim olsem savve helpem iumi for no givap. Tingim wanem James talem, datfala elder wea iumi storyim bifor. Hem sei: “From mi fren gud witim olketa mature Christian, olketa barava helpem mi. Lo olketa taem mi ting daonem miseleva, olketa fren hia lisin lo mi and talem mi olketa lovem mi. Datwan mekem mi luksavve Jehovah tingim and lovem mi tu.” So hem barava important for fren gud witim olketa brata and sista lo kongregeson!

17-18. Hu nao iumi shud trustim, and why nao olsem?

¹⁷ Satan laekem iu for no gohed duim wanem Jehovah laekem. Hem laekem iu for tingse Jehovah no lovem iu and iu no fit for kasem laef olowe. Bat olsem iu lanem, datwan hem nating tru.

¹⁸ Jehovah lovem iu and tinghae lo iu. Sapos iu obeyim hem, bae iu “gohed kasem gud samting from love bilong” hem for olowe, olsem Jesus. (John 15:10) So no bilivim laea blo Satan or gohed for ting daonem iuseleva, bat trustim Jehovah bikos hem lukim olketa gudfala wei blo iu. Iumi sure Jehovah “hapi tumas long yumi olketa pipol blong hem”!