Why nao taem Jesus klosap for dae hem quotem toktok blo David wea stap lo Sams 22:1?

Wanfala samting wea Jesus talem bifor hem dae hem stap lo Matthew 27:46. Hem sei: “God bilong mi, God bilong mi, why nao iu lusim mi?” Taem Jesus talem datfala toktok, hem quotem wanem David talem lo Sams 22:1. (Mark 15:34) Datfala toktok no showimaot Jesus lusim faith lo Jehovah. Jesus minim gud why God askem hem for dae and hem willing for duim datwan. (Matt. 16:21; 20:28) Hem savve tu Jehovah bae no stopem hem for dae. (Job 1:10) Jehovah letem Jesus for dae for pruvim hem bae faithful lo Jehovah nomata hem mas dae.—Mark 14:35, 36

So why nao Jesus quotem toktok wea stap lo Sams 22? Maet hem for olketa reason wea iumi bae storyim. *

Maet hem from Jesus luksavve Jehovah bae no stopem hem for dae. Jesus savve hem mas peim datfala ransom and Jehovah bae no helpem hem lo datfala taem. Jesus savve hem mas dae mekem hem sevem evriwan.—Heb. 2:9.

Maet hem from Jesus laek mekhae lo evri toktok lo Sams 22. Hem wei blo olketa Jew for baeheartim olketa Psalm.  Taem olketa herem wanfala verse insaed wanfala Psalm, maet hem mekem olketa tingim olketa nara verse insaed Psalm hia. So taem olketa Jew herem Jesus quotem Sams 22:1, olketa maet tingim olketa nara profesi abaotem dae blo hem lo Sams 22. (Sams 22:7, 8, 15, 16, 18, 24) Nara samting lo end blo Sams 22, olketa verse hia mekhae lo Jehovah and sei bae hem King ovarem full earth.—Sams 22:27-31.

Maet hem from Jesus laek talemaot hem no duim eni rong samting. Olketa bigman blo Jew no followim law taem olketa kotem Jesus and sei hem mas dae bikos hem tok spoelem God. (Matt. 26:65, 66) Olketa kotem hem lo naet nomata datwan no followim law. (Matt. 26:59; Mark 14:56-59) So hem fitim for Jesus laekem olketa narawan for savve hem no duim eni rong samting wea mekem hem fit for dae.

Maet hem from Jesus laek helpem olketa narawan for luksavve, nomata David wea raetem datfala Sams hem safa, hem no minim Jehovah les lo David. Taem David askem God why nao God lusim hem, datwan no minim David no garem faith. Bihaen David askem datfala kwestin hem talem toktok wea showimaot hem trustim Jehovah bae sevem pipol blo hem, and Jehovah gohed for blessim hem. (Sams 22:23, 24, 27) Nomata Jesus, datfala “Son bilong David,” safa tu taem hem hange lo post, datwan no minim Jehovah no hapi lo hem.—Matt. 21:9.

Maet hem from Jesus savve nomata Jehovah laek for protectim hem, Jehovah mas letem hem for dae. Jehovah no laekem Son blo hem for safa and dae. Bat bihaen Adam and Eve bighed, Jehovah need for duim samting for sevem iumi olketa man. So nomata Jesus no duim eni rong samting, hem mas safa and dae for baem bak iumi, and for pruvim Satan hem man for laea. (Mark 8:31; 1 Pet. 2:21-24) Jesus luksavve for duim datwan Jehovah mas letem hem for dae.

Maet hem from Jesus trae for helpem olketa follower blo hem for ting raonem why Jehovah letem hem for dae olsem wanfala criminal. * From Jesus bae dae lo post hem savve staka Jew bae ting lo hem olsem wanfala criminal. (1 Cor. 1:23) Jesus laekem olketa follower blo hem for luksavve hem dae for sevem pipol and no from hem wanfala criminal.—Gal. 3:13, 14.

Nomata wanem nao reason Jesus quotem toktok from Sams 22:1, hem savve hem duim wanem Jehovah laekem hem for duim. Dastawe, bihaen Jesus talem datfala toktok hem sei: “Mi duim finis evri samting wea iu askem mi for duim!” (John 19:30; Luke 22:37) From Jehovah stop for helpem Jesus for lelebet taem, datwan givim chance lo Jesus for pruvim hem faithful go kasem taem hem dae. And tu, datwan mekem “evri samting wea law bilong Moses and olketa Psalm and raeting bilong olketa profet talem abaotem hem” kamap tru.—Luke 24:44.