STUDY ARTICLE 18
Hao for Markem and Kasem Olketa Spiritual Goal
“Ting raonem olketa samting hia and tingting strong long olketa mekem evriwan lukim wei wea iu gohed for kamap strongfala Christian.”—1 TIM. 4:15.
SONG 84 Duim Moa Samting
ARTICLE BAE STORYIM a
1. Wanem nao samfala spiritual goal wea iumi savve markem?
FROM iumi lovem Jehovah, iumi laek for duim best blo iumi lo evri samting wea iumi duim for hem. Samting wea bae helpem iumi hem for markem olketa spiritual goal, olsem for garem olketa gudfala wei, lanem hao for duim samfala samting, or tingim olketa wei for helpem narawan. b
2. Why nao iumi shud markem olketa spiritual goal and waka hard for kasem?
2 Why nao iumi shud laek for markem olketa spiritual goal? Main reason hem for mekem Jehovah hapi. Hem hapi taem hem lukim iumi iusim savve blo iumi for duim waka blo hem. And tu, taem iumi kasem olketa spiritual goal bae iumi fit for helpem olketa brata and sista. (1 Thess. 4:9, 10) Nomata iumi stap lo truth for longtaem finis, iumi savve markem olketa spiritual goal. Distaem bae iumi storyim hao iumi savve duim datwan.
3. Lo 1 Timothy 4:12-16, wat nao aposol Paul encouragem Timothy for duim?
3 Taem aposol Paul raet go lo Timothy, nomata hem young hem wanfala elder finis. Nomata olsem, Paul encouragem hem for markem samfala spiritual goal. (Readim 1 Timothy 4:12-16.) Paul laekem Timothy for markem tufala difren kaen goal. Wanfala hem for garem olketa gudfala wei, olsem for garem love, faith, and klinfala wei. And nara samting, hem for kamap gud saed lo reading, encouragem narawan, and for teach. Bae iumi storyim hao example blo Timothy showimaot, taem iumi markem olketa spiritual goal datwan savve helpem iumi for duim gud waka blo Jehovah. Bae iumi storyim tu hao iumi savve duim moa samting lo ministry.
MARKEM GOAL FOR GAREM OLKETA GUDFALA WEI
4. Olsem Philippi 2:19-22 storyim, why nao Jehovah iusim Timothy for duim staka samting?
4 From Timothy garem gudfala wei, Jehovah iusim hem for duim staka samting. (Readim Philippi 2:19-22.) Paul tinghae lo Timothy bikos hem hambol, faithful, waka hard, and Paul savve depend lo hem. Timothy showimaot love lo olketa brata and sista and evritaem tingim olketa. From datwan, Paul lovem Timothy and trustim hem for duim samfala assignment wea no isi. (1 Cor. 4:17) Olsem tu, taem iumi garem olketa gudfala wei, Jehovah bae lovem iumi and iumi savve duim staka samting for helpem olketa brata and sista.—Sams 25:9; 138:6.
Ting abaotem wanfala wei blo iu wea iu laek for kamap gud lo hem (Lukim paragraf 5-6)
5. (a) Hao nao bae iu luksavve lo wanfala wei blo iu wea iu need for waka lo hem? (b) Olsem iumi lukim lo piksa, wanem nao sista hia duim wea showim hem waka lo goal blo hem for tingim narawan?
5 Markem goal. Prea and ting abaotem samfala wei blo iu wea iu laek for kamap gud lo hem. Then chusim wanfala wea iu laek for waka lo hem. For example, maet iu laek duim moa samting for helpem olketa brata and sista from iu tingim olketa. Or maet iu laek traem best for stap gud witim olketa narawan and forgivim olketa. Maet hem gud for askem wanfala klos fren for talem eni samting wea iu savve waka lo hem.—Provebs 27:6.
6. Hao nao iumi savve kasem goal for kamap gud lo wanfala wei blo iumi?
6 Waka hard for kasem goal blo iu. Wanfala samting iu savve duim, hem for studyim datfala wei wea iu laek for kamap gud lo hem. Sapos iu faendem hard for forgivim narawan and iu laek for waka lo datwan, iu savve readim and ting raonem example blo samfala lo Bible wea willing for forgivim narawan and olketa wea no willing for forgive. For example, Jesus willing for forgivim olketa narawan. (Luke 7:47, 48) Hem no tingim wik point blo olketa bat hem tingim wanem olketa fit for duim. Bat olketa Pharisee barava difren bikos olketa savve “ting daonem nara pipol.” (Luke 18:9) Taem iumi ting raonem tufala example hia, tingim: ‘Taem mi tingim narawan, waswe, mi tingim gud saed blo hem or wik point blo hem nomoa?’ Sapos hem no isi for forgivim samwan, raetem list blo olketa gudfala wei blo hem. Then tingim: ‘Hao nao Jesus bae ting lo disfala man? Hao, bae hem forgivim hem?’ Sapos iumi duim olsem, datwan savve helpem iumi for changem tingting blo iumi abaotem hem. Maet firstaem hem no isi for forgivim samwan wea mekem iumi feel nogud, bat sapos iumi gohed waka hard lo datwan gogo bae iumi forgivim hem.
LANEM HAO FOR DUIM SAMFALA SAMTING
Volunteer for lanem hao for duim maintenance lo Kingdom Hall blo iu (Lukim paragraf 7) e
7. Olsem Provebs 22:29 storyim, hao nao Jehovah iusim olketa wea garem bigfala savve distaem?
7 Nara goal iu savve markem hem for kamap gud lo samting wea bae helpem organization. Tingim, organization needim staka wakaman for buildim olketa Bethel Office, Assembly Hall, and Kingdom Hall. Staka lo olketa hia lanem hao for duim disfala waka from olketa waka witim olketa brata and sista wea garem experience. Olsem iumi lukim lo piksa, olketa brata and sista lanem hao for duim maintenance lo olketa Assembly Hall and olketa Kingdom Hall. Jehovah God wea hem “King for olowe” and Christ Jesus wea hem “King bilong olketa . . . king,” duim olketa nambawan samting from tufala iusim olketa brata and sista wea garem bigfala savve. (1 Tim. 1:17; 6:15; readim Provebs 22:29.) Iumi laek for waka hard and iusim savve blo iumi for mekhae lo Jehovah, and no iumiseleva.—John 8:54.
8. Hao nao bae iu luksavve lo wanfala samting wea iu savve kamap gud lo hem?
8 Markem goal. Wanem samting nao iu savve kamap gud lo hem? Askem olketa elder and maet circuit overseer for eni samting wea iu savve kamap gud lo hem. If olketa sei for iu kamap gud lo hao for givim tok and hao for teach, askem olketa for givim iu wanfala point for waka lo hem. Then waka hard for kamap gud lo hem. Wanem nao savve helpem iu for duim diswan?
9. Wanem nao bae helpem iu for kamap gud lo wanfala samting?
9 Waka hard for kasem goal blo iu. If iu laek for kamap gud lo hao for teach, hem gud for studyim datfala brochure Gohed Waka Hard for Read and Teach Gud. Sapos iu kasem assignment for duim wanfala part lo midol week meeting, askem wanfala experience brata for lisin lo tok blo iu firstaem and for givim iu samfala idea lo eni samting iu savve kamap gud lo hem. Preparem gud eni part wea iu kasem mekem olketa brata and sista luksavve iu man wea waka hard and olketa fit for trustim iu.—Provebs 21:5; 2 Cor. 8:22.
10. Hao nao example blo Garry savve helpem iumi?
10 Wat nao bae iu duim sapos iu laek for kamap gud lo samting wea hem no isi for iu duim? No givap! Wanfala brata wea nem blo hem Garry no savve read gud. Hem savve shame tumas taem hem read lo olketa meeting. Bat hem gohed waka hard for kamap gud lo reading. Hem sei from training wea hem kasem, distaem hem savve givim tok lo Kingdom Hall, lo olketa circuit assembly, and convention!
11. Olsem Timothy, wanem nao bae helpem iumi for duim samfala samting moa lo waka blo Jehovah?
11 Nomata Bible no talem Timothy hem kamap nambawan speaker and teacher, iumi sure from hem followim advaes blo Paul hem duim gud olketa assignment wea hem kasem. (2 Tim. 3:10) Olsem tu, sapos iumi kamap gud lo olketa spiritual samting, datwan bae helpem iumi for duim moa samting for Jehovah.
TINGIM OLKETA WEI FOR HELPEM NARAWAN
12. Wanem nao samfala samting wea olketa brata and sista duim for helpem iumi?
12 Olketa narawan lo kongregeson duim staka samting for helpem iumi. For example, sapos iumi lo hospital, iumi hapi taem olketa elder lo Hospital Liaison Komiti or Patient Visitation Grup kam visitim iumi. Or sapos iumi feisim hard taem, iumi tinghae lo elder wea hem lisin lo iumi and comfortim iumi. Or sapos iumi needim help witim wanfala Bible study, iumi hapi taem wanfala experience pioneer kam joinim study and givim iumi samfala idea. Olketa brata and sista hia hapi tumas for helpem iumi. Iumi tu savve duim samting for helpem olketa brata and sista. Jesus sei: “Man wea givim samting hem barava hapi winim man wea kasem samting.” (Acts 20:35) Sapos iumi garem goal for duim moa samting lo waka blo Jehovah, wanem nao bae helpem iumi for kasem datwan?
13. Taem iumi markem wanfala goal, wat nao hem gud for duim?
13 Maet iumi garem goal for duim moa samting lo kongregeson. Bat sapos iumi no garem eni plan lo hao bae iumi duim datwan maet iumi no savve kasem datfala goal. So garem wanfala plan. And maet hem gud for iumi raetem wat nao iumi plan for duim and hao bae iumi duim datwan.
14. Why nao maet iumi need for changem samfala plan blo iumi?
14 Taem iumi markem eni goal, iumi mas luksavve maet samfala taem iumi need for changem samfala plan blo iumi, bikos olketa samting lo laef savve change. For example, aposol Paul hem help for startim wanfala niu kongregeson lo Thessalonica. Masbi hem garem plan for stap lo there and helpem olketa wea just kamap Christian. Bat samfala wea againstim Paul forcem hem for lusim Thessalonica. (Acts 17:1-5, 10) Sapos Paul gohed for stap, bae hem putim laef blo olketa brata and sista lo danger. Nomata plan blo Paul hem change, hem still garem goal for helpem olketa brata and sista. So gogo hem sendem Timothy for helpem olketa brata and sista lo Thessalonica. (1 Thess. 3:1-3) Masbi olketa brata and sista hia barava hapi from Timothy willing for helpem olketa!
15. From laef blo iumi savve change, hao nao maet datwan affectim goal blo iumi? Storyim example.
15 Iumi savve lane from wanem hem happen lo Paul lo Thessalonica. Maet iumi garem goal for duim moa samting lo waka blo Jehovah, bat samting lo laef maet change wea mekem iumi no kasem datfala goal. (Eklesiastes 9:11) Sapos samting olsem happen lo iu, willing for change and garem nara goal wea iu fit for kasem. Datwan nao samting wea Ted and Hiedi duim. Disfala hasband and waef mas lusim Bethel bikos lo sik. Bat from tufala lovem Jehovah tufala lukaotem wei for duim moa samting lo ministry. First samting, tufala regular pioneer. Gogo tufala kamap spesol pioneer, and Ted kasem training for duim substitute circuit overseer. Then age blo olketa brata for duim circuit waka hem change. From datwan, Ted and Hiedi luksavve tufala no fit nao for duim datfala assignment. Nomata tufala sorre, tufala luksavve tufala savve duim nara samting for Jehovah. Ted sei, “Mifala luksavve lo waka blo Jehovah staka samting stap for duim.”
16. Wanem nao iumi savve lanem from Galatia 6:4?
16 Iumi no savve kontrolem evri samting wea happen lo laef. So hem important for luksavve Jehovah no tinghae lo iumi bikos lo assignment blo iumi, and iumi shud no comparem assignment wea iumi garem witim assignment blo narawan. Hiedi sei, “Sapos iu comparem laef blo iu witim laef blo nara pipol bae iu no hapi.” (Readim Galatia 6:4.) Hem important for tingim hao iumiseleva savve helpem olketa narawan and wanem iumi savve duim for Jehovah. c
17. Wanem nao savve helpem iu for duim moa samting lo waka blo Jehovah?
17 Bae iu savve duim moa samting lo waka blo Jehovah sapos iu mekem laef blo iu simpol and no garem big kaon. Hem gud for markem olketa smol goal wea bae helpem iu for kasem olketa big goal. For example, sapos iu markem goal for regular pioneer, maet firstaem hem gud for iu auxiliary pioneer. Or sapos iu garem goal for Ministerial servant, maet hem gud for spendem moa taem lo ministry and visitim olketa wea sik and olo lo kongregeson. Taem iu waka hard lo olketa smol goal, datwan bae helpem iu for kasem olketa big goal. So duim best blo iu lo eni waka wea iu duim for Jehovah.—Rome 12:11.
Markem goal wea iu savve kasem (Lukim paragraf 18) f
18. Wat nao iumi lanem from example blo Beverley? (Lukim piksa tu)
18 Nomata iumi young or olo iumi savve markem olketa spiritual goal. Tingim example blo wanfala sista wea nem blo hem Beverley, wea 75 year. Hem garem sik wea mekem hem hard for wakabaot. Bat hem laek for duim moa samting for sapotim Memorial campaign. So hem markem samfala goal. Taem hem kasem olketa goal blo hem lo datfala campaign, datwan mekem hem hapi tumas. Example blo hem encouragem olketa narawan tu for duim moa samting lo ministry. Jehovah tinghae lo wanem olketa olo brata and sista blo iumi duim for hem, nomata olketa no savve duim staka samting bikos lo age blo olketa.—Sams 71:17, 18.
19. Wanem nao samfala spiritual goal wea iu savve markem?
19 Hem gud for markem olketa goal wea iu savve kasem. For example, markem goal for garem olketa gudfala wei wea bae mekem Jehovah hapi lo iu. Or markem goal for lanem samfala samting wea bae helpem organization blo God. Tingim tu olketa wei wea iumi savve helpem olketa brata and sista. d Taem iu garem olketa goal hia Jehovah bae blessim iu, and olsem Timothy, evriwan bae “lukim wei wea iu gohed for kamap strongfala Christian.”—1 Tim. 4:15.
SONG 38 Hem Bae Mekem Iu Strong
a Timothy savve gud lo hao for preach. Nomata olsem, Paul encouragem hem for gohed markem olketa nara spiritual goal. From Timothy followim advaes blo Paul, Jehovah iusim hem for duim staka waka and hem helpem olketa brata and sista. Masbi iu olsem Timothy wea laek for duim moa samting for Jehovah and olketa brata and sista. Wanem nao samfala goal wea bae helpem iu for duim datwan? And hao nao for markem and kasem olketa goal hia?
b Olketa spiritual goal hem minim eni samting wea iumi waka hard for duim, wea bae helpem iumi for duim moa samting for Jehovah and for mekem hem hapi.
c Lukim information lo buk Organized to Do Jehovah’s Will, chapter 10, par. 6-9 anda lo heding “Serving Where the Need Is Greater.”
d Lukim leson 60, wea garem title “Gohed Strongim Frenship blo Iu Witim Jehovah,” lo Enjoyim Laef for Olowe! buk.
