“Olketa Witness hia kaen lo pipol, and kaen tu lo tufala dog blo mi. Wanday, Elaine, wea standap saed lo trolley givim bisket lo tufala dog blo mi. Bihaen datwan, evritaem mifala go pas, tufala dog pullim mi go lo trolley blo tufala Witness hia from olketa laekem bisket.

“For samfala month, olketa dog blo mi enjoyim bisket and mi hapi for story lelebet witim olketa Witness hia. Bat mi no laek frens witim olketa, bikos mi winim 70 year finis and mi no sure lo biliv blo olketa Witness. Mi no hapi lo teaching blo olketa church, so mi disaed for stap lo haos nomoa and readim Bible blo mi.

“Lo datfala taem, mi lukim olketa nara Witness standap witim trolley blo olketa lo olketa difren part lo taon. Olketa tu savve story kaen lo pipol. Evritaem olketa iusim Bible for ansarem eni kwestin wea mi garem, and datwan mekem mi start for trustim olketa.

“Wanday, Elaine askem mi olsem, ‘Hao, iu tingse olketa animal hem present from God?’ Mi sei lo hem, ‘Ia, mi barava bilivim datwan.’ Then Elaine readim Aesaea 11:6-9 lo mi. Datwan mekem mi laek for lanem moa samting from Bible, bat still mi no laek tekem eni buk from olketa.

“Bihaen datwan, evriday Elaine and hasband blo hem, Brent, savve storyim samting from Bible witim mi. Tufala talem mi for readim Matthew go kasem Acts for luksavve wanem nao man mas duim for kamap wanfala tru Christian, so mi readim. No longtaem bihaen, Brent and Elaine start for studyim Bible witim mi. Datwan hem lo summer blo 2016.

“Mi laekem tumas Bible study blo mi and olketa meeting lo Kingdom Hall. Mi barava hapi for lanem olketa tru samting lo Bible. Samting olsem wan year bihaen mi baptaes and kamap wanfala Witness. Distaem mi 79 year, and mi hapi tumas mi faendem truth. Hem wanfala blessing for kamap part lo famili blo Jehovah evriwea lo world.”