1. Wanem nambawan present nao Jehovah givim lo iumi?

 NAMBAWAN present wea Jehovah givim lo iumi, hem for savve hao for toktok. Stretawe bihaen God wakem Adam, hem savve story witim Dadi blo hem lo heven. Hem savve mekem ap olketa niu word tu. Adam hem duim datwan taem hem nemim olketa animal. (Jenesis 2:19) And masbi Adam barava hapi lo firstaem wea hem story witim nara human being, wea hem nao naesbola waef blo hem Eve!​—Jenesis 2:22, 23.

2. Hao nao pipol lo bifor and distaem iusim nogud lo datfala present for toktok?

² No longtaem nomoa samfala no iusim gud datfala present for toktok. Satan laea lo Eve, and from datwan iumi evriwan sin and no perfect. (Jenesis 3:1-4) Adam iusim nogud datfala present taem hem blamem Eve and Jehovah for sin wea hemseleva duim. (Jenesis 3:12) And bihaen Cain killim dae brata blo hem Abel, hem laea lo Jehovah. (Jenesis 4:9) Gogo, Lamech wea kam from laen blo Cain, wakem wanfala poem abaotem hao pipol lo datfala taem raf tumas. (Jenesis 4:23, 24) So hao nao wei blo pipol distaem? Samfala taem olketa bigman lo politik savve tok swear. And staka movie garem olketa nogud toktok insaed. Lo skul and lo waka ples tu staka pipol savve tok swear. Distaem hem normal samting for pipol tok swear, so datwan showimaot world hem kamap nogud tumas.

3. Wanem nao iumi need for careful lo hem, and wanem nao bae iumi storyim lo disfala article?

 ³ From staka taem iumi savve herem pipol iusim nogud toktok, sapos iumi no careful maet iumi start for iusim olketa toktok olsem tu. Iumi olketa Christian laek for mekem Jehovah hapi, so bae iumi no laek for talem eni nogud toktok. Iumi laek for iusim datfala present for toktok lo gudfala wei, olsem for praisem God. Lo disfala article bae iumi storyim hao for iumi duim datwan (1) lo ministry, (2) lo taem blo meeting, and (3) taem iumi story witim olketa narawan. Bat firstaem, bae iumi storyim why Jehovah interest lo olketa toktok blo iumi.

4. Olsem Malakae 3:16 storyim, why nao Jehovah interest lo toktok blo iumi?

⁴ Readim Malakae 3:16. Jehovah raetem nem blo olketa wea toktok blo olketa showimaot olketa fraet lo hem and tinghae lo nem blo hem insaed “wanfala buk fo rimembarem olketa.” Toktok blo iumi savve showimaot wanem hem stap insaed heart blo iumi. And Jesus sei: “Samting wea man tingting tumas abaotem nao bae hem storyim.” (Matt. 12:34) So toktok blo iumi bae showimaot sapos iumi lovem Jehovah. And Jehovah laekem olketa wea lovem hem for stap insaed niu world.

5. (a) Hao nao toktok blo iumi join witim worship blo iumi? (b) Olsem iumi lukim lo piksa, wanem nao toktok blo iumi savve showimaot?

⁵ Jehovah acceptim nomoa worship blo olketa wea talem gudfala toktok. (Jas. 1:26) Samfala wea no lovem God savve tok raf, tok praod, and no tok kaen. (2 Tim. 3:1-5) Iumi no laek olsem olketa. Iumi laekem tumas for Jehovah hapi lo toktok blo iumi. Bat waswe, bae Jehovah hapi lo iumi sapos iumi story kaen lo olketa brata and sista lo meeting and pipol lo ministry, bat lo haos iumi tok raf lo olketa famili member blo iumi?—1 Pet. 3:7.

6. From Kimberly talem gudfala toktok, wanem nao gud samting wea kamaot from datwan?

⁶ From iumi worshipim Jehovah, evritaem iumi laek for talem gudfala toktok.  Datwan bae helpem olketa narawan for luksavve ‘olketa stretfala pipol wea obeim God barava deferen from olketa nogud pipol.’ (Malakae 3:18) Datwan nao samting wea happen lo wanfala sista wea nem blo hem Kimberly. b Lo hae skul, hem and nara classmate waka tugeta lo wanfala assignment. Gogo, datfala classmate luksavve Kimberly hem difren from olketa nara student. Kimberly no tok spoelem narawan, hem tok kaen, and hem no savve swear. Datfala classmate tinghae lo wei blo Kimberly, and gogo hem start for studyim Bible. Masbi Jehovah hem hapi tumas taem toktok blo iumi mekem pipol interest for lanem truth!

7. Wanem nao iumi laek duim witim present for toktok wea God givim iumi?

⁷ Iumi laekem toktok blo iumi for mekhae lo Jehovah and for mekem olketa brata and sista laek fren witim iumi. So distaem bae iumi storyim samfala wei wea iumi savve showimaot gudfala example lo toktok blo iumi.

8. Wanem gud example nao Jesus showimaot lo toktok blo hem lo ministry?

⁸ Sapos samwan mekem iumi kros, story kaen and showimaot respect. Taem Jesus duim ministry, samfala accusim hem and sei hem man for kaikai, hem man for drunk, Satan nao givim paoa lo hem, hem nating keepim Sabbath, and hem tok againstim God. (Matt. 11:19; 26:65; Luke 11:15; John 9:16) Bat Jesus no tok kros lo olketa. Olsem Jesus, sapos samwan tok spoelem iumi, iumi no laek for tok kros lo olketa. (1 Pet. 2:21-23) Bat hem no isi for kaen taem samwan no kaen lo iumi. (Jas. 3:2) So wanem nao savve helpem iumi?

9. Wanem nao savve helpem iumi for kontrolem toktok blo iumi taem iumi lo preaching waka?

⁹ Nomata haosholder hem kros, tingim hao hem need for herem truth. Sam, wanfala brata hem sei, “Mi tingim hao haosholder need for herem truth, and hem fit for change.” Samfala taem maet haosholder kros bikos iumi kam lo rong taem. Taem iumi meetim samwan wea kros, iumi savve followim example blo Sista Lucia. Iumi savve prea kwaet and askem Jehovah for helpem iumi for no kros, and for no talem toktok wea no showimaot respect.

10. Olsem 1 Timothy 4:13 storyim, wanem nao iumi laek for kamap gud lo hem?

¹⁰ Kamap gudfala teacher. Nomata Timothy duim ministry for longtaem, hem need for gohed kamap gud lo hao hem teach. (Readim 1 Timothy 4:13.) Wanem nao bae helpem iumi for kamap gudfala  teacher lo ministry? Iumi mas prepare gud. Iumi hapi iumi garem olketa difren kaen tul wea savve helpem iumi for kamap gudfala teacher. Bae hem gud for readim moa datfala brochure Gohed Waka Hard for Read and Teach Gud, and insaed Christian Laef and Ministry Bilong Iumi​—Meeting Buk hem garem sekson “Duim Gud Ministry blo Iu.” Waswe, iu iusim gud olketa tul hia? Taem iumi prepare gud, bae iumi no fraet and bae iumi story gud.

11. Wanem nao helpem samfala brata and sista for kamap gudfala teacher?

¹¹ Nara samting wea savve helpem iumi for kamap gudfala teacher hem for lane from olketa narawan lo kongregeson. Sam, wea iumi storyim bifor, interest for savve wanem nao helpem samfala brata and sista for kamap gudfala teacher. Hem lisin lo hao olketa teach and then trae for followim olketa. Sista Talia lisin gud lo hao olketa experience speaker givim pablik tok. Datwan helpem hem for savve hao for explainim gud olketa subject wea pipol lo ministry interest lo hem.

12. Wanem nao hem no isi for samfala duim lo meeting?

¹² Iumi evriwan savve tek part lo meeting taem iumi singsing from heart and givim olketa koment wea iumi preparem gud. (Sams 22:22) Samfala savve shame for singsing or fraet for givim koment lo meeting. Sapos iu feel olsem, maet iu interest for savve wat nao helpem olketa narawan for no fraet.

13. Wanem nao maet helpem iumi for no fraet for singsing lo meeting?

¹³ No fraet for singsing. Main reason iumi singim olketa Kingdom song hem for praisem Jehovah. Wanfala sista wea nem blo hem Sara tingse hem no savve singsing gud, bat hem laek for singsing for praisem Jehovah. So taem hem prepare for olketa meeting, hem practicem olketa song. Taem hem duim datwan, hem trae for luksavve lo hao olketa word blo song join witim subject wea olketa bae storyim lo meeting. Sara sei: “Datwan helpem mi for no warim tumas hao mi singsing, bat for tingim nomoa word blo olketa song.”

14. Sapos iu fraet for givim koment lo meeting, wanem nao savve helpem iu?

¹⁴ Trae for koment lo evri meeting. Samfala savve fraet tumas for givim koment. Talia wea iumi storyim finis sei: “Mi savve fraet and shame for givim koment. Maet olketa narawan no luksavve lo datwan bikos voice blo mi savve stedy nomoa taem mi givim koment. Nomata mi fraet, mi traem best for givim koment evritaem.” Taem Talia prepare for olketa  meeting, hem tingim hao first ansa lo eni kwestin shud short and ansarem stret datfala kwestin. Talia sei moa: “Mi luksavve hem olraet nomoa sapos ansa blo mi short, simpol, and kasem point, bikos hem nao kaen ansa wea study conductor laekem.”

15. Why nao iumi shud no hol bak for givim koment?

¹⁵ Nomata samfala brata or sista no shame or fraet, maet olketa hol bak for givim koment. Why nao olsem? Wanfala sista wea nem blo hem Juliet sei: “Samfala taem mi hol bak for koment bikos mi tingse olketa koment blo mi nating gud.” Bat tingim, Jehovah laekem iumi for duim nomoa wanem iumi fit for duim. c Jehovah tinghae lo iumi taem iumi duim best blo iumi for givim koment lo meeting nomata iumi fraet.

16. Wanem kaen toktok nao iumi no laek for iusim?

¹⁶ No iusim nogud toktok. (Eph. 4:31) Olsem iumi storyim finis, olketa Christian mas no tok swear. Bat olketa Christian mas no talem olketa nogud toktok abaotem olketa narawan tu. Olsem example, taem iumi storyim pipol wea garem difren culture, kam from difren tribe, or nara kantri, iumi shud no tok nogud abaotem olketa. Iumi no laek talem tu toktok wea bae spoelem feeling blo olketa narawan. Wanfala brata sei: “Mi savve talem olketa samting wea mi tingse hem fani and hem olraet nomoa bat olketa toktok hia barava spoelem feeling blo olketa narawan. Waef blo mi gohed helpem mi for luksavve taem mi talem samting wea spoelem feeling blo hem and olketa narawan, and hem storyim datwan taem mitufala stap seleva.”

17. Olsem Ephesus 4:29 storyim, hao nao iumi savve strongim olketa narawan?

¹⁷ Talem toktok wea strongim narawan. Hem gud for praisem olketa narawan winim for tok spoelem or komplenim olketa. (Readim Ephesus 4:29.) Olketa Israelite garem staka samting for tinghae lo hem, bat olketa gohed for komplen. Sapos iumi gohed for komplen, olketa narawan tu bae duim olsem. Bible storyim hao taem tenfala spae talem wanfala nogud report, datwan mekem olketa Israelite for “tok agensim Mosis.” (Nambas. 13:31–14:4) Bat taem iumi praisem olketa narawan, datwan savve mekem evriwan for hapi. Masbi from olketa fren blo dota blo Jephthah encouragem and praisem  hem, hem hapi for gohed lo assignment blo hem. (Jajis 11:40) Sara wea iumi storyim finis hem sei: “Taem iumi praisem olketa narawan iumi helpem olketa for luksavve Jehovah and olketa narawan lo kongregeson lovem olketa.” So lukaotem chance for praisem olketa brata and sista.

18. Olsem Sams 15:1, 2 storyim, why nao iumi mas no laea, and wanem nao nara samting wea iumi mas no duim?

¹⁸ Talem tru samting. Jehovah heitim evri wei for laea, and bae hem no hapi sapos iumi duim datwan. (Provebs 6:16, 17) Distaem pipol tingse hem normal samting for man hem laea, bat iumi mas no laea bikos Jehovah sei datwan no stret. (Readim Sams 15:1, 2.) Nara samting wea no fitim tu, hem for mekem narawan bilivim samting wea no tru from iumi no talem full story.

19. Wanem nao nara samting wea iumi mas no duim?

¹⁹ No gossip. (Provebs 25:23; 2 Thess. 3:11) Juliet, storyim hao hem feel taem hem herem pipol gossip. Hem sei: “Mi no laek herem pipol gossip bikos datwan mekem mi discourage. And tu, datwan mekem mi for no trustim man wea hem gossip bikos mi no sure sapos bae hem gossip abaotem mi tu lo narawan.” Sapos iumi luksavve samwan start for gossip abaotem narawan, changem subject and storyim gud samting.​—Col. 4:6.

20. Wanem nao iu laek traem best for duim?

²⁰ Iumi stap lo world wea hem normal for pipol talem nogud toktok, so iumi mas waka hard for talem toktok wea mekem Jehovah hapi. Hem gud for tingim toktok hem present from Jehovah and hem interest lo wanem iumi talem. Hem bae blessim iumi taem iumi iusim gudfala toktok lo ministry, lo taem blo meeting, and taem iumi story witim olketa narawan. Taem Jehovah finisim disfala nogud world bae iumi no herem pipol iusim nogud toktok, so bae hem isi for iumi praisem Jehovah witim toktok blo iumi. (Jude 15) Bat distaem iumi laek traem best for talem toktok wea mekem Jehovah hapi.​—Sams 19:14.