1. Hao nao samfala feel abaotem wei for story lo pipol lo ministry? (Lukim tu piksa.)

 FROM iumi pipol blo Jehovah, iumi preach lo olketa narawan bikos iumi lovem Dadi blo iumi lo heven and iumi laek for helpem pipol for savve lo hem. Staka pablisa barava enjoyim preaching waka. Bat samfala no really enjoyim. Why? Samfala maet feel shame and tingse olketa no savve hao for story gud. Samfala no feel gud for go lo haos blo difren pipol. Samfala narawan maet fraet incase pipol les lo olketa. Samfala growap lo culture wea teachim olketa for no involve lo situation wea maet kosim raoa. Nomata olketa brata and sista hia barava lovem Jehovah, olketa faendem hard for go storyim gud nius lo olketa stranger. Nomata olsem, olketa luksavve hao disfala waka hem important tumas and olketa share insaed ministry evritaem. Datwan mas mekem Jehovah hapi tumas!

2. If iu no hapi for duim ministry, why nao iu shud no discourage?

² Hao, samfala taem olketa feeling olsem mekem iu no hapi for duim ministry? If olsem, no discourage. Olketa feeling olsem maet showimaot iu hambol, no laek kasem attention from olketa narawan, and no laek raoa witim pipol. Iumi evriwan no laekem pipol for les lo iumi, especially taem iumi trae for helpem olketa. Dadi blo iumi lo heven  savve gud lo challenge wea iu feisim and laek for helpem iu. (Isa. 41:13) Lo disfala article, bae iumi storyim faevfala idea wea savve helpem iumi for deal witim olketa feeling olsem, and hao for increasim hapi blo iu lo ministry.

BIBLE SAVVE STRONGIM IU

3. Wat nao helpem profet Jeremiah for preach lo olketa narawan?

³ Start kam from bifor, taem olketa servant blo God kasem assignment wea no isi, message blo God nao strongim olketa. Tingim example blo Jeremiah. Hem hol bak taem Jehovah givim hem assignment for preach. Jeremiah sei: “Mi no savve hao for story bikos mi young tumas.” (Jer. 1:6) Hao nao hem ovakamim datfala feeling for tingse hem no savve hao for story gud? Toktok blo God nao strongim hem. Hem sei: “Toktok blo [Jehovah] gohed for bone insaed lo heart blo mi olsem wanfala fire. Hem olsem flame insaed olketa bon blo mi. And mi taed nao for keepim insaed lo mi.” (Jer. 20:​8, 9) Nomata territory blo Jeremiah no isi, message wea hem mas talemaot strongim hem for duim datfala waka.

4. Wanem gud samting nao bae iumi kasem if iumi readim Bible and ting raonem? (Colossae 1:​9, 10)

⁴ Olketa Christian kasem strong from message wea stap insaed Bible. Taem aposol Paul raet lo kongregeson lo Colossae, hem sei wei for kasem stretfala savve nao bae helpem olketa brata for duim samting wea mekem Jehovah hapi and for olketa gohed “duim evri gudfala waka.” (Readim Colossae 1:​9, 10.) Wanfala lo olketa gudfala waka hia nao hem for preachim gud nius. So taem iumi readim Bible and ting raonem, faith blo iumi lo Jehovah bae kamap strong and bae iumi lukim klia why hem important for sharem Kingdom message.

5. Hao nao iumi savve barava kasem gud samting from Bible reading and study blo iumi?

⁵ For barava kasem gud samting from Bible, iumi shud no rush taem iumi readim, studyim, and ting raonem. Bat hem gud for tek taem. If iu kam akrosim wanfala scripture wea iu no understandim, no skip ovam. Instead, iusim Watch Tower Publications Index or Research Index for Olketa Jehovah’s Witness for faendaot mining blo datfala verse. If iu no rush taem iu study, bae iu barava trustim dat Bible hem tru. (1 Thess. 5:21) Taem iu  barava trustim wat iu lanem, iu bae hapi tumas for sharem witim olketa narawan.

PREPARE GUD FOR MINISTRY

6. Why nao iumi shud barava prepare gud for ministry?

⁶ If iu prepare gud for ministry, iu bae feel comfortable taem iu story witim olketa narawan. Jesus helpem olketa disaepol for prepare bifor hem sendem olketa for go lo ministry. (Luke 10:​1-11) Bikos olketa followim wat Jesus teachim, olketa disaepol barava hapi lo wat olketa duim.—Luke 10:17.

7. Hao nao iumi savve prepare for ministry? (Lukim tu piksa.)

⁷ Hao nao iumi savve prepare for ministry? Iumi need for ting abaotem hao for expressim truth lo own toktok blo iumi. Nara samting wea savve help tu, hem for tingim tu-thri difren wei wea olketa lo territory maet react and ting abaotem hao for iu ansarem. Then taem iumi story lo pipol, trae for relax, smile, and kaen.

8. Hao nao olketa Christian olsem olketa clay pot wea Paul storyim?

⁸ Aposol Paul iusim wanfala illustration for storyim waka blo iumi for preach, hem sei: “Mifala garem disfala spesol waka, nomata mifala olsem olketa clay pot wea garem expensive samting insaed.” (2 Cor. 4:7) Wat nao disfala expensive samting? Hem nao waka for preachim Kingdom message, wea savve sevem laef blo pipol. (2 Cor. 4:1) Wat nao olketa clay pot? Hem nao olketa servant blo God, wea talemaot gud nius lo pipol. Lo taem blo Paul, olketa bisnisman savve iusim olketa clay pot for karem olketa valuable tings insaed, olsem kaikai, wine, and selen. Lo sem wei, Jehovah iusim iumi for karem disfala important message blo gud nius. Witim help blo Jehovah, iumi bae garem strong for gohed faithful for talemaot gud nius.

PREA FOR NO FRAET

9. Hao nao iumi savve ovakamim feeling for fraetem man or wei wea pipol les lo iumi? (Lukim tu piksa.)

⁹ Samfala taem, iumi maet fraetem man or fraetem wei wea pipol bae les lo iumi. Hao nao iumi savve ovakamim disfala challenge? Tingim prea blo olketa aposol taem olketa bigman stopem olketa for preach. Winim wei for fraet, olketa askem Jehovah for helpem  olketa for no fraet for gohed “talemaot message bilong God.” Kwiktaem nomoa Jehovah ansarem prea blo olketa. (Acts 4:​18, 29, 31) If feeling for fraetem man affectim iumi samfala taem, iumi tu shud prea lo Jehovah for help. Askem Jehovah for mekem love blo iu for pipol kamap strong winim feeling for fraetem man.

10. Hao nao Jehovah helpem iumi for gohed Witness for hem? (Isaiah 43:​10-12)

¹⁰ Jehovah appointim iumi for Witness for hem, and hem promis for helpem iumi for no fraet. (Readim Isaiah 43:​10-12.) Tingim just fofala wei wea hem duim datwan. First, Jesus hem stap witim iumi taem iumi preachim gud nius. (Matt. 28:​18-20) Second, Jehovah appointim olketa angel for helpem iumi. (Rev. 14:6) Third, Jehovah givim holy spirit for helpem iumi tingim bak olketa samting wea iumi lanem. (John 14:​25, 26) And fourth, Jehovah provaedem olketa brata and sista for go witim iumi taem iumi preach. Witim help blo Jehovah and sapot blo olketa brata and sista, bae iumi no fraet and gohed for preach.

MAS FLEXIBLE, AND GAREM POSITIVE TINGTING

11. Taem iu duim ministry, maet wat nao iu savve duim for faendem staka pipol? (Lukim tu piksa.)

¹¹ Hao, iu savve feel discourage taem iu no faendem staka pipol lo haos? If olsem, tingim disfala kwestin: ‘Lo taem olsem, wea nao pipol lo territory blo mi olketa go?’ (Acts 16:13) ‘Hao, olketa go waka or shopping?’ If datwan nao situation lo territory, hao if iu duim street witnessing? Wanfala brata wea nem blo hem Joshua sei, “Mi garem chance for preach taem mi wakabaot lo olketa shopping plaza and olketa parking area.” Hem and waef blo hem, Bridget, kasem staka pipol lo haos blo olketa taem tufala go lo evening and lo Sunday aftanun.—Eph. 5:​15, 16.

12. Hao nao iumi savve faendemaot wat pipol bilivim or wari abaotem?

¹² If pipol no really interest lo message blo iumi, trae for faendaot wat nao olketa bilivim or wari abaotem. Joshua and Bridget iusim olketa kwestin wea stap lo front page blo olketa tract. For example, tufala iusim  datfala tract Wanem Nao Tingting Bilong Iu Abaotem Bible? And then tufala savve sei: “Samfala pipol ting lo Bible olsem buk from God, bat olketa narawan no ting olsem. Wat nao tingting blo iu?” Staka taem diswan lead go lo wei for story witim datfala person.

13. Why nao iumi hapi lo ministry blo iumi nomata pipol no lisin? (Proverbs 27:11)

¹³ Nomata pipol no lisin taem iumi preach, iumi hapi bikos iumi still givim witness. Why? Bikos iumi duim wat Jehovah and Son blo hem laekem iumi for duim. (Acts 10:42) Nomata iumi no faendem eniwan for story witim or if olketa rejectim message blo iumi, iumi savve hapi bikos iumi savve iumi mekem Dadi blo iumi lo heven for hapi.—Readim Proverbs 27:11.

14. Why nao iumi hapi taem wanfala pablisa faendem samwan lo territory wea interest?

¹⁴ Iumi hapi tu taem nara pablisa faendem samwan lo territory wea interest. Wanfala Wastaoa comparem hao waka blo iumi hem semsem olsem hao wanfala team lukaotem wanfala pikinini wea lus. Staka nao lukaotem, and olketa go search lo staka area. Maet wanfala person nomoa faendem datfala pikinini, nomata olsem evriwan nao hapi no just datfala man wea faendem. Lo sem wei tu, iumi waka tugeta olsem wanfala team for mek disaepol. Iumi needim evriwan for kavarem territory, and iumi evriwan hapi taem wanfala niu wan start for attendim meeting.

FOCUS LO LOVE BLO IU FOR JEHOVAH AND PIPOL

15. Taem iu followim Matthew 22:​37-39, hao nao datwan savve increasim hapi blo iumi lo ministry? (Lukim tu piksa )

¹⁵ Iumi savve increasim hapi blo iumi lo preaching waka taem iumi focus lo love blo iumi for Jehovah and pipol. (Readim Matthew 22:​37-39.) Just imaginim hao hapi nao Jehovah taem hem lukim iumi duim disfala waka, and hao hapi nao pipol taem olketa start for studyim Bible! Tingim tu, dat olketa wea acceptim message blo iumi bae sev.—John 6:40; 1 Tim. 4:16.

16. If eniting mekem iumi no fit for lusim haos, wat nao iumi savve duim for hapi lo ministry? Storyim example.

¹⁶ Waswe, eniting mekem iu no savve go aot from haos? If olsem, focus lo wat iu savve duim for showimaot love for Jehovah and pipol.  During lo COVID-19 pandemic, Samuel and Dania no savve go aot from haos blo olketa. Lo datfala taem hem no isi, bat tufala evritaem duim telephone witnessing, raetem leta, and conductim olketa Bible study lo Zoom. Samuel preach lo olketa wea hem meetim lo clinic wea hem savve go for receivim treatment for cancer. Hem sei: “Hard taem savve mekem iumi wari, taed, and affectim iumi lo spiritual wei. Iumi need for kasem hapi lo service blo iumi for Jehovah.” During lo datfala taem, Dania foldaon and hem no getap from bed for thrifala month. Then bihaen, hem iusim wheelchair for sixfala month. Hem sei: “Mi trae for duim best fitim situation blo mi. Mi preach lo olketa nurse wea kam for visitim mi, and olketa wea kam for lusim olketa tings lo haos. And tu, mi savve preach lo telephone lo wanfala woman wea waka for wanfala medical company.” Situation blo Samuel and Dania mekem hem hard for tufala duim staka samting lo ministry, bat tufala duim best blo tufala and kasem hapi from datwan.

17. Wat nao iumi savve duim for kasem gud samting from olketa idea wea iumi storyim lo disfala article?

¹⁷ Taem iumi followim evri idea wea iumi storyim lo disfala article bae hem waka gud. Each idea hem olsem wanfala ingredient blo wanfala recipe. Taem iu putim evri ingredient tugeta, kaikai bae teist naes. Taem iumi followim evri idea hia, bae hem helpem iumi for no garem negative feeling bat bae iumi increasim hapi blo iumi lo ministry.