1. Wat nao spiritual paradaes, and wat nao iumi shud disaed strong for duim?

 LO EARTH distaem hem garem wanfala paradaes wea fulap witim pipol wea busy for duim staka gud samting. Staka million pipol wea stap insaed garem trufala peace. Olketa wea insaed datfala paradaes disaed strong for no lusim. And tu, olketa laek for helpem staka pipol moa for kam insaed datfala spesol ples. Wat nao datfala ples? Hem nao spiritual paradaes! a

2. Why nao datfala spiritual paradaes hem spesol tumas?

² Jehovah duim wanfala spesol samting. Hem wakem wanfala peaceful environment for pipol blo hem, insaed world blo Satan wea danger tumas, wicked, and wea pipol heitim each other. (1 John 5:19; Rev. 12:12) God blo iumi wea lovem iumi lukim hao disfala world affectim iumi, and hem provaedem wanfala sef ples mekem pipol blo hem grow lo spiritual wei. Bible describem spiritual paradaes olsem ples for “stap sef” and “garden wea garem staka wata.” (Isa. 4:6; 58:11) From Jehovah blessim olketa wea stap insaed disfala paradaes, olketa hapi and sef during olketa last day distaem wea hard tumas.—Isa. 54:14; 2 Tim. 3:1.

3. Hao nao profesi blo Isaiah chapter 65 hem fulfill bifor?

 ³ Jehovah iusim profet Isaiah for describem laef insaed datfala spiritual paradaes. Iu savve readim datwan lo Isaiah chapter 65. Firstaem wea profesi hia fulfill, hem lo 537 B.C.E. Lo datfala taem, olketa Jew wea repent kamap free from Babylon and go bak lo hom blo olketa. Jehovah blessim and helpem olketa for mekem Jerusalem luk naes moa and buildim bak temple for kamap main ples blo tru worship lo Israel.—Isa. 51:11; Zech. 8:3.

4. Hao nao Isaiah chapter 65 fulfill distaem?

⁴ Second taem wea profesi blo Isaiah hem start for fulfill, hem lo 1919 C.E. taem pipol blo Jehovah kamap free from Bigfala Babylon. Lo datfala taem, spiritual paradaes start for kamap lo full earth. Olketa wea strong for talemaot Kingdom startim staka kongregeson and showimaot olketa spiritual wei. Samfala wea wei blo olketa raf olsem animal, olketa change for “garem niufala wei wea fitim wanem God hem laekem.” (Eph. 4:24) Nomata olsem staka blessing wea Isaiah describem, bae fulfill lo niu world wea bae kamap lo future. Bat distaem tu, iumi savve enjoyim staka nambawan blessing. Lo disfala article, bae iumi lanem gud samting wea iumi kasem from spiritual paradaes and why iumi shud no lusim.

BLESSING WEA OLKETA INSAED SPIRITUAL PARADAES KASEM

5. Olsem Isaiah 65:13 promisim, wat nao iumi kasem insaed spiritual paradaes?

⁵ Healthy and strong. Profesi blo Isaiah storyim big difference between laef blo olketa wea insaed spiritual paradaes and laef blo olketa wea no insaed. (Readim Isaiah 65:13.) Jehovah barava satisfaem need blo olketa wea worshipim hem. Hem givim holy spirit, Bible, and staka spiritual kaikai mekem iumi savve “kaikai, . . . drink, . . . [and] hapi.” (Comparem Revelation 22:17.) Bat situation blo olketa wea no insaed lo spiritual paradaes hem barava difren, olketa “bae hangere . . . , thirsty . . . , [and] shame fogud.” Olketa no kasem olketa spiritual samting wea olketa needim.—Amos 8:11.

6. Hao nao Joel 2:​21-24 describem spiritual kaikai wea iumi kasem, and hao nao datwan helpem iumi?

⁶ Lo profesi blo Joel, hem iusim example blo olketa main kaikai olsem grain, wine, and olive oil for showim hao Jehovah willing tumas for givim pipol blo Hem wat olketa needim, wea datwan includim olketa spiritual kaikai. (Joel 2:​21-24) Jehovah provaedem diswan thru lo Bible, olketa pablikeson blo iumi, website, meeting, assembly, and olketa convention. Iumi savve kaikaim spiritual kaikai evriday, from datwan, iumi kamap moa healthy and strong lo spiritual wei.

7. Wat nao savve mekem “heart blo [iumi] hem feel gud”? (Isaiah 65:14)

⁷ Hapi and satisfae. Pipol blo God savve “singaot from olketa hapi,” bikos heart blo olketa fulap witim wei for tinghae. (Readim Isaiah 65:14.) “Heart blo [iumi] hem feel gud” bikos iumi lanem olketa truth and promis lo Bible wea strongim and comfortim iumi, and iumi kasem tu hope bikos lo ransom sakrifaes blo Christ. Taem iumi story witim olketa brata and sista abaotem olketa samting hia, hem mekem iumi for barava hapi!—Ps. 34:8; 133:​1-3.

8. Wat nao tufala main blessing wea iumi kasem insaed spiritual paradaes?

⁸ Love and wan mind wea pipol blo Jehovah garem hem tufala main blessing lo datfala spiritual paradaes. Taem iumi lukim pipol blo Jehovah garem love and wan mind, datwan mekem iumi imaginim laef lo niu world wea  evriwan bae lovem each other and wan mind winim distaem. (Col. 3:14) Wanfala sista ting bak lo firstaem wea hem meetim pipol blo Jehovah. Hem sei: “Mi no savve hapi, nomata taem mi stap witim famili blo mi. Firstaem for mi lukim pipol showimaot love, hem taem mi meetim Olketa Jehovah’s Witness.” If samwan laek for really hapi and satisfae hem need for kam insaed spiritual paradaes. Nomata wat nao tingting blo pipol lo world abaotem olketa servant blo Jehovah, olketa garem wanfala spesol nem wea Jehovah and evriwan wea worshipim Hem tinghae lo hem.—Isa. 65:15.

9. Wat nao Isaiah 65:​16, 17 promisim abaotem olketa samting wea kosim pain and wei for safa distaem?

⁹ Relax and garem peace. Isaiah 65:14 sei olketa wea chus for no kam insaed spiritual paradaes olketa ‘krae, bikos olketa feelim pain lo heart, and olketa bae krae big, bikos heart hem brek.’ Bat waswe lo evri samting wea kosim pain and wei for safa for pipol blo God? Olketa samting hia bae gogo hem “nomoa nao” and hem ‘bae haed from eye blo God.’ (Readim Isaiah 65:​16, 17.) Jehovah bae finisim evri problem blo iumi, and isisi bae pain wea iumi kasem from olketa nogud memory blo iumi bae hem finis for olowe.

10. Why nao iu ting dat hem wanfala blessing for associate witim olketa brata and sista? (Lukim tu piksa.)

¹⁰ Nomata distaem, taem iumi attendim olketa Christian meeting hem savve helpem iumi for relax and no tingim tumas olketa wari blo disfala nogud world. Iumi contribute lo peace insaed spiritual environment blo iumi taem iumi showimaot love, hapi, peace, kaen, and hambol wea diswan hem samfala lo frut blo holy spirit blo God. (Gal. 5:​22, 23) Hem nambawan blessing for iumi insaed organization blo God! Olketa wea gohed stap insaed spiritual paradaes bae lukim hao promis blo God for wanfala “niu skae and wanfala niu earth” bae barava fulfill lo future.

11. Olsem Isaiah 65:​18, 19 talem, hao nao spiritual paradaes wea Jehovah creatim shud affectim iumi?

¹¹ Tinghae and hapi tumas. Isaiah storyim tu why iumi garem staka reason for “hapi and barava hapi” insaed spiritual paradaes. Jehovah nao creatim or wakem disfala environment. (Readim Isaiah 65:​18, 19.) Dastawe Jehovah iusim iumi for helpem pipol for go aot from olketa organization blo disfala world wea nating teachim truth abaotem God, and helpem olketa for kam lo beautiful spiritual environment blo Hem! Iumi hapi and tinghae  lo olketa blessing iumi kasem bikos iumi insaed truth, and hem mekem iumi for laek storyim lo olketa narawan.—Jer. 31:12.

12. Hao nao iu feel abaotem olketa promis lo Isaiah 65:​20-24, and why nao olsem?

¹² Iumi tinghae and hapi tumas lo hope wea iumi garem bikos iumi insaed spiritual paradaes. Tingim evri samting wea bae iumi lukim and duim lo niu world blo God! Bible promis olsem: “No enitaem moa bae wanfala baby hem dae bihaen hem laef for tu-thri day nomoa, and man wea olo bae stap laef for longtaem.” Iumi bae “buildim olketa haos and stap insaed [and] plantim olketa grape planteison and kaikaim frut blo olketa.” Bae iumi “no waka hard nating” bikos “Jehovah nao blessim.” Hem promis for givim laef wea garem purpose and wea bae mekem iumi satisfae and sef. Hem bae savve finis wat each wan needim “bifor olketa singaot,” and hem bae “givim lo evri samting wea laef, wanem olketa laekem.”—Isa. 65:​20-24; Ps. 145:16.

13. Hao nao Isaiah 65:25 describem olketa change wea pipol duim lo laef blo olketa taem olketa start for servem Jehovah?

¹³ Peaceful and sef. Witim help blo spirit blo God, staka pipol wea wei blo olketa bifor olsem raf animal, olketa barava changem laef blo olketa. (Readim Isaiah 65:25.) Olketa waka hard for lusim olketa nogud wei blo olketa. (Rome 12:2; Eph. 4:​22-24) Hem tru, iumi pipol blo God no perfect yet, so iumi still savve duim olketa mistek. Bat, Jehovah mekem “evri difren kaen man” for stap tugeta lo peace and showim love. (Titus 2:11) Diswan hem wanfala mirakol wea only Olmaeti God fit for duim!

14. Hao nao situation blo wanfala brata fitim wanem Isaiah 65:25 storyim?

¹⁴ Hao, pipol savve really changem wei blo olketa tu? Tingim disfala experience. Wanfala young man wea just 20 years nomoa garem barava nogud laef stael and raf tumas, and datwan mekem hem in-and-aot lo prison staka taem. Olketa putim hem lo prison bikos hem stealim car, brek-in lo olketa haos, and duim olketa nara serious crime. Hem man for laek faet tu. Firstaem wea hem herem truth from Bible and start attendim meeting blo Olketa Jehovah’s Witness, hem barava convince dat hem faendem wat hem lukaotem, wea hem nao for worshipim Jehovah lo spiritual paradaes. Bihaen hem baptaes, staka taem hem tingim hao toktok blo Isaiah 65:25 hem barava fitim hem. Hem changem wei blo hem wea raf olsem lion, and hem kamap peaceful olsem wanfala baby sheepsheep.

15. Why nao iumi laek invaetem pipol for join insaed disfala spiritual paradaes, and hao nao iumi savve duim datwan?

¹⁵ Lo start blo Isaiah 65:13 hem sei: “Diswan nao wanem Sovereign Lord Jehovah hem talem.” Then last part lo verse 25 garem disfala toktok, “Jehovah hem sei.” Diswan hem pruvim wanem hem talem hem evritaem kamap tru. (Isa. 55:​10, 11) Datfala spiritual paradaes hem stap finis distaem. Wei wea Jehovah creatim disfala famili wea wan mind hem spesol tumas. Taem iumi stap witim pipol blo hem, iumi garem peace and stap sef insaed world wea raf tumas. (Ps. 72:7) Dastawe, iumi laek for helpem staka pipol for joinim famili blo iumi evriwea lo world. Iumi savve duim diswan taem iumi focus lo waka for mek disaepol.—Matt. 28:​19, 20.

HAO FOR HELPEM PIPOL FOR LAEK KAM INSAED SPIRITUAL PARADAES

16. Wat nao savve mekem pipol for laek kam insaed spiritual paradaes?

¹⁶ Each wan lo iumi garem important waka for mekem pipol interest for kam insaed  spiritual paradaes. Iumi savve duim datwan if iumi followim example blo Jehovah. Hem no forcem pipol for joinim organization blo hem. Instead, hem kaen and “leadim” pipol for kam lo hem. (John 6:44; Jer. 31:3) Taem pipol wea honest lane abaotem love blo Jehovah and olketa naesfala wei blo hem, datwan mekem olketa laek for kam lo hem. Hao nao gudfala wei blo iumi and wat iumi duim savve helpem pipol for interest lo spiritual paradaes?

17. Hao nao iumi savve helpem pipol for kam insaed spiritual paradaes?

¹⁷ Wanfala samting wea iumi savve duim for helpem pipol kam insaed spiritual paradaes, hem for showim love and kaen lo olketa brata and sista. Taem olketa niu wan attendim kongregeson meeting, iumi laekem olketa for garem sem tingting olsem olketa niu wan wea attendim meeting lo Corinth bifor. Olketa sei: “God hem barava stap witim iufala.” (1 Cor. 14:​24, 25; Zech. 8:23) Dastawe, iumi mas gohed for “traem best for stap gud witim olketa narawan.”—1 Thess. 5:13.

18. Wat nao savve helpem pipol for kam lo organization blo iumi?

¹⁸ Evritaem iumi laek for garem sem tingting olsem Jehovah abaotem olketa brata and sista. Iumi laek for focus lo gudfala wei blo olketa and no wik point blo olketa wea bae finis lo future. Taem iumi stretem eni problem wea iumi garem witim eni brata, iumi duim lo wei wea showimaot love, ‘kaen, sorre, and willing for forgive.’ (Eph. 4:32) Datwan bae helpem pipol for kam insaed spiritual paradaes bikos olketa laekem tu for pipol treatim olketa olsem. b

 GOHED STAP INSAED SPIRITUAL PARADAES

19. (a) Wat nao samfala talem afta olketa kam lo spiritual paradaes? Lukim box “ Olketa wea Lusim and Kam Bak.” (b) Wat nao iumi disaed strong for duim? (Lukim tu piksa.)

¹⁹ Iumi hapi tumas for stap insaed spiritual paradaes! Hem barava luk naes winim enitaem bifor and staka pipol nao kam insaed for worshipim Jehovah. Iumi laek for gohed tinghae lo disfala spiritual paradaes wea Jehovah creatim for iumi. If eniwan laek for strong lo spiritual wei, for satisfae, garem peace, and sef hem mas kam insaed spiritual paradaes and no lusim! Bat iumi need for careful bikos Satan gohed traem best blo hem for mekem iumi lusim datwan. (1 Pet. 5:8; Rev. 12:9) Iumi mas no letem hem win. Iumi waka hard for protectim wei wea spiritual paradaes hem luk naes, klin, and garem peace.