1. Hao nao pipol blo Jehovah lo first century olketa organize?

 EVRITAEM Jehovah givim wanfala assignment, hem expectim pipol blo hem for organize gud taem olketa duim. (1 Cor. 14:33) For example, hem will blo God for pipol blo hem talemaot gud nius lo evri ples lo world. (Matt. 24:14) Jehovah givim responsibility lo Jesus for directim disfala waka. Jesus mek sure olketa wakaman blo hem duim diswan lo wei wea organize. Lo first century, taem olketa niu kongregeson start, olketa elder kasem appointment for lead and givim direction. (Acts 14:23) Lo Jerusalem wanfala body of elders hem stap, wea olketa aposol and olketa nara elder nao insaed. Taem olketa mekem eni disison, olketa expectim evri kongregeson for followim datwan. (Acts 15:2; 16:4) From olketa lo kongregeson obeyim instruction wea olketa kasem, ‘faith bilong olketa gohed for kamap strong, and plande pipol moa olketa biliv.’—Acts 16:5.

2. Since 1919, hao nao Jehovah provaedem direction and spiritual kaikai?

² Nomata distaem tu, Jehovah gohed for organizem pipol blo hem. Since 1919, Jesus iusim wanfala smol grup blo olketa anointed man for organizem preaching waka and provaedem spiritual kaikai for olketa follower blo hem. a (Luke 12:42)  Hem klia, Jehovah blessim waka blo datfala smol grup.—Isa. 60:22; 65:​13, 14.

3-4. (a) Storyim example lo gud samting wea iumi kasem taem iumi organize. (b) Wat nao bae iumi storyim lo disfala article?

³ If iumi no organize, hard for iumi duim waka wea Jesus assignim iumi for duim. (Matt. 28:​19, 20) For example, if olketa no assignim territory for preach, bae man seleva disaed for preach lo wea hem laekem. Taem olsem, olketa pablisa bae end ap duim sem territory evritaem, and then olketa nara territory maet no eniwan duim. Hao, iu savve tingim olketa nara gud samting wea iumi kasem taem iumi organize?

⁴ Jesus gohed for organizem iumi distaem lo sem wei wea hem organizem olketa follower blo hem taem hem stap lo earth. Lo disfala article, iumi bae storyim example blo Jesus and hao organization blo iumi followim example blo hem. Bae iumi discussim tu hao iumi savve showimaot iumi tinghae lo organization blo Jehovah.

ORGANIZATION FOLLOWIM EXAMPLE BLO JESUS

5. Wat nao wanfala wei wea iumi followim example blo Jesus? (John 8:28)

⁵ Jesus lane from Dadi blo hem lo wat for duim and wat for talem. Olsem Jesus, olketa teaching and direction blo organization blo Jehovah hem base lo Bible. (Readim John 8:28; 2 Tim. 3:​16, 17) Iumi evritaem kasem reminder for readim and followim Bible. Hao nao datwan helpem iumi?

6. Wat nao wanfala gud samting wea iumi kasem taem iumi studyim Bible?

⁶ Iumi savve kasem gud samting taem iumi study Bible and iusim olketa pablikeson. For example, iumi savve comparem olketa Bible teaching witim direction wea iumi kasem from organization. Taem iumi lukim direction wea iumi kasem hem base lo Bible, datwan strongim go moa trust blo iumi lo organization blo Jehovah.—Rome 12:2.

7. Wat nao message wea Jesus preachim, and hao nao organization blo Jehovah followim example blo hem?

⁷ Jesus preachim “gud nius abaotem Kingdom bilong God.” (Luke 4:​43, 44) Jesus komandim tu olketa disaepol blo hem for preach abaotem Kingdom. (Luke 9:​1, 2; 10:​8, 9) Distaem, evriwan insaed organization blo Jehovah tu preachim Kingdom message, nomata wea nao olketa stap or wat kaen responsibility olketa garem lo organization.

8. Wat privilege nao iumi kasem?

⁸ Hem wanfala spesol privilege for iumi storyim truth abaotem Kingdom blo God lo olketa narawan! Disfala privilege for duim preaching waka, hem no just for eniwan nomoa. For example, taem Jesus lo earth, hem no letem olketa wicked spirit for witness abaotem hem. (Luke 4:41) Distaem tu, bifor eniwan start for go preach witim pipol blo Jehovah, hem mas qualify firstaem for datfala privilege. For showimaot iumi tinghae lo disfala privilege, iumi savve witness enitaem and lo eni ples. Olsem Jesus, goal blo iumi hem for plantim and watarem olketa seed blo Kingdom truth lo heart blo pipol.—Matt. 13:​3, 23; 1 Cor. 3:6.

9. Hao nao organization helpem pipol for savve lo nem blo God?

⁹ Jesus talemaot nem blo God. Taem Jesus prea lo Dadi blo hem lo heven, hem sei: “Mi talemaot nem bilong iu long olketa.” (John 17:26) Organization blo Jehovah followim example blo Jesus taem hem duim best for helpem olketa narawan for savve lo nem blo God. Wanfala wei hem duim diswan, hem taem olketa mek sure for putim nem blo  God lo olketa stretfala ples blo hem insaed New World Translation of the Holy Scriptures. Distaem olketa transleitim full Bible hia or samfala part blo hem lo winim 270 languis. Lo Appendix A4 and A5 lo datfala New World Translation, bae iu lukim history abaotem hao olketa putim bak nem blo God insaed Bible. Appendix C, lo English Study Bible, hem garem pruv wea showimaot nem blo God shud stap lo olketa Christian Greek Scripture 237 taems.

10. Wat nao iu lanem from samting wea wanfala woman lo Myanmar talem?

¹⁰ Iumi tu laek for helpem staka pipol for savve lo nem blo God, olsem Jesus duim. Taem wanfala 67-year-old woman lo Myanmar lanem hao God garem nem, hem krae and sei: “Diswan nao firstaem for mi herem nem bilong God hem Jehovah. . . . Iu teachim mi barava important samting winim eni nara samting wea mi need for lanem.” Olsem disfala experience showim, taem pipol lane abaotem nem blo God hem savve changem laef blo olketa.

GOHED SHOWIMAOT IUMI TINGHAE LO ORGANIZATION

11. Hao nao olketa elder savve showimaot olketa tinghae lo organization blo Jehovah? (Lukim tu piksa.)

¹¹ Wat nao wanfala wei wea olketa elder savve showimaot olketa tinghae lo organization blo God? Taem olketa elder kasem direction from organization, olketa elder need for readim gud and traem best for followim. For example, olketa kasem direction lo hao for duim olketa meeting part, hao for offerim prea for kongregeson, and hao for lukaftarem sheepsheep blo Christ. Olketa elder wea followim direction from organization bae helpem olketa brata and sista wea olketa lukaftarem for feelim love blo Jehovah and feel sef.

12. (a) Why nao iumi shud obeyim olketa wea lead? (Hebrew 13:​7, 17) (b) Why nao iumi shud focus lo positive wei blo olketa wea lead?

¹² Taem iumi kasem direction from olketa elder, iumi shud willing for followim. Taem iumi duim datwan, bae hem isi for olketa duim waka blo olketa. Bible encouragem iumi for obey and followim olketa wea lead. (Readim Hebrew 13:​7, 17.) Samfala taem datwan savve challenging. Why? Bikos olketa no perfect. Bat, if iumi focus lo olketa negative wei blo olketa winim for ting lo positive saed, hem bae olsem iumi sapotim olketa enemy blo iumi. Why nao iumi sei olsem? Bae iumi mekem olketa brata and sista for no trustim organization blo God, wea datwan nao goal blo olketa enemy blo iumi. Wat nao iumi savve duim for luksavve and rejectim olketa laea story blo olketa enemy?

NO LETEM NARAWAN SPOELEM WEI WEA IUMI TINGHAE LO ORGANIZATION

13. Wat nao olketa enemy blo God duim for trae spoelem organization blo God?

¹³ Olketa enemy blo God trae for mekem positive samting wea organization blo God duim for hem luk negative. For example, iumi lanem from Bible hao Jehovah expectim olketa wea worshipim hem for klin lo spiritual and physical wei, and for wei blo olketa tu mas klin. Hem sei eniwan wea no repent and gohed for duim samting wea no klin mas aot from kongregeson. (1 Cor. 5:​11-13; 6:​9, 10) Iumi obeyim disfala Bible komand. Bat olketa wea againstim iumi trae for iusim datwan for accusim iumi and sei iumi no lovem pipol, judgem olketa, and no acceptim eniwan wea wei blo hem difren.

14. Hu nao kosim olketa laea story abaotem organization?

¹⁴ Luksavve lo man wea bihaenem olketa attak. Satan datfala Devil nao kosim olketa laea  story. Hem nao “dadi bilong wei for laea.” (John 8:44; Gen. 3:​1-5) So iumi expectim pipol blo hem for promotim olketa laea story abaotem organization. Datwan happen lo olketa Christian lo first century.

15. Wat nao olketa religious leader duim lo Jesus and olketa follower blo hem?

¹⁵ Lo first century, olketa wea sapotim Satan talem staka laea abaotem perfect Son blo God wea duim olketa mirakol. For example, olketa religious leader talem pipol hao paoa wea Jesus kasem for raosem olketa demon, hem kam from “boss bilong olketa demon.” (Mark 3:22) Lo kot case blo Jesus, olketa religious leader sei Jesus tok spoelem God and olketa bihaenem pipol for ask for killim dae Jesus. (Matt. 27:20) Bihaen, taem olketa follower blo Christ preachim gud nius, olketa wea againstim olketa bihaenem pipol for persecutim olketa Christian hia. (Acts 14:​2, 19) Wastaoa blo December 1, 1998, explainim wat Acts 14:2 storyim, and sei hao ‘olketa Jew no satisfae for rejectim message nomoa, bat olketa laea for tok spoelem olketa Christian mekem olketa wea no Jew againstim olketa.’

16. Wat nao iumi shud tingim if iumi herem olketa laea story?

¹⁶ Lo first century tu, Satan gohed for laea. Distaem, hem still gohed “laea long evriwan long earth.” (Rev. 12:9) If iu herem eniwan storyim negative samting abaotem organization or olketa brata wea lead, no forgetim wat olketa enemy blo God duim lo Jesus and olketa disaepol blo hem lo first century. Olsem Bible talem, distaem pipol gohed laea and persecutim pipol blo Jehovah. (Matt. 5:​11, 12) Olketa laea story bae no trikim iumi if  iumi luksavve hu nao bihaenem datwan and iumi kwiktaem duim samting. Wat nao iumi shud duim?

17. Wat nao iumi savve duim for olketa laea story no affectim iumi? (2 Timothy 1:13) (Lukim tu box “ Wat for Duim Taem Iumi Herem Olketa Laea Story.”)

¹⁷ Rejectim laea story. Aposol Paul givim klia instruction lo wat for duim if iumi herem laea story. Hem talem Timothy for talem olketa Christian for “no lisin long olketa laea story” and for rejectim “olketa laea story wea no showimaot respect for samting wea holy.” (1 Tim. 1:​3, 4; 4:7) Wanfala pikinini savve pikim nomoa eniting from floor and putim insaed mouth blo hem, bat wanfala mature person bae no duim diswan bikos hem luksavve datwan savve mekem hem sik. Iumi tu rejectim olketa laea story bikos iumi luksavve finis ples wea datfala information kam from. Iumi hol strong lo olketa “gudfala toktok” blo truth.—Readim 2 Timothy 1:13.

18. Hao nao iumi savve showimaot iumi tinghae lo organization blo Jehovah?

¹⁸ Organization blo God followim example blo Jesus lo staka wei, bat tuday iumi storyim thrifala nomoa. Taem iu gohed studyim Bible, luk for olketa nara wei wea organization followim example blo Jesus. Helpem olketa lo kongregeson for strongim wei wea olketa tinghae lo organization. And gohed for showimaot iu tinghae taem iu loyal for servem Jehovah and barava followim organization wea hem iusim for duim will blo hem. (Ps. 37:28) Iumi laek for gohed tinghae lo privilege wea iumi garem for associate witim pipol blo Jehovah wea loyal and showimaot love.