1. Wat nao Jehovah laekem iumi for duim?

 WANFALA hasband and waef savve hapi tumas taem baby blo tufala hem born. Tufala lovem tumas niu born baby blo tufala, nomata olsem, tufala no laekem hem for baby for olowe. Really, sapos hem no grow bae tufala wari tumas. Taem baby tekem first step blo hem for wakabaot parents barava hapi. Lo sem wei tu, Jehovah hapi taem iumi tekem olketa first step for followim Jesus, bat Hem no laekem iumi for stap olsem spiritual baby for olowe. (1 Cor. 3:1) Instead, hem laekem iumi for kamap Christian “wea mature.”—1 Cor. 14:20.

2. Wat nao bae iumi storyim lo disfala article?

² Wat nao hem minim for kamap wanfala full-grown Christian? Hao nao iumi savve kamap wanfala mature Christian? Hao nao strongfala spiritual kaikai savve helpem iumi for grow? And why nao iumi shud no ova confident? Lo disfala article, bae iumi storyim ansa for olketa kwestin hia.

WAT NAO HEM MINIM FOR KAMAP WANFALA MATURE CHRISTIAN?

3. Wat nao hem minim for kamap wanfala full-grown Christian?

³ Lo Bible, Greek word wea olketa transleitim lo “mature” hem savve minim “full-grown,” “perfect,” and “complete.” a (1 Cor. 2:6) Iumi kamap full-grown or mature Christian taem iumi lusim olketa wei blo iumi wea olsem wanfala spiritual baby, datwan minim iumi kamap spiritual man or woman. Bat, nomata iumi kasem goal for kamap mature, iumi shud no stop  for gohed grow lo spiritual wei. (1 Tim. 4:15) Iumi evriwan, nomata olketa wea young tu, savve kamap mature lo spiritual wei. Bat wat nao showim dat wanfala Christian hem kamap mature?

4. Wat nao showim wanfala Christian hem mature?

⁴ If samwan hem mature Christian hem followim evri samting wea God askem hem for duim and no chusim nomoa olketa law wea hemseleva laek followim. Nomata olsem, bikos hem no perfect hem savve mekem olketa mistek tu. Hem showimaot evriday dat hem tingim and duim samting followim will blo God. Hem garem niufala wei and evritaem trae for garem tingting blo Jehovah lo olketa samting. (Eph. 4:​22-24) Hem trainim hemseleva for mekem wise disison followim olketa law and principle blo Jehovah, so hem no needim wanfala long list blo olketa rul. Taem hem mekem wanfala disison, hem disciplinem hemseleva for duim wat hem disaedem.—1 Cor. 9:​26, 27.

5. Wat nao olketa danger wea isi for kasem wanfala Christian wea no mature? (Ephesus 4:​14, 15)

⁵ Bat, Christian wea no mature isi for bilivim olketa “laea” story and for pipol “trikim” hem, and bilivim olketa false story lo media and olketa apostate. b (Readim Ephesus 4:​14, 15.) Maet hem isi for jealous, raoa, feel nogud, or foldaon lo temptation.—1 Cor. 3:3.

6. Wat nao wanfala illustration wea savve helpem iumi for minim wei for kamap mature? (Lukim tu piksa.)

⁶ Olsem iumi storyim finis, Bible comparem wei for kamap mature lo spiritual wei witim hao wanfala pikinini grow for kamap adult. Pikinini no savve lo staka samting so hem needim protection and help from adult. For example, wanfala mami maet talem young dota blo hem for holem hand blo hem taem tufala akrosim road. Taem gele hia grow ap big lelebet, maet mami letem hemseleva for akrosim road, bat mami bae still remindim hem for luk lo tu-saed lo road bifor hem akros. Taem gele hia kamap adult, hem savve hao for avoidim olketa danger hia seleva. Lo sem wei wea pikinini needim help from adult for avoidim danger, Christian wea no mature staka taem needim help from olketa  mature Christian for avoidim spiritual danger and mekem wise disison. Bat Christian wea mature hem difren, bae hem ting raonem firstaem olketa Bible principle for savve lo tingting blo Jehovah, and then bae hem mekem disison and followim.

7. Hao, olketa mature Christian needim help from narawan tu?

⁷ Hao, datwan minim wanfala mature Christian no need for askem help from eniwan? Nomoa. Samfala taem, olketa mature Christian tu need for askem help. Samwan wea no mature maet expectim narawan for talem hem wat for duim or mekem disison wea hemseleva nao shud disaedem. Wanfala mature Christian hem no olsem, bae hem askem help from olketa wea garem wisdom and experience, bat hem luksavve Jehovah expectim hem for mekem disison blo hemseleva and karem own load blo hem.—Gal. 6:5.

8. Hao nao olketa wea mature no semsem?

⁸ Evri adult no luk semsem, lo sem wei tu, wei blo olketa mature Christian no semsem. Maet olketa garem olketa difren spiritual wei olsem wisdom, wei for brave, kaen, and tingim narawan. And tu, taem tufala mature Christian feisim sem situation, maet idea wea tufala garem hem no semsem nomata tufala disaed followim Bible principle. Staka taem diswan savve kamap taem tufala mas mekem disison wea followim konsens blo tufala. Taem olsem, tufala bae no judgem each other. Instead, tufala bae focus lo wei for wan mind.—Rome 14:10; 1 Cor. 1:10.

HAO NAO IUMI SAVVE KAMAP MATURE CHRISTIAN?

9. Waswe, hao iumi grow lo spiritual wei hem happen automatic? Explainim.

⁹ Taem pikinini growap for kamap adult hem wanfala natural process wea isisi happen. Bat taem iumi grow lo spiritual wei hem no happen automatic. For example, olketa brata and sista lo Corinth acceptim gud nius, baptaes, kasem holy spirit, and lanem staka gud samting from instruction blo aposol Paul. (Acts 18:​8-11) Bat, nomata olketa baptaes for longtaem finis, staka no kamap mature yet. (1 Cor. 3:2) Wat nao iumi savve duim for mek sure iumi no olsem?

10. Wat nao iumi mas duim for kamap mature Christian? (Jude 20)

¹⁰ For kamap mature, first samting hem nao for iumi mas willing for laek duim datwan. Olketa wea no laek for “garem savve,” laekem nomoa for stap olsem pikinini lo spiritual wei, and no progress. (Prov. 1:22) Iumi no laek for olsem pikinini wea full-grown bat still depend lo parents for mekem disison for olketa. Instead, iumi laek for responsible for wei wea iumi kamap mature lo spiritual wei. (Readim Jude 20.) If iu still waka hard for kamap mature, prea lo Jehovah for mekem iu garem datfala feeling for laek kamap mature and for hem givim iu paoa for duim datwan.—Phil. 2:13.

11. Wat nao Jehovah givim for helpem iumi kamap mature? (Ephesus 4:​11-13)

¹¹ Jehovah no expectim for iumi kamap mature seleva. Olketa shepherd and teacher insaed Christian kongregeson redi for helpem iumi for “kamap mature” lo spiritual wei, “wea diswan minim iumi [bae kamap] barava mature olsem Christ.” (Readim Ephesus 4:​11-13.) Jehovah givim holy spirit tu for helpem iumi “garem tingting bilong Christ.” (1 Cor. 2:​14-16) And tu, God givim kam fofala Gospel for showim iumi tingting, toktok, and wat Jesus duim taem hem stap lo earth. Taem iu garem sem tingting olsem Jesus and duim sem samting wea hem duim, iu savve kasem goal blo iu for kamap mature Christian.

 HAO STRONGFALA SPIRITUAL KAIKAI SAVVE HELPEM IUMI

12. Wat nao “olketa main teaching abaotem Christ”?

¹² For iumi gohed for kamap mature, iumi mas lanem moa samting winim “olketa main teaching abaotem Christ.” Samfala lo olketa main teaching hia hem nao repentance, faith, baptism, and resurrection. (Heb. 6:​1, 2) Diswan hem samfala lo olketa basic teaching wea olketa Christian bilivim. Dastawe taem aposol Peter preach lo pipol lo Pentecost, hem story abaotem olketa teaching hia. (Acts 2:​32-35, 38) For kamap disaepol blo Christ, iumi mas acceptim olketa main teaching hia. For example, Paul talem dat eniwan wea denyim teaching blo resurrection hem no wanfala tru Christian. (1 Cor. 15:​12-14) Bat iumi mas no satisfae for savve nomoa lo olketa main teaching blo truth.

13. Hao nao iumi savve kasem gud samting from strongfala spiritual kaikai wea Hebrew 5:14 storyim? (Lukim tu piksa.)

¹³ Strongfala spiritual kaikai hem moa deep winim olketa main Bible teaching. Strongfala spiritual kaikai includim olketa law and principle blo Jehovah wea savve helpem iumi for minim tingting blo Hem. For kasem gud samting from datwan, iumi mas studyim, meditate, and traem best for followim wat iumi lanem lo Bible. Taem iumi duim olsem, iumi trainim iumiseleva for mekem olketa disison wea Jehovah hapi lo hem. c—Readim Hebrew 5:14.

14. Hao nao Paul helpem olketa Christian lo Corinth for kamap mature?

¹⁴ Staka taem, if wanfala situation kamap wea needim man for ting raonem Bible principle and for followim, olketa Christian wea no mature faendem hard for deal witim datwan. If olketa no lukim eni law lo Bible, samfala maet tingse olketa free for duim eniting wea olketa laekem. Maet olketa nara Christian ask for wanfala rul, nomata no eni rul stap. For example, luk olsem olketa Christian lo Corinth askem Paul for wanfala rul abaotem wei for kaikaim kaikai wea olketa sakrifaesim lo idol. Paul no talem olketa wat for duim, bat hem storyim waka blo konsens  and hao each wan garem raet for chusim wat olketa “fit for duim.” Hem storyim olketa principle wea letem each wan for mekem disison wea bae no spoelem konsens blo olketa and no stambolem narawan. (1 Cor. 8:​4, 7-9) Taem Paul duim datwan, hem helpem olketa Christian lo Corinth for kamap mature mekem olketa savve hao for ting raonem and luksavve lo samting seleva, instead for depend lo narawan or lukaotem olketa rul.

15. Hao nao Paul helpem olketa Hebrew Christian for kamap mature lo spiritual wei?

¹⁵ Iumi lanem wanfala important leson from wat Paul raetem for olketa Hebrew Christian. Samfala lo olketa no gohed mature bikos olketa stop for “kaikaim strongfala kaikai” and lo spiritual wei olketa go bak moa lo wei for “susu.” (Heb. 5:12) Olketa no lane and acceptim olketa niu samting wea Jehovah teachim kongregeson. (Prov. 4:18) For example, staka Jew Christian still mekhae lo Law blo Moses nomata sakrifaes blo Jesus finisim datfala Law samting olsem 30 years bifor. (Rome 10:4; Titus 1:10) For sure 30 years hia, hem inaf taem for olketa Jew Christian luksavve olketa no need for followim Law blo Moses. Taem iumi readim leta blo Paul for olketa Hebrew Christian, iumi savve lukim hao disfala buk garem olketa deep spiritual truth. Leta blo Paul barava helpem olketa Hebrew Christian for lukim hao disfala niu wei for worship wea Jehovah mekem for kamap hem gud winim hao olketa worship bifor, and hem helpem olketa for no fraet for preach nomata olketa nara Jew againstim olketa.—Heb. 10:​19-23.

NO OVA CONFIDENT

16. If iumi kamap mature finis, wat nao iumi mas gohed duim?

¹⁶ Iumi mas waka hard for kamap mature Christian and gohed for maintainim datwan. Diswan minim for iumi mas no ova confident. (1 Cor. 10:12) Iumi mas “gohed for lukluk gud” lo iumiseleva for mek sure iumi duim olketa samting wea helpem iumi for grow lo spiritual wei.—2 Cor. 13:5.

17. Hao nao leta blo Paul for olketa Christian lo Colossae showim dat olketa need for gohed mature?

¹⁷ Lo leta blo Paul for olketa Christian lo Colossae, hem haelaetim hao olketa need for  gohed for stap olsem mature Christian. Nomata olketa Christian hia mature finis, Paul warnim olketa for mas careful nogud tingting blo disfala world affectim olketa. (Col. 2:​6-10) And Epaphras, wea hem savve gud lo olketa lo kongregeson blo Colossae, hem evritaem prea strong for olketa kamap barava “mature.” (Col. 4:12) Wat nao point? Paul and Epaphras luksavve for man gohed stap mature hem mas gohed waka hard and depend lo help blo God. Tufala laekem olketa Christian lo Colossae for gohed mature and stap olsem olketa full-grown Christian nomata olketa feisim eni challenge.

18. Wat nao savve happen lo wanfala mature Christian? (Lukim tu piksa.)

¹⁸ Paul warnim olketa Hebrew Christian dat wanfala mature Christian savve lusim appruvol blo God for olowe. Taem wanfala Christian gohed for no obeyim God, bae gogo hem hard for repent and kasem forgiveness blo God. Gud samting nao, olketa Hebrew Christian no duim datwan. (Heb. 6:​4-9) Waswe lo olketa wea kamap inactive or disfellowship then gogo olketa repent? Wei wea olketa hambol and repent, hem showim olketa difren from olketa wea Paul raet abaotem wea lusim appruvol blo God for olowe. Bat, taem olketa kam bak lo Jehovah, olketa needim help wea hem provaedem. (Ezek. 34:​15, 16) Maet olketa elder arrange for wanfala mature Witness for helpem hem for strongim bak frenship blo hem witim Jehovah.

19. Wat nao goal wea iumi shud garem?

¹⁹ Iu savve kasem goal blo iu for kamap mature Christian, if iu waka hard! Gohed for kaikaim olketa strongfala spiritual kaikai and trae for garem tingting blo Jehovah lo olketa samting. If iu kamap mature Christian finis, gohed for maintainim datwan.