IUMI pipol bilong Jehovah wea studyim Bible iumi olsem olketa man wea lukaotem gold. Iumi mas waka hard and gohed lukaotem nambawan wisdom bilong God wea stap insaed long Bible. Bae iumi storyim thrifala samting wea man savve duim taem hem lukaotem gold, and wanem nao iumi savve lanem from datwan?

Tingim sapos iu wakabaot followim wanfala river and iu lukim wanfala smol ston hem shaen kam. Iu bendaon for lukim and iu hapi tumas iu faendem wanfala smol pis gold. Hem barava smol tumas, bat price bilong hem winim price bilong wanfala barava spesol diamond. So iu lukluk gud moa long datfala ples for faendem samfala pis gold moa.

Tingim firstaem wea wanfala Jehovah’s Witness kam long haos bilong iu for storyim gud nius long Bible. Maet iu no savve forgetim firstaem wea iu lanem wanfala tru teaching long Bible, wea datwan hem olsem firstfala spiritual gold wea iu faendem. Maet datwan hem happen long firstaem wea iu lukim nem bilong God, Jehovah, insaed long Bible. (Ps. 83:18) Or maet iu lanem iu savve fren witim Jehovah. (Jas. 2:23) Iu luksavve iu faendem nao samting wea price bilong hem winim gold! And maet iu barava laek for lukaotem samfala spiritual gold moa.

Olketa smol pis gold savve stap insaed olketa creek and olketa river. Sapos olketa man waka hard for lukaotem gold long olketa ples olsem, insaed tu-thri month olketa savve faendem olketa gold wea kostim staka thousand dollar.

Taem iu studyim Bible witim Olketa Jehovah’s Witness, maet iu feel olsem man wea faendem staka gold. Wei for lanem and gohed for ting raonem staka scripture long Bible hem mekem savve bilong iu kamap big, and datwan hem barava strongim faith bilong iu. Taem iu gohed lanem olketa tru teaching insaed long Bible, iu lanem wanem iu mas duim for fren gud witim Jehovah and “gohed kasem gud samting from love bilong God.”—Jas. 4:8; Jude 20, 21.

Olsem man wea lukaotem gold, iu barava waka hard for lukaotem olketa spiritual gold. Bihaen iu lanem olketa main teaching long Bible, datwan mekem iu laek for dedicate and baptaes.—Matt. 28:19, 20.

Pipol savve faendem olketa sismol pis gold insaed long wanfala kaen ston wea olketa kolem igneous ston. Olketa kaen ston hia garem staka gold insaed so olketa savve digim aot and smasem for aotem gold insaed. Taem man lukluk nomoa long datfala ston, maet hem no lukim eni gold. Why nao olsem? Bikos staka taem pipol savve faendem nomoa 10 gram bilong gold insaed long wan ton bilong olketa ston hia. Nomata olsem, pipol wea lukaotem gold no ting long datwan olsem olketa hard waka nating.

Man mas gohed waka hard tu for studyim Bible seleva bihaen hem lanem “olketa main teaching abaotem Christ.” (Heb. 6:1, 2) Sapos iu laek for lanem olketa point wea iu no tingim bifor and hao iu savve followim olketa point hia long laef bilong iu, iu mas waka hard. So wanem nao iu savve duim mekem iu gohed enjoyim and kasem gud samting from wei for study seleva, nomata iu studyim Bible for staka year finis?

Iu mas laek for gohed lanem niu samting. Taem iu readim Bible, trae for barava minim gud wanem iu read abaotem. Gohed waka hard for studyim Bible and bae iu faendem wisdom bilong God and nambawan advaes, wea olketa samting hia hem olsem spiritual gold. (Rome 11:33) For savve gud long Bible, iusim gud olketa tul wea organization bilong Jehovah provaedem wea stap long languis bilong iu. No givap for duim research sapos iu needim help long wanfala samting wea kamap long laef bilong iu, or iu laek savve long ansa bilong wanfala Bible kwestin. Askem narawan wanem scripture and article nao helpem and encouragem hem. Storyim long narawan olketa interesting point wea iu lanem taem iu studyim Bible seleva.

Taem iumi studyim Bible seleva, iumi no laek for winim olketa narawan saed long savve bilong iumi. Aposol Paul sei: “Savve wea man garem savve mekem hem praod.” (1 Cor. 8:1) So iumi mas waka hard for hambol and garem strongfala faith. Taem iumi duim famili worship and studyim Bible seleva evritaem, iumi bae duim wanem Jehovah laekem, and bae iumi laek for helpem olketa narawan. Bae iumi barava hapi bikos iumi faendem samting wea price bilong hem winim gold.—Prov. 3:13, 14.