“NO ENI nara war hem barava nogud olsem war wea gohed long Europe distaem.” Diswan nao hem samting wea The Watch Tower bilong September 1, 1915, hem talem abaotem World War I, wea 30 kantri nao join insaed. Bikos long war hia, datfala magasin sei: “Hem no isi for pipol bilong Jehovah duim waka bilong hem, especially long Germany and France.”

War hia affectim staka kantri. Long datfala taem, olketa Bible Student no really minim gud Bible principle abaotem wei for no teksaed so samfala joinim army. Nomata olsem, olketa barava laek for preachim gud nius. Wilhelm Hildebrandt laek for duim preaching waka, so hem orderim olketa tract long French languis wea garem title The Bible Students Monthly. Hem no go long France for duim waka olsem colporteur (pioneer), bat hem go olsem wanfala soldia from Germany. Pipol long there barava sapraes taem olketa lukim soldia wea kam for faetem kantri bilong olketa hem givimaot tract wea story abaotem peace.

Insaed The Watch Tower magasin hem garem samfala leta bilong olketa Bible Student long Germany wea sei olketa barava laek for preachim gud nius abaotem Kingdom nomata olketa insaed long army. Brata Lemke wea hem insaed navy hem sei faevfala wea hem waka witim olketa interest long gud nius. Hem sei: “Long disfala ship tu Jehovah helpem mi for faendem pipol wea interest.”

Georg Kayser hem go for faet long war, bat taem hem kam bak hem wanfala Witness bilong Jehovah nao. Hao nao gogo hem kamap wanfala Witness? Hem kasem wanfala pablikeson bilong olketa Bible Student, hem acceptim truth, and hem lusim army. Then hem duim difren waka. Bihaen long war, hem pioneer for staka year.

Nomata olketa Bible Student no minim gud yet staka samting abaotem wei for no teksaed, tingting bilong olketa and samting wea olketa duim hem barava difren from pipol long datfala taem. Olketa bigman long gavman and olketa bigman long religion sapotim datfala war, bat olketa Bible Student sapotim “Prince bilong Peace.” (Isa. 9:6) Nomata samfala Bible Student duim samting wea sapotim war, olketa garem  strongfala biliv olsem datfala Bible Student Konrad Mörtter. Hem sei: “Mi barava luksavve samting wea Bible talem showimaot wanfala Christian mas no killim man dae.”—Ex. 20:13. *

Long Germany, nomata law hem sei evri man mas go faet long war, winim 20-fala Bible Student sei olketa bae no joinim army bikos diswan hem againstim konsens bilong olketa. From olketa no joinim army, pipol sei masbi olketa mentol. So olketa putim samfala long mentol hospital. Wanfala nao Gustav Kujath, wea olketa putim hem long hospital hia for treatim hem. Samfala narawan moa olketa putim long prison. Wanfala nao hem Hans Hölterhoff. Nomata hem stap long prison, hem no laek for duim eni waka wea sapotim war. Olketa gard mekem hem werem wankaen jacket. Datfala jacket pipol savve iusim for taetem tufala hand bilong man raonem body bilong hem. Taem olketa duim datwan long Hans, datwan mekem tufala hand bilong hem barava numb. From hem no givap, olketa gard tekem hem go long wanfala ples for sutim hem dae bat olketa trikim hem nomoa. Nomata olsem, Hans gohed faithful long Jehovah long datfala taem.

Olketa nara brata wea gavman sei olketa mas go faet, olketa no laek for holem gun bat olketa ask for duim eni nara waka. * Wanfala nao hem Johannes Rauthe, wea olketa talem hem for go waka long road bilong train. Konrad Mörtter hem orderly for hospital, and Reinhold Weber hem wanfala nurse. August Krafzig hem hapi bikos hem duim olketa nara waka and hem no go for faet. Olketa Bible Student hia and olketa narawan tu worshipim Jehovah bikos olketa lovem hem and faithful long hem. Olketa duim diswan followim savve wea olketa garem long datfala taem.

Bikos long wanem olketa Bible Student duim long taem bilong war, diswan mekem gavman for againstim olketa. Long olketa year bihaen long war, staka kot case kamap wea gavman tekem olketa Bible Student long kot bikos olketa duim preaching waka. For helpem olketa, branch office long Germany startim wanfala legal department long Bethel long Magdeburg.

Savve bilong Olketa Jehovah’s Witness abaotem wei for no teksaed hem isisi kamap klia. Taem World War II hem start, olketa no joinim army and olketa barava no teksaed long datfala war. So gavman long Germany ting long olketa olsem enemy bilong olketa and barava againstim olketa. Bae iumi storyim datwan long nara magasin insaed long article wea garem title, “History Bilong Iumi.”—From branch office long Central Europe.