Story bilong Matthew abaotem laef bilong Jesus taem hem pikinini hem difren from story bilong Luke. Why nao olsem? Bikos tufala storyim tingting and experience bilong tufala difren pipol.

Matthew raet abaotem olketa samting wea affectim laef bilong Joseph. Hem raet abaotem feeling bilong Joseph taem hem herem Mary babule, dream wea angel explainim samting wea happen, and samting wea Joseph duim for followim datwan. (Matt. 1:19-25) Hem storyim tu dream bilong Joseph wea angel talem olketa for ranawe go long Egypt, dream wea angel talem Joseph for hem and famili kam bak long Israel, and disison wea hem mekem for olketa stap long Nazareth. (Matt. 2:13, 14, 19-23) Long first tufala chapter long Bible buk Matthew, nem bilong Joseph kamap tenfala taem, bat nem bilong Mary eitfala taem nomoa.

Bat Luke raet abaotem olketa samting wea affectim laef bilong Mary. Hem story abaotem angel Gabriel wea kam long Mary, taem Mary go visitim relative bilong hem Elizabeth, and samting wea Mary talem for praisem Jehovah. (Luke 1:26-56) Luke storyim tu toktok wea Simeon talem long Mary abaotem olketa hard taem wea Jesus bae kasem. Hem raet abaotem olketa samting wea Mary talem taem Jesus hem 12 year and famili bilong hem go long temple, bat hem no storyim wanem Joseph talem. Luke storyim tu hao olketa samting hia wea happen barava affectim Mary. (Luke 2:19, 34, 35, 48, 51) Long first tufala chapter long Bible buk Luke, nem bilong Mary kamap 18-fala taem, bat nem bilong Joseph 6-fala taem nomoa. So Matthew raet abaotem olketa samting wea Joseph duim and olketa samting wea hem wari abaotem. And Luke raet abaotem olketa samting wea Mary duim and olketa samting wea happen long laef bilong hem.

Nara samting, hao tufala storyim famili laen bilong Jesus hem difren tu. Matthew story abaotem famili laen wea Joseph kam from. From Joseph adoptim Jesus, Jesus garem raet for king bikos hem kam from laen bilong King David. Why nao olsem? Bikos Joseph kam from laen bilong Solomon, wea hem son bilong David. (Matt. 1:6, 16) Bat Luke raet abaotem famili laen wea Mary kam from, wea datwan showimaot Jesus hem barava born long famili laen bilong King David. (Rome 1:3) Why nao olsem? Bikos Mary hem kam from laen bilong Nathan, wea hem son bilong King David. (Luke 3:31) Bat why nao Luke no putim nem bilong Mary taem hem raet abaotem famili laen bilong Heli, wea hem dadi bilong Mary? Bikos olketa man nomoa olketa savve raetem nem bilong olketa insaed record abaotem famili laen. So taem Luke raetem nem bilong Joseph and storyim hem olsem son bilong Heli, datwan showimaot hem son-in-law bilong Heli.—Luke 3:23.

List bilong olketa famili laen wea Matthew and Luke raetem, barava showimaot klia Jesus nao Messiah wea Bible profesi abaotem. Staka pipol savve abaotem famili laen wea Jesus born kam from hem, nomata olketa Pharisee and Sadducee tu no denyim datwan. Distaem tu, datfala record abaotem famili laen bilong Jesus wea Matthew and Luke raetem hem part long faondeson long faith bilong iumi, and hem pruvim olketa samting wea God promisim bae kamap tru.