JEHOVAH iusim aposol Paul for raet abaotem naenfala fasin wea holy spirit savve helpem man for garem. (Gal. 5:22, 23) Evri gudfala fasin hia Bible kolem long wei bilong holy spirit. * Olketa fasin hia hem part long datfala “niufala wei” wea olketa Christian mas garem. (Col. 3:10) Olsem wanfala tree wea samwan watarem evritaem savve garem olketa gudfala frut, iumi bae garem olketa gudfala fasin hia sapos iumi letem holy spirit for leadim iumi.—Ps. 1:1-3.

First samting wea Paul storyim hem love. Why nao love hem wanfala nambawan fasin? Paul sei sapos hem no garem love, ‘samting wea hem duim hem iusles nomoa.’ (1 Cor. 13:2) Bat wanem nao love, and wanem nao iumi savve duim for garem love, and for evritaem showimaot datwan?

Nomata hem no isi for explainim love, Bible storyim samting wea showimaot man hem garem love. Olsem example, man wea garem love hem “patient and kaen” and “hapi long samting wea tru.” And tu, “nomata wanem hem happen, man wea garem love hem hapi nomoa. Hem gohed for biliv, hem evritaem garem hope, and no eni samting savve mekem hem givap.” Hem lovem narawan, tingim olketa, and hem fren wea faithful. Bat man wea no garem love savve jealous, praod, garem nogud tingting, selfish, and no willing for forgive. Man wea showimaot trufala love hem “no tingim hemseleva nomoa.”—1 Cor. 13:4-8.

“God hem love.” (1 John 4:8) Datwan showaot long evri samting wea hem wakem and duim. Hem showimaot hem barava lovem olketa man taem hem sendem kam Jesus long earth for safa and dae for iumi. Aposol John sei: “Love wea God garem for iumi hem showaot taem hem sendem kam spesol Son bilong hem long world mekem iumi savve kasem laef bikos long hem. God sendem kam Son bilong hem olsem wanfala sakrifaes for olketa sin bilong iumi mekem iumi savve fren bak witim hem. Hem duim diswan bikos hem lovem iumi no bikos iumi lovem hem.” (1 John 4:9, 10) From God lovem iumi, iumi savve kasem forgiveness for olketa sin bilong iumi, and iumi garem hope for laef olowe.

Jesus showimaot hem lovem iumi olketa man taem hem duim wanem God laekem. Aposol Paul sei: “From Jesus Christ duim ‘wanem God hem laekem,’ hem givim body bilong hem olsem sakrifaes wantaem nomoa, wea datwan hem mekem iumi holy.” (Heb. 10:9, 10) Hard for eni man showimaot kaen love olsem. Jesus sei: “Man wea barava showimaot bigfala love nao hem man wea willing for dae for olketa fren bilong hem.” (John 15:13) Waswe, olketa man wea sin savve followim example bilong Jehovah and Jesus for showimaot love? Yes! Iumi bae storyim hao iumi savve duim datwan.

Paul encouragem iumi olsem: “From iufala olketa pikinini bilong God wea hem lovem, iufala  mas followim wei bilong hem. Mekem hem wei bilong iufala for showimaot love, olsem Christ tu hem lovem iufala and givim hemseleva for iufala.” (Eph. 5:1, 2) Disfala toktok “mekem hem wei bilong iufala for showimaot love” hem minim hem samting wea iumi mas duim evritaem. Iumi no just talem iumi lovem olketa narawan, bat duim samting for showimaot datwan. Aposol John sei: “Olketa pikinini bilong mi, love bilong iumi mas no showaot long samting wea iumi talem nomoa, bat hem mas showaot long samting wea iumi duim and hem mas tru wan.” (1 John 3:18) Olsem example, iumi preachim “gud nius abaotem Kingdom” bikos iumi lovem Jehovah and olketa narawan. (Matt. 24:14; Luke 10:27) And tu, iumi gohed for “showimaot love” taem iumi patient, kaen, and forgivim olketa narawan. Datwan showimaot iumi followim kaonsel long Bible: “Iufala mas olsem Jehovah wea hem willing for forgivim iufala.”—Col. 3:13.

Taem iumi givim kaonsel long narawan, datwan no minim iumi no lovem hem. Olsem example, taem pikinini krae for wanfala samting, samfala parents maet duim wanem datfala pikinini laekem. Bat dadi or mami wea barava lovem pikinini bae no duim olsem sapos datwan hem no fitim. Long sem wei, nomata Jehovah lovem iumi, hem mas “stretem man wea hem lovem.” (Heb. 12:6) So taem iumi stretem samwan, iumi showimaot iumi lovem hem. (Prov. 3:11, 12) Bat from iumi evriwan sin, samfala taem hem no isi for iumi showimaot love. Dastawe iumi evriwan mas waka hard for showimaot love. Hao nao iumi savve duim datwan? Bae iumi storyim thrifala samting.

First samting, askem God for givim iu holy spirit for helpem iu garem love. Jesus sei Jehovah willing for givim “holy spirit long olketa wea askem hem.” (Luke 11:13) So iumi sure sapos iumi prea for holy spirit and letem datwan for helpem iumi, iumi bae showimaot love. (Gal. 5:16) Olsem example, sapos iu wanfala elder, iu savve askem God for holy spirit for helpem iu for showimaot love taem iu iusim Bible for kaonselem narawan. Or sapos iu wanfala dadi or mami, iu savve askem God for holy spirit bilong hem for helpem iu no kros, bat for showimaot love taem iu stretem pikinini bilong iu.

Mek-tu samting, ting raonem wei wea Jesus showimaot love nomata olketa narawan no kaen long hem. (1 Pet. 2:21, 23) Taem samwan mekem iu feel nogud or samting wea no stret happen long iu, tingim disfala kwestin, ‘Sapos Jesus kasem samting olsem, wanem nao bae hem duim?’ Wanfala sista wea nem bilong hem Leigh sei taem hem ting raonem kwestin olsem, datwan helpem hem for tingting gud firstaem bifor hem duim samting. Hem sei: “Wantaem, wanfala woman wea mifala waka tugeta sendem e-mail long olketa narawan and tok spoelem mi and waka wea mi duim. Mi barava feel nogud long datwan. Then mi ting olsem, ‘Hao nao mi savve followim example bilong Jesus taem mi deal witim datfala woman?’ Taem mi ting raonem samting wea Jesus maet duim, mi disaed for leavim go nomoa and no warim datwan. Bihaen, mi just savve datfala woman garem bigfala sik and wari abaotem staka samting. Luk olsem, hem no minim wanem hem raetem. Wei for ting raonem example bilong Jesus for showimaot love, nomata taem pipol tok spoelem hem, hem helpem mi for showimaot love long datfala woman.” Sapos iumi followim example bilong Jesus, iumi bae evritaem showimaot love long narawan.

Mek-thri samting, showimaot iumi tingim olketa narawan firstaem. Diskaen love nao mekem pipol luksavve long olketa tru Christian. (John 13:34, 35) Jesus garem datfala love, and hem showimaot nambawan example for iumi. Wanem nao hem duim? Taem hem kam long disfala earth, “hem lusim evri samting wea hem garem,” ‘nomata gogo hem mas dae tu.’ (Phil. 2:5-8) Taem iumi showimaot datkaen love, olketa samting wea iumi tingim, and hao iumi feel abaotem samting bae showimaot iumi followim example bilong Jesus. And tu, iumi bae tingim olketa  narawan and no iumiseleva nomoa. Wanem nao samfala nara gud samting wea iumi savve kasem taem iumi showimaot love?

Taem iumi showimaot love, iumi bae kasem staka gud samting. Iumi bae storyim tufala example.

• IUMI GAREM OLKETA BRATA AND SISTA EVRIWEA LONG WORLD: Bikos iumi garem love for each other, iumi savve nomata iumi go long eni kongregeson eniwea long world, olketa brata and sista bae welkamim iumi. Hem nambawan privilege for savve “olketa brata bilong [iumi] evriwea long world” olketa lovem iumi! (1 Pet. 5:9) Pipol bilong God nomoa savve showim kaen love olsem.

• PEACE: Taem iumi patient and lovem narawan, datwan helpem iumi for garem wan mind and peace. (Eph. 4:2, 3) Iumi garem peace taem iumi hipap tugeta long olketa meeting, assembly, and olketa convention. Tru nao, pipol bilong God nomoa garem peace nomata disfala world no garem peace. (Ps. 119:165; Isa. 54:13) Taem iumi stap gud witim olketa narawan, iumi showimaot iumi lovem olketa, and diswan mekem Dadi bilong iumi long heven hem hapi.—Ps. 133:1-3; Matt. 5:9.

Aposol Paul sei: “Love savve strongim man.” (1 Cor. 8:1) Hao nao love savve duim datwan? Long 1 Corinth chapter 13, wea samfala kolem tu “Psalm bilong Love,” Paul hem explainim hao love hem savve strongim man. So man wea garem love hem tingim nara pipol. (1 Cor. 10:24; 13:5) And from man wea garem love hem tingim narawan, hem patient, and hem kaen, datwan mekem olketa long famili for lovem each other, and kongregeson for garem wan mind.—Col. 3:14.

Love bilong iumi for God hem barava important and hem savve strongim iumi. Why nao olsem? Bikos love wea iumi garem for Jehovah savve mekem iumi for wan mind. Nomata iumi garem difren kaen living, difren kala skin, and difren languis, iumi “waka tugeta” for worshipim hem. (Zeph. 3:9) Evriday, iumi laek for showimaot disfala nambawan fasin wea holy spirit bilong God nao helpem man for garem.